8/25/2000

Beyond成員之一黃貫中(Paul)已經玩音樂達十多年之久，相信以其音樂造詣，做
唱片監製簡直冇乜難度。適逢女友朱茵要出碟，阿Paul自然義不容辭、抱捨我其
誰式熱忱為女友做唱片監製啦！不過，只聞樓梯響、未見人下來，唱片籌備多時
尚未面世，難道二人掛住「煙韌」而拖延進度？

趁昨日阿Paul到赤柱海灘拍攝與李克勤及葉世榮一同合唱的新曲「小姐你好」MTV，
記者立即問他箇中實情，他解釋謂：「幫佢(朱茵)做監製梗係要做到最好啦！有時
大小姐無Mood就唔唱，而家已經錄o左兩首歌，唔可以衰ｏ架，衰o左就會好大鑊！
第一以監製身份；第二又要以男友身份嘛！」

阿Paul更話若朱茵錄得唔好都會照鬧佢，一於公私分明，而且唔會俾女友「洗衫」
喎！此話何解呢？皆因以前朱茵曾唱一首叫「洗衣機」的歌曲，該曲的歌路與他的
截然不同之餘，風格亦不被阿Paul所接受，故阿Paul不欲女友再唱該類歌曲，唔俾
佢再洗衫。

這對公開的戀人其實私底下十分相敬如賓，尤其朱茵為顧及男友的感受，一向以來
都未曾要求他同遊日本那「傷心地」。自好友黃家駒在日本意外身亡後，阿Paul表
示除了工作關係之外，都盡量唔再踏足日本，雖然事隔了多年，但陰影始終難散！