2002/03/22
貫徹此中
【嘩！】
文：黃貫中
唔知點解‵近排身邊多左好多細路仔‵蘇哈仔，都係o的 friend既仔仔‵女女，
真係唔認老都唔得。正因為咁，於是成日可以睇ＢＢ′觀察佢地，我發現佢地好
得意，尤其係o岩o岩開始會出聲o個o的。個 friend老占個仔得七‵八個月大，
眼仔碌碌‵好得意，食飽或開心既時候會大叫，唔停咁嘩......（呢個嘩好長！）
佢個樣好興奮‵好滿足‵好放肆‵好 ROCK！我好羨慕佢！我諗有仔女既都有這種
經歷，全世界既ＢＢ仔都在嘩嘩大叫，可能佢地淨係識一種語言，叫「嘩」，幾好
呀，你諗下全世界既人其實原先都係講同一種話既，正確o的講係ＢＢ仔係用統一
語言既，就好似貓仔狗仔一樣，我諗英國貓唔會聽唔明中國貓講乜野？
但我地同動物唔同，我地有語言，但正因為有語言我地會有隔膜，甚至完全溝通唔
到，其實係幾矛盾既。但好在有種野叫音樂，佢可以完全彌補語言既不足，一段短
短既樂章可令人落淚，一個 Beat可以令你起舞，一個字都冇，但你會明，唔知點解。
總之就可以直接『明』，當中唔需要經過大腦『語言』部分的解釋，所以音樂本身
就是一種語言，當這兩種〔語言〕結合既時候，力量會更大，但如果錯誤結合，會
變成互相扼殺。
歌詞可以把把音樂〔喚醒〕，也可以把音樂〔殺死〕！同樣〔音樂〕也可以其人之
道還治其人之身。所以有時純音樂反而可以做到心同心之間的完全溝通，完全沒有
被文字所規限，佢可以觸入你靈魂的深處，因為o個喥o係冇文字可以入到既（文字
只可描寫，只可以引發），只有音韻‵音律可以有通行證。
你不如問下o的ＢＢ仔點解要大叫『嘩......』佢既答案係『嘩......』點解？因為
開心囉，因為 high囉，唔駛等幾時，對住邊個‵鍾意嘩就嘩，吹得佢脹咩？所以今
次結論係蘇哈仔係最 high同最 ROCK既。所以我好羨慕佢地，嘩......幾爽呀！！
其實我地有好多 ROCK友，可惜佢地未識買唱片。
paul-wong