[新聞] 陶大宇郭可盈 舊相好爆當年情

[wasabi1 (wasabi)]

陶大宇郭可盈 舊相好爆當年情

一對經歷十七年的螢幕情侶陶大宇和郭可盈，憑95－97年間三輯多達100集的《刑事偵緝
檔案》合作而結緣。「高婕」可盈早前在洪天明婚宴遇上「大勇」大宇，他們興奮合照上
載微博，瞬間引爆粉絲對這Pair經典情侶之懷念，這對「舊相好」日前敍舊，竟然驚爆當
年大家只差一步便能發展感情，可盈還笑指大宇不夠積極。

婚宴遇上合照瘋傳
陶：陶大宇　郭：郭可盈

陶：隔咁多年見你仍然好靚，眼前更多咗一份成熟美！我哋喺天明婚宴上再碰上，好意外
！

郭：你都無變，一樣係開懷大笑！其實上次合照上載到微博都係徇眾要求，再加粉絲評論
，簡直係瘋傳！當年我拍《刑》劇系列仍係一個新人，好似一舊雲，呢個劇亦係我事業轉
捩點！　


陶：一張白紙先可吸收得最多！「高婕」個角色先可以如此自然演繹！

郭：其實我入行第一部劇《Catwalk俏佳人》都係同你合作，我處女作亦係畀咗你呢！緊
接開咗三輯《刑》，第一輯我戇居居，第二輯就係徇眾要求開拍，因為當時好多觀眾睇完
結局唔開心，要寫信去K-100投訴，當時監製潘嘉德特別設計結局，寫我失憶要離開，喺
機場轉頭望住「大勇」…………之後完場，好多觀眾都好心痛！

陶：監製好聰明，如此設計就可以開第三輯！不過，第三輯我哋去北京外景，記得你好慘
…………肚屙！天氣凍至零下十多廿度，你又要做兩個角色，場場都有你，我又愛莫能助
！

郭：幫到我嘅只有「止屙藥」！我記得有一朝早要出外景，但我肚屙，你仲叩門問我係咪
唔舒服……不過，都捱過咗。

陶：辛苦都值得，十幾年後，依家返內地工作演出，好多觀眾仲記得「大勇」、「高婕」
這對經典組合！

經典情侶難得咁夾
郭：我倆絕對係經典情侶，你係我經典拍檔！我哋嗰種「夾」，唔係指人靚，其實靚人呢
個圈好多，但要相襯就唔多，我同你嘅配對真係好「受」！最初我面對你嘅感覺，有兩種
Feel，一種係大哥哥，好有耐性教我，另一種係大明星！

陶：大明星？你講真？我覺得自己當年仲戇居居！

郭：點戇居？你入行已一段時間，你係我拍過嘅男演員最深刻嘅一個，簡直陪我成長！

陶：我都經歷過「白紙」年代，不過可盈你好聰明，吸收快、戰鬥力強，又有一種不忿氣
性格！你試過喺我面前喊，我知你非易喊嘅人，你有呢個表現，證明你對我信任！

郭：係呀！我好硬頸！我記得當年為咗被屈遲到嘅事，其實有錯我一定認，嗰次後我倆感
情邁進一大步。

陶：有好多人問，我倆日對夜對點會唔「撻着」？

郭：照正來說，應該會！哈哈……我仲記得我倆都有緋聞，既然演得情侶，嗰時我倆未婚
，但始終都冇「撻着」，我諗因為我當時太專注工作，忙讀劇本，連補妝都無時間，所以
無留意身邊呢位俊男而錯過了！但我估你應該對我有遐想啩？

約完睇戲再冇下文
陶：當日你「卜卜脆」，點敢話無遐想！可能大家都忙，無行前多一步，可能就係欠呢一
步！

郭：就係欠呢一點點啦……不過，我有記憶我倆曾經相約睇戲！我記得拍《Catwalk》時
，睇《侏羅紀公園》！嗰次係我約你……點解你會應約？

陶：冇咩特別就應約啦！睇戲都唔代表咩，睇完戲就Bye　Bye，冇下文！不過記得拍《青
出於藍》時，一場廚房戲我曾經問你，如果我當初（指拍《刑》）「溝」你估會點呢？

郭：我都記得……拍《刑》時你都問過我呢條問題，但我當時同文龍拍拖尚未公開，我記
得你仲問我，如果唔係文龍已出現，唔知你會唔會有機會？

陶：你當時點答？

郭：我話：「唔知呢？」但最後你都冇追我，證明你冇爭取！不過，你知我性格係點，跟
你一樣都係「凸」，一齊就如火星撞地球，如果真係一齊，我相信會唔開心收場！

陶：我倆能夠有今日嘅和諧關係，證明當初我決定係冇錯，唔係依家可能反面！依家大家
再見面，可以緬懷當時一齊捱、一齊攞獎（情侶組合）嘅美好回憶！

Source:
http://orientaldaily.on.cc/cnt/entertainment/20120617/00282_080.html

--
※ 發信站: 批踢踢實業坊(ptt.cc) 
◆ From: 42.2.22.242
推 cathywang:我現在正重看刑偵一  天丫  超懷念那段時光的
→ cathywang:我的青春就跟隨勇婕一去不回頭了
推 joycemei:這對也是我的青春回憶 >\\\\\<
推 elin033:青春回憶+1 那時和媽媽一集一集的追看 真的好好看!
推 jayaneko:青春回憶+1 我家最愛重看刑偵，看了N遍但還會重看下去XD
推 emai:心花放也不錯看
推 ilovekenix:青春回憶+1,所以我的id...當時超愛可盈的