如何成就飛龍再生?
《飛龍再生》的製作費逾三億港元，但電影尚未拍俊，
哥倫比亞三星公司購入的世界發行權(亞洲及法國除外)，
連同亞洲及法國賣出的有關版權，已經為電影進賬四億。
淨賺一億，盤數似乎幾好睇。
但假如電影touch wood推出市場後劣評如潮，製作人都幾弊。
所以參與《飛》片的人都很關注四件事。
一. 這是「成龍作品」，在創作上是成龍做主導的，但他需要有適當的班底去輔助他。
二. 這是「港產荷里活片」，但不希望落入《火拼時速》及《贖金之王》命運，
美國人同亞洲人都應該同樣睇得開心。
三. 汲取《特務踢死兔》的教訓，特技不可以掩蓋成龍，要變成他其中一樣工具。
四. 成龍需要有前有未有的突破。
承擔著這些責任的包括導演陳嘉上及編劇Bey Logan（龍比意）。
《飛》的構思最先是張堅庭(監製)向成龍提出的，
當時陳嘉上是以英皇多媒體集團(EMG)行政總裁的身份參與。
「我可以講係純粹從生意的角度去睇呢件事，面對一個咁大的投資，
我要諗點樣將電影推出市場，以致可以回收到筆錢。」
但為電影找尋美國導演的過程卻遇上阻滯。首先《飛》三億港元投資額好似好大，
但以西片來說好細，美國的導演只肯付出三十日的拍攝日數，
但三十日根本不足以完成一部成龍動作片。第二，這部是「成龍電影」，
一開始就確立成龍做主導，導演唔可以「妹仔大過主人婆」，
遇著不熟悉的美國導演未必做得到。
雖然掛名導演，但陳嘉上說他的CEO身份絕對強過導演身份，在拍攝現場他代表老闆，
掌握的是用錢的權力，創作就由成龍作主導。
港產荷里活片
一直有個疑問，究竟《飛》屬於港產片﹖荷里活片還是國際片﹖
應該以資金來源、製作班底或是語言去介定﹖陳嘉上會歸類為「港產荷里活片」。
「電影係香港人製作的荷里活片，基本上用了荷里活制度，又達到荷里活產品的質素，
就連最後的品質檢定都係由哥倫比亞公司負責，我會話係港產荷里活片。
如果你唔知製作班底有陳嘉上或者洪金寶(動作指導)，你都會以為係荷里活片！」
─收片以致通過檢定的是哥倫比亞公司，是否意味著荷里活的市場比香港，
甚至亞洲市場更形重要﹖「荷里活市場的生死係決定了這部戲的生死，
搵佢做品質檢定係應該，亦係必然的，我必須信任佢。
但電影注入好多香港元素同香港精神，我亦有信心佢亞洲都會得到相對成功！
好多人話《火》同《贖》系列，美國反應好好，香港同亞洲就麻麻。
大哥的理念係如果有適當的班底，有一個好的故事，
佢係有能力拍一部兩個市場都會認同的電影。」
成龍首個會經歷改變的劇本
當張堅庭及成龍接觸Bey的時候，已經有一個概念︰
「今次成龍會死，但他會轉化成超級英雄重回世界。」
同時美國編劇(Paul Wheele及Bennett Joshua Davlin)亦撰寫了第一稿。
但劇本有很多地方存在問題，所以Bey需要重新再開始過，
包括將取景地由澳洲、美國改為愛爾蘭、香港及泰國、補上女主角嘉莉．科蓮妮的戲份，
還有刪除了成龍死而復生後「不能觸摸物件」的橋段。
不過最重要的是為劇本賦予靈魂──
「我為劇本確立了一個主題──有些人不懂得讚嘆生命，要等到自己死了再回來，
有第兩次機會才會學懂。」Bey說每一個演員都在等待一個適合的角色，
他相信憑《飛》，成龍會成功轉型做性格演員。
陳嘉上亦認同︰「大哥今次真係有戲可演，佢以前的電影有對手，
不過係打對手，呢部就多演對手！」
關於劇本的創作，尚有兩個問題。
Bey Logan未來港工作之前，十九歲開始就視成龍為偶像。
其後二人因工作認識，Bey現在再為偶像撰寫劇本，會否寫來更加得心應手﹖
「我知道佢講說話的方式同速度，可以為佢寫適合的對白。
不過最有趣係我有一場戲刻意寫佢駛出一招『蛇形刁手』，
如果熟悉佢以前戲觀眾會睇到會心微笑。不過個段好似刪剪，
希望出DVD時候可以曝光。
又有一幕我寫可惜無拍到，講成龍發夢會出現一個邪惡的成龍，佢要自己打自己。
李連杰《最後一強》都係咁，不過佢個樣個個都一樣，
但我構思係成龍會露出一個邪惡樣出。」關於動作場面，
想知道Bey在劇本上是否只需寫上Action即可。
國際級卡士+動作+特技仲work﹖
看回《飛》的資料，宣傳重點是「國際級卡士 + 高難度動作設計 + 荷里活頂尖特技」，
但結合這三個元素的電影現在隨處可見，它還是一個賣點嗎﹖
另外《特》這個反面教材又可以怎理解呢﹖
陳嘉上說：「我覺得這個方程式短期內都好難話無晒特色，
你轉過另一個明星又係另一個賣點。我會形容呢種做法係麥當勞，麥當勞食都係一樣，
但佢成日改變佢包裝同公仔，所以後生仔仲好鍾意食。
就等於電影一樣，按照呢個不二法門，生產電影未必有新意，
未必係好電影，但肯定係受歡迎電影。」
成龍的號召力有幾大﹖「港產荷里活片」會否同時hit中本地市場﹖
特技及動作場面能否取得平衡﹖科幻電影能否造成氣候﹖《飛》會是個指標。