2002/03/22
黃貫中 緬甸Tough之旅
阿 Paul黃貫中前陣子去緬甸一趟，今次的目的係為「飢饉３０」探訪當地
兒童以及了解他們的生活狀況，與阿 Paul同行還有楊千嬅。
阿 Paul於緬甸前後只逗留了５日，不過這５日對他來說絕對係獲益良多，得到的
不只是親身體會到當地生活困苦，對阿 Paul個人亦係一次重新體驗。
今次應該唔係你第一次到第三世界探訪，記得大約１１年前 Beyond曾經
去過非洲近一個月，今次和上一次有麼分別？
係呀！我記得o個次係去東非，係９１年既事喇。其實今次去之前都有晒心理準備，
但係去完返到香港之後個心真係好唔舒服。我覺得作為一個香港人，好多野唔係唔
知，唔係唔知o個邊o的生活真係咁慘，但係因為一直都冇同佢地有接觸，所以好似
冇件事咁，但係我今次係好深入咁體會到o個種唔公平，點解o係同一個地球上面既
人既生活係會相差咁遠。
對你最深刻既經歷係乜野？
最記得係我地去過好多唔同既家庭探訪，佢地唔單止窮，而且餐餐食唔飽，而且o的
食物亦都冇乜營養。另外重有一個共同點就係個個都唔齊人既，有o的哥哥唔o係喥‵
有o的係媽媽唔o係喥‵因為當地生活質素真係好差。我未去之前都係同一般香港人一
樣，即係我見到而家o的香港人個個都好似有個〔愁〕字o係額頭咁，但係去完之後覺
得香港遇到既情況真係「冇乜野」‵而且已經係好幸福，佢地俾我地辛苦十倍有多，
但係仍然永遠笑住去面對，再睇番自己，究竟自己為乜要去咁愁呢？
你地最主要既係探訪當地小朋友，佢地生活既苦況係點？
我最大既感覺唔係佢地有幾慘，而係佢地既天真。緬甸既人民對我地呢o的外來人有
好大興趣，但係佢地好坦率，特別係o的細路仔真係好友善‵好純真，俾個波俾條繩
佢地玩都已經好開心，返到香港之後反而覺得香港o的細路仔好討厭。o個邊有o的小
朋友可能成世人都未試過著鞋，佢地既價值觀同我地真係好唔同，我地香港人為o個
少少野就會發晒火，其實爭乜野呀？大家係咪真係要反省下？有時係咪o的食物差o個
少少就食唔落先？
除左了解到小朋友既情況外，可唔可以講多一點當地既生活？
其實當地既生活同大家想像中差不多咁慘，而o係食物方面亦都係好差既，不過令我
感受至深既係當地人民既貧富懸殊真係好犀利，有錢既係可以有錢盜用真金o黎到起屋，
但係好多窮人就係窮到要(目訓)天橋底。其實我覺得唔單止係緬甸，世界上好多其他
地方都係咁，好似印度咁，我亦知道中國好多偏遠山區既居民係窮到要新年先有肉食既。
我唔會話自己偉大，但係我今次做呢件事之餘係有雙重意義，除左探訪同埋帶左o的物資
俾佢地外，睇見佢地開心之餘自己亦都開心，令到我自己亦重新衡量一下自己既價值，
希望可以透過自己，等其他人睇下究竟係乜野既一回事。
之前探訪過東非‵緬甸，下一個希望探訪既地方會係邊喥？
我好多地方都希望可以去，特別係希望可以去中國大西北，雖然話係「開發大西北」，
但係我知道除左o的大城市之外，普通農村農民既生活相信都係會俾緬甸更差，因為o個
邊最缺既就係水。生命就係水，如果冇水就做乜都冇用，大西北又多高原又沙漠，同非
洲一樣都係非常缺水。不過如果我去既話可能會係以私人名義去，未必會好似今次咁同
「宣明會」一齊做探訪，因為咁更可以令我更真實了解實況。
１１年前去完東非之後，Beyond做了一首歌頌和平既（Armani），今次去完緬甸
會否一樣寫一首歌？
會呀！其實o係當地既時候已經有呢個構思，一返黎香港第一時間就寫好左，呢首歌可
能會放落我４月頭既新碟中。
後記
阿 Paul一向都好健談，當一談到音樂話題時，他可一說就說個不停。但去完緬甸之
後，每次一談起這次旅程，阿 Paul一樣說個不停，似要將o係當地既所見所聞全部講
晒俾你知，令你明白到世界真係有如此悲慘，如此不公平既事發生。有樣野我唔記的
左同阿 Paul講，我一向都係「飢饉３０」支持者，４月２０日，阿 Paul約定你香港
仔運動場見。