黃家強仲未死
XWeekly 218
黃家強終於蒲頭了！久未露面的家強復現樂壇，今個月廿五號便是家強獨立發展，
簽約環球後推出處男大碟之大日子。
眼前的家強消瘦了，亦口口聲聲說看化了，但仍脫不掉 Beyond 的敢言本色。說到
唱片市道，家強直斥：「係唱片公司容許『冇腦』o既音樂…」說到早前有報道指
他經常去 Wet 去媾女，家強義正嚴辭的說：「有幾大罪？衰得過搵人『頂包』？
做人梗係要娛樂o架！」
無錯，家強說得沒錯，他所做的沒有影響到任何人，也沒有犯法，光明正大，沒有
什麼大不了！
以「新人」自居的黃家強對於首次推出個人大碟坦言有少少緊張：「我對自己o既歌
好有信心，但市道差，無保障，唔知依家個市道得唔得，接唔接受我o既歌……雖然
我出道耐，但係要當新人睇，所以都有壓力。不過，問心盡力做好自己o野,好o野會
有人欣賞o既。我自問係非一般o既歌手，我係一個全能o既歌手，監製、填詞、作曲
都係我包辦，我係個音樂人，如果身為音樂人都無法立足係香港樂壇，香港無得救！
「我覺得唔係香港人唔懂得音樂，只係唱片公司唔畀機會音樂人，只畀機會偶像。其
實，間間唱片公司都係咁，咁環球起碼同我做碟，欣賞我o既才華先會搵我簽約。雖然
獨立發展好多o野要重新來過，當新人咁，係辛苦但唔緊要，我適應能力好強，唔會向
後望。有o的o野係幾唏噓，接受到咪盡量配合，做人最緊要自己係邊，做人謙虛少少好
o的，唔好擺自己咁高。」
「我同世榮有傾偈過阿 Paul」
明年是 Beyond 二十周年紀念，Beyond 三子再次聚頭，出唱片，舉行演唱會，甚至到
全世界巡迴演唱，滿足過往未能滿足的海外歌迷。
「自從獨立發展後，我同阿 Paul，世榮係少見o左，但對我o地o既友情唔會有影響。
大家各有各忙，環境唔同o左，大家都大個仔，唔似以前咁去旅行都會一切去，依家
阿 Paul 都有一班人跟住佢搵食。
「世榮？呢個時間都唔敢煩佢，不過，我係同世榮有傾偈過同阿 Paul，識佢都耐過
阿 Paul，事關以前我阿哥（家駒）同世榮夾 Band，我都係跟佢o地尾，世榮同我哥
咁樣當我係細佬。不過，我真係幾依賴我阿哥，最近就發夢見到我同佢上台唱歌，臨
出場o既時候戴住個眼鏡，就同我阿哥講：『唔記得戴隱型眼鏡添！』家駒就話，『
咁除o左個眼鏡咪唔駛望人，望下低啦，咁咪唔驚啦！』從呢個夢啟發到我仲好有依
賴心，自從自己出道之後真係好依賴佢，但我始終要自己面對同解決問題。
各自獨立感徬徨
「家駒係唔係我精神支柱？佢初初走係我最軟弱o既時候，好似個個都睇住我企番起身
走番呢條路。之後，我o地經過好多挫折，但依家仲徬徨過果時。當 Beyond 宣佈獨立
做o野o既時候，我真係好徬徨，好似搵唔到一份支持，好似成個新人咁。
「就好似三個人畢業，有o的人考o左好成績，有o的等機會，有o的就如雙失青年，唔
知做咩好，以為音樂事業就此終止。係過去兩年幾，我休息o左一年，其餘時間就做碟。
我有諗過退出做飲食生意，但始終覺得自己最拿手都係做音樂，諗o左一陣又覺得商業
市場容納唔到，之後唯有做張較為冷門o既純音樂唱片，但又諗點解我要放棄商業市場？
終於，我覺得一定要試下，咁就俾心機作歌，新歌咩類型都有。我心諗：『要接近人群
，若人群離棄我，我就要跑番去佢o地o既身邊。』我自問唔係一個受力棒o既人，好多
o野要靠自己努力。」
「冇錯，依家可算係我事業o既轉捩點，分開做o野，唔係只係同阿 Paul、世榮比較，
而係同成行的 Artist，可能人地買陳冠希，買 Twins o既碟，呢個競爭壓力都好大。
依家偶象歌手湧現，係唱片公司制度造成，真正聽歌o既人係有，所以點解要買周杰倫
同其他台灣、外國歌手o既碟？主要係香港o既音樂唔得，所以係外邊買番o的有感覺有
Taste 有自己風格的唱片，只係包糖衣o既o野滿足唔到佢o地。人有思想，唔可能聽o的
白痴歌，係唱片公司做o的『無腦』o既音樂。周杰倫咁賣得，證明唱片業無委縮，係
唱片公司做音樂有問題。
「依家仲係咁『憤怒』？唔係，係講事實。其實，依家睇得好化，好淡，爭咁多o野可
帶得走咩？人生係好短暫，正如我阿哥話齋：『俾晒你又點呀？都帶唔走，做多o的有
意義o既o野心情都好o的。』呢個亦都係我做人o既座右銘，人生咁短促，今日唔知聽
日事，唔好咁執覑，死霸都無用，最緊要睇下今日做o既o野。」
不靠家駒保險金過活
最近，世榮的女友離世，有報道指世榮境況最慘，家強有家駒的保險金可開 Benz 生
活無憂，阿 Paul 事業發展不俗又有個靚女朱茵做女友。家強語調平淡的說：「架
Benz 我買o左幾年，主要係貪佢穩陣，唔係我都買o左跑車啦。話我大把，我有幾多唧，
咪同阿 Paul、世榮搵o既一樣，保險金關我咩事，係俾阿媽同老竇，唔使擔心生活。
我當然係靠我自己自力更生啦，唔係駛咩再出來做訪問出碟！
「事實上，工作係我生活o既一部份，否則個人會好空虛，玩係玩唔到咁多時間，工作
可帶俾我唔同o既o野，經驗，學習，金錢，所以一定要做。幾時上岸？我真係無諗過，
音樂係我o既興趣，我無諗過會停，覺得唔需要去退休，就算退休我都係做音樂，最多
係退出娛樂圈，做o的自己想做o既音樂。」
未有心理準備結婚
至於人生大事問題，家強就不像之前般直言，笑咪咪的說：「有冇諗過結婚？我咁後生
，得o個十幾歲點結婚呀，哈哈！我太細個啦，照顧唔到家庭，目前尚未做到為結婚負
責任，仲未有心理準備，依家無適合人選，睇下有無一個令我有結婚衝動o既人，咁咪
可能即刻結啦。要有咩條件？哈哈，咪佢鐘意我，我鐘意佢囉，暫時呢個人未出現。
其實，感情事我都唔想講，我學梁朝偉咁講咋，咁有型o既人我都想學下呀！哈哈！」
一直以來，家強鮮有提感情事，但過往曾有不少傳媒偷拍他去 wet 的照片，亦與甄楚倩
傳過緋聞。對於種種傳言，家強肯定的說：「講得傳聞梗係假啦！阿 Paul 果o的就係
真o野。感情生活係咪空白一片？我唔鐘意咁高調，擺出來好恩愛咁，每個人性格都唔
同，我覺得感情生活係私隱，所以要收埋o的。去 wet？人梗係要娛樂啦，我唔激氣，
多謝佢o地俾新聞我添。驚唔驚影響形象，以為掛住玩唔做o野？咁有幾大罪？衰得過搵
人『頂包』？人都要娛樂o架!」
離開Beyond後第一張個人大碟即將面世，影o左幾輯相，有輯係型仔目，有輯o係車影，
每輯都好有特式，搞到不知如何取捨。
家強自爆Beyond拆伙後，曾有想過退出樂壇，後終於堅持沒放棄。
家駒離世後，Beyond只剩下三個人，家強承認有徬徨感覺。
Beyond 這個四人組合為樂壇貢獻良多，明年廿周年紀念，淨下三人的Beyond一樣會盡
心盡力搞好演唱會同唱片，不會叫久候既歌迷失望。