黃貫中癩蝦蟆食天鵝肉
一提到黃貫中，大家都不其然想到「樂與怒」，在音樂上不斷衝刺，敢怒敢言，有
人稱他「憤怒」，有人覺得他「Cool」。
不過，面對著女友朱茵，阿 Paul 判若兩人，這個百練綱亦化為繞指柔，甚至甘願
自貶為「癩蝦蟆」，「醜男」，可見朱茵在阿 Paul 心目中的地位是何等重要！
好多人都奇怪我點樣可以追到朱茵？好彩囉，我覺得真係好好彩，所以都會擔心
o係呢度（感情）一次過欏晒所有好彩。能夠追到佢（朱茵）實在太好，佢冇必要
揀我，我冇咩好處可以佢畀揀，所以我都有o的奇怪。佢成日話「我貪佢有才華，
佢貪我靚仔」哈哈！講笑o者!我覺得係緣分安排，我從冇刻意強求過咩，我同佢係
由鄰居開始……
爆水管累朱茵燒 Fuse
以前，我同佢係同一座大廈，我住樓上，佢住樓下，初時我都唔為意，只係大家成
日搭(車立）時撞口撞面，係咁樣先知道大家住同一幢樓。當時大家都只係點下頭，
打個招呼。我覺得我o地係兩個世界o既人，都冇咩關係，直至之後發生一次意外，
先至正式同佢接觸。
有次佢屋企全屋燒 Fuse，原因係我廚房爆水管滴水，滴落佢間屋o既電箱，搞到成
間屋 Fuse 燒晒，咁佢媽咪就拍我門理論，搞到有o的火藥味………最後佢媽咪要求
我(手汞)爛個廚房、整好我條水管，等佢屋企唔使成日燒 Fuse，但我就要將廚房所
有o野搬晒出廳三日，畀佢搵人幫我整屋企爆o左o既水管。結果，我都願意幫佢整，
可能經過呢件事，佢o地覺得我抵得諗，我同佢一家就開始建立良好o既關係。
「較腳王」做月老
事隔冇耐，有一日，佢（朱茵）親自上來我屋企同我講多謝，大家客客氣氣咁講兩句
就算。之後有時放狗，都會見到大家拖住隻狗，有時咪約埋一齊放狗囉。不過，未知
我屋企隻狗仔係咪有心幫我做紅娘，我有隻叫「較腳王」o既狗，最鍾意「較腳」周圍
去，點知果排成日o左走去佢屋企門口，次次都係佢打電話叫我搵番隻狗，都幾尷尬。
同時，我個心都覺得有o既怪，心諗：「又會咁o既！」之後又諗大家一齊放下狗咁都好
健康，冇咩o野o者!不過o個時我好少正眼望佢，扮晒無反應，唔敢望佢，驚住一望就流
露出來。我會同自己講：「癩蝦蟆食天鵝肉咩！」所以成日叫自己唔好有邪念！佢都好
好笑，後來都問番我點解以前完全唔受佢電力電襯，好似舊絕緣體咁。
第一次約會撞正記者
其實我當時真係冇咩寄望，只覺得有個咁靚o既鄰居朋友幾好呀！點知有一日，佢又o黎
敲我度門話借 CD 畀我聽，咁我重戇居居咁隔住門欏隻 CD，淨係話：「好呀，唔該晒！
」咁就拜拜閂門，連請人入來坐下飲啖茶都冇。之後，我還番隻碟畀佢，佢媽咪應門，
話佢o係房，問要唔要叫佢出來，點知我又懵閉閉話：「唔使喇！唔該幫我畀番隻碟佢
呀！」即刻又講拜拜走人。事後，佢話番當時佢拿拿臨入房換衫出黎，點知出到o黎我
已經走o左，激死佢，哈哈!
如是者，大家都係咁樣兜兜轉轉……直到我要搬屋搬入大埔。o係最後一日，我真係執
緊o野走、搬運公司都o黎埋，我就諗起佢，即刻打畀佢同佢講話：「我要搬屋，搬入大
埔……。」佢就即刻話：「咁遠呀，咁我o地咪冇得一齊放狗？」我「的」起心肝話：
「咁唔放狗，我咪你約去街囉！」我重即刻約佢出來。o個時佢重有兩個鐘頭就要上機，
但都肯出來，我連屋都唔執，就即刻仆出去。終於，我o地把握呢兩個鐘頭睇狗展，好
衰唔衰第一次出去就撞正記者，我o地就見晒報，真係尷尬！
相處四年從未嗌交
不過，o個次之後我o地都未正式拍拖，我都未正式展開追求攻勢，直到佢生日，我
Send o左束花畀佢，然後打畀佢祝佢生日快樂，點知佢竟然話無約人依家同媽咪屋企。
我心諗：「天冇眼呀！」就即刻約佢出來慶祝，慢慢我o地就一齊喇！
其實我成日都覺得我o地唔登對，我係無機會！正所謂美女配醜男，我就成日照鏡睇o下
自己夠唔夠醜，唔夠醜就整「Where」o的。哈哈！經此一役，我發覺做o野最緊要有誠
意，唔需要心急，慢慢互相了解重好。
我o地八九年開始拍拖，到依家差唔多四年，相處完全無問題，連交都無嘈過一次，但
唔係因為我就佢，反而佢就我多。佢知道我忙，有時買宵夜畀佢食，佢見我兩個眼圈都
黑晒，就趕我走，叫我早o的返去屋企抖下。雖然我係忙，但我都會堅持見佢，做人男
朋友一定要做番本份，忙咪做少o的囉，但一定要做。所以我點忙都好，都會同佢食下
飯、看電影，呢o的o野好緊要，最緊要係心意，五蚊買樣o野俾佢，分分鐘開心過你送
五十萬的鑽石。
唔排除會閃電結婚
有次我話冇買禮物俾佢，只係畫o左一幅畫，佢已經好開心。依家我地感情好穩定，大
家都認定大家，但我o地都好享受依家拍拖約會o既生活。結婚？咁唔係為結婚而結婚既
，對於我來講結婚幾嚴重，事實上亦都好嚴重，我唔想結婚第二日就要開工，我地暫時
無結婚o既打算。
不過，我都唔排除會閃電結婚o架，但我明白個個女仔都渴望有個完美既婚禮，著婚紗、
擺酒，開開心心。所以，結婚我一定唔會「求其」，我會好莊重。會唔會奉子承婚？唔
會啦，小生命o既責任好大，大過晒所有o野，我依家已經湊緊女（友），仲要湊多一個
，哈哈！大o個個會呷醋呀，剛結婚都係要先享受一下二人世界。
想開公司培育樂隊人才
其實我係有想過退休，都幾唏噓，大家都大個，差唔多啦，但差唔多唔係話係時候結婚
，只係係時候做另一o的o野。我隨時宣布退休都唔定，退居幕後去幫其他 Band，呢個
一直係我o既心願。
我想自己開間公司，培育樂隊人才，依家樂壇真係冇咩空間容納新 Band。但我就係唔
相信呢o的人無存在空間，我個心雖然係灰色，但係對音樂始終充滿熱誠同希望，依家
o既音樂市場係淡，但都唔夠我對呢個市場o既人淡。不過，就算淨番我一個人，重有錢
o既話都會繼續支持音樂，就算問銀行借錢都無所謂。
我最擅長打逆境波，愈激發我既奮鬥心。我唔會怨，我會積極面對。我入o左呢行二十
年都可以捱，對我來講係件好事，上天畀o左咁多磨練我，我都繼續 Keep 住，俾個咁
有趣o既位置我企，要我用個腦面對不斷而來o既艱難。但某個程度上，我應該開心，
暫時我係未見到岸，或者係見到岸偏埋唔到岸，但如果一早埋o左岸，我就無法繼續去
親身體驗呢個世界、呢個社會，咁樣反而有助我o係音樂上o既創作。
性格造就了人生
我都試過好多難關，係邊緣上掙扎，性格係造就o左人生，我冇得怨點解冇人o地咁好彩
，因為我冇得選擇，唯一賺到既係有班人o既認同、支持，我真係好開心。依家依然係
我o既耕種期，依家做歌手真係賺唔到錢，但最重要o既支持音樂，推動樂壇，希望有
能力講o野大聲o既歌手都幫幫手，集合力量。
二十年來o既經歷真係好多，都係一個回憶。不過，第日真係退休，我o既生活都唔想咁
激，我有憧景過退休後既生活，撚下雀，養下魚，畫下畫咁，係靈性上方面發展下都幾
好oㄚ。
〈撰文〉劉映彤
〈攝影〉黃錫泉
〈美術〉大衛
阿Paul與朱茵拍拖將近四年，感情有增無減，看來好事快近哩！
Beyond四子一起的日子至今只能成為追憶，但阿Paul對家駒的離開仍覺得是最大的遺憾。
性格造就人生，我冇得怨點解冇人ｏ地咁好彩，因為我冇得選擇……
雖然 Beyond 暫時解散了，但對於音樂，阿 Paul 依然全力以赴。
快周刊