郭富城與小美 - No.120 快周刊 / 澤星

報紙雜誌等平面傳媒一下重男輕女，女藝人只要性感少少，都會大篇幅報導
，男藝人就好慘，就算贏世界傑青都未必一定做頭條。原因是讀者鍾意睇圖
片多過睇文章，而無論男女都鍾意睇靚女多過麻甩佬。

不過郭富城就例外，因為佢係全港（甚至全球華人）男藝人中，影相最有美
感同動感，編輯好容意揀到合心水的圖片刊登，甚少令人失望。好多男藝人
都好怕影相，因為唔識擺「pose」，但郭富城絕無呢個問題。

不過每個人都有自己弱項，郭富城亦話坦白承認：「我唔識講說話！」大家
唔好以為佢謙虛，「天王」之中，張學友最好口才，經常妙語連珠，華仔對
坦白同最夠膽講說話，黎明就鍾意講道理，經常帶記者「遊花園」。

至於郭富城就差得遠，曾經見過一個場面，有十幾個記者圍住佢訪問，問了
半個鐘，大家你眼望我眼，一句都寫唔落，然之後走去搵小美講了十分鐘，
人人都滿載而歸。

另一個難忘場面係郭富城第一次奪得TVB的「最受歡迎男歌星」，那次在慶功
宴上，幾十個記者論住同佢影相，影完單人又影大合照，從未見過記者咁戥(
替)一位藝人高興。

***************************

曾經有個同郭富城做過專訪的人同我講：「佢好深沉，講每一句話都深思熟慮
，好有保留。」而我覺得郭富城並唔係咁複雜，佢反而比我想像中單純。佢最
大問題係雖然性格活躍好動，但多年來都活在自我中心的世界，講得難聽係有
少少自閉。

你睇佢鍾意賽車就知啦，困在車廂入面，淨係諗住點超越其他人，粒聲都唔使
出。好多男仔鍾意踢波，每次出動都成班人，大家嘻嘻哈哈互相鬥窒先過癮，
郭富城好明顯唔係呢類人。

我問佢：「點解你拍《雷霆戰警》咁搏命？」佢竟然回答：「因為我係男主角
！」我當堂打個突，冇諗到一個天王咁單純同直接，成個細路仔咁。但諗落呢
個答案又冇乜問題喎，咁佢真係男主角嘛。

***************************

至於小美呢，唉！坦白講，好多記者都對佢又愛又恨，有時我幫佢講幾句好說
話，都畀人鬧到狗血淋頭。如果要選最佳經理人，小美一定入圍，郭富城有今
日咁驕人成就，小美當然功不可沒。

但如果選最受歡迎經理人，我諗都冇佢份！其實小美都冇乜惡行，佢只不過非
常維護郭富城，假如你寫了兩句郭富城的負面報導，佢就會同你死過，因而得
罪了好多人，不過站在經理人立場，當然要咁做先稱職啦。

而唔少人經常埋怨好難先搵到小美，我都係有幾次時運高先聯絡到佢，我就無
所謂，隨緣嘛！但其他人會唔開心，搞到大家有誤會就唔好啦。

不過就算佢幾忙都好，都會睇我呢個專欄，今年年頭佢寫了封信鼓勵我，內容
係：「澤記，為什麼在編者的話咁勞騷！其實問心無愧就OK啦！不用太理會別
人的感覺，Right？......祝你新年快樂，事事順利，不再勞氣！」

大家咁話！


邱子澤