貫徹此中
【我的志願】
文：黃貫中
唔知你同唔同意－－很多人現在的職業都唔係自己原來所希望既？我都係，有時唔
知點解而家會以音樂為職業，唔知幾時開始......
讀小學既時候每天要走大約十五分鐘的路回學校，有一個四眼仔朋友日日同我一齊行，
我好喜歡一邊唱歌一邊走路，可能冇咁悶，o個個同學仔好多時也一齊大聲唱（深至唔
明既英文歌至廣告歌），總之就一邊行一邊唱，o個一段斜路我至今都唔會忘記，因為
好傻仔‵好低Ｂ，但係就真係好開心。我要多謝四眼仔，因為佢係我第一個聽眾‵第一
個知音者。
返到學校，作文堂要寫「我的志願」，我當時諗：個個都要做醫生‵律師‵飛機師，
真係咁好，望下隔籬o個個同學，嘩！「做生意」，乜你咁有大志？十歲咋！你o的童
真呢？又睇下前面，佢想做「警察」，原因係可以有把槍，可以 Bang Bang咁話，諗
起都有o的驚，希望佢後o黎唔使Bang Bang，又或者唔會用「黑星牌」代替左輪。
睇到坐o係我後面個女同學，佢寫「家庭主婦」，我好好奇，乜「家庭主婦」都算係
志願咩？到現在，我明喇，佢有一個好偉大既志願，在現今的社會，一個普通的家
庭主婦唔係咁易做，就正如一個好爸爸‵好媽媽‵好丈夫‵好太太一樣，絕對偉大。
我諗來諗去，我想到喇，我要做「英雄」，好似李小龍咁，踢到o的鬼佬飛起，為國
爭光，做個唐山大兄。老師行過，見到我寫「英雄」，佢話要我實在一o的，我當時
唔係好明，英雄咪英雄囉！要點實在？而家我諗番先至，「英雄」唔係話要做到就做
到，唔係話打鬼佬就係英雄‵更加唔係加入黑社會，好似電影入面咁，欏把刀一個斬
幾十個就叫英雄，英雄要「時勢」造就，英雄會英年早逝‵英雄會難過美人關‵英雄
會落難‵會坐監‵會「著草」‵會孤獨，如果冇壞人點算？仲有，英雄都要犧牲，
好彩老師提醒，我唔想犧牲！
後來「我的志願」便寫上「畫家」，老師睇到冇乜表情，可能佢有o的替「畫家」擔心，
驚「畫家」搵唔到食，下場會比英雄更可怕！我唔知我o個班同學後來有冇達成志願。
但如果可以給我一個機會再寫「我的志願」，我會寫「人」，我要好好地做一個人，
因為「做人難」！但求可以每天一邊唱歌一邊走路，仲有一個知音人，就很夠！