阿Paul黃貫中早前捲入緋聞中，正常戀愛年齡而言，三十幾歲的他算是行
「晚年桃花運」，最慘連合作了十五年的隊友也藉此捉其痛腳笑餐死，但阿Paul認
為最慘並非被人笑他在朱茵屋企食杯麵，而係唱片公司不聞不問的對待。

　　呢間公司簡直係「垃圾」，我唔怕講！成日話我Ｄ歌卡拉OK唔得plug上電台唔得，
用「奇怪」去形容我份心血，under呢制度邊有好歌出。
又話造唱片要賣得，我問點解？佢話因為錢，我問點解要搵錢？佢話因為要生存，
大佬我咪生存緊囉！愈問愈矛盾，我又唔係無得食無得住，遲早一日我會問公司點
解當初你要簽我呢。

「垃圾」，對住經理講都咁話，成日放逐我去台灣，香港無宣傳，十五年來自問盡晒
全力去做，失去好多去換取樂壇生存空間，叫我行多次Beyond呢條路我都未必可以。

　　香港其實有好多好Band，大佬呀！我只係其中一隊，偏偏要我去提拔Band，唔
可以擺我上大，Band又推你出去，原創又推你出去，有talkingpoint咩！哈（冷笑）
成個陳列品咁，你覺得我真係可以幫到手咩！我唔鍾意喎！

　　將來除音樂之外，希望搞個人畫展同埋練好身體，人健康，脾氣都無咁臭
（你知就好），胸襟或者都會闊，結婚？邊個肯嫁我呀！結婚咁嚴重，諗清楚好。