鍾嘉欣 行屍走肉

2010.06.08 新報

    繼《老友狗狗》後，鍾嘉欣在新劇《蒲松齡》中，再度與馬浚偉（馬仔）做情侶。雖
然一直以來，要數鍾嘉欣的螢幕情侶，必然會想到林峯，但原來今次已是嘉欣第四次跟馬
仔合演情侶，比起緋聞兼螢幕情人林峯還要多兩次，嘉欣與馬仔合作勝在自然安心，但嘉
欣坦言，始終與林峯外形最合襯。

　　嘉欣拍這個劇期間，最大問題是不知為何患上失眠，整整兩個月如「行屍走肉」，幸
好得到其他演員關心及支持，她才能捱過去。

　　撰文：霍淇

　　在新劇《蒲松齡》中，嘉欣飾演中醫師的柳心如，天生一股傻勁，性格善良率直，後
來被陳法拉飾演的狐仙施法，令她慘變成狐妖。為找回離家出走的家姐心妍（姚子羚飾）
，嘉欣其後進入「蒲家」認識由馬浚偉飾演的蒲松齡，兩人其後因誤會而觸發愛情。

　　訪問時，劇集尚未出街，嘉欣已率先在官網上成為劇中最受歡迎演員，她懷疑地問：
「係幾時嘅事？我真係唔知呀！咁梗係開心啦，但套劇未上……可能係我哋Fans幫我做嘅
啦！其實我哋拍呢套劇，每個演員都非常努力，喺我心目中，每個演員都受歡迎，因為今
次真係合作得好愉快，只有我因為身體唔好而有少少瑕疵。」

　　身體狀況亂晒籠

　　嘉欣口中所謂的瑕疵，其實就是失眠，皆因她在拍攝該劇時，在沒原因下失眠整整兩
個月。回想當時情形，嘉欣仍心有餘悸的說：「一日唔瞓覺已經唔好受，兩三日瞓唔到你
話辛唔辛苦，如果係兩個月唔瞓，你想像吓嗰種感覺係點？其實我有啲失望……我真係幾
失望，因為我知道拍呢套劇嘅時候自己投入唔到。」嘉欣表示期間看齊中西醫治療失眠症
狀，但可惜當時她的身體狀況已「亂晒籠」，故整整兩個月靠吃維他命，只睡過一次。

　　很難相信一個人能持續失眠兩個月，不禁懷疑地問她是否真的沒睡過，眼前的嘉欣非
常肉緊地說：「每晚喺張床度就只係合埋對眼，但個人就係醒嘅，就算嗰日有8個鐘畀我
瞓，我都只係合埋眼8個鐘。」嘉欣指當時的自己，每天有如行屍走肉，就連自己說過甚
麼亦不知道，狀態是入行後最差的一次，幸好劇中每位演員均很關心、支持她，才能捱過
去。

　　林峯外形最合襯

　　自2004年入行後，嘉欣跟馬仔合作的《皆大歡喜》、《金石良緣》、《老友狗狗》到
今次《蒲》，已是兩人第四度以螢幕情侶身份出現。坦白說，縱然嘉欣跟馬仔再度成情侶
，但個人認為嘉欣跟林峯這一對，還是較深入民心，豈料話口未完，嘉欣已衝口而出說：
「各有各着啫！」

　　對於馬仔，嘉欣形容對方是一個好哥哥，跟他相處會很安心。「同佢拍劇好舒服，我
初初入行拍《皆大歡喜》嗰陣已經係同佢一齊拍，所以嗰種感覺係好似由細睇到我大咁，
嗰種熟絡嘅感覺令到大家合作時更自然，更加安心，因為知道有咩事都有哥哥睇住。」嘉
欣指跟馬仔那種是合拍，至於跟林峯，她直認兩人合襯。「我同林峯大家年紀相近，外形
合襯，所以我哋唔需要做啲咩嘢，出到嚟都會好成功。」問她覺得誰人跟自己較好時，她
想了想然後擰擰頭說：「冇得比，冇得話邊個好啲。講真，如果講心裏說話，我覺得我同
林峯外形當然合襯，但其實我同馬仔一啲都唔輸蝕！」

　　後記：瞓得少短命

　　談到失眠問題時，嘉欣自言當時好驚，她說：「都唔知發生咩事會成個人都瞓唔到。
」沒想到跟她做完訪問後，她卻突然說：「其實失眠又唔係好大件事，唔想講到好似好嚴
重咁！」相信嘉欣最近肯定忙到沒時間看新聞，歐洲有研究指出，顯示持續每晚睡少於6
小時，會增加早死風險，咁都唔嚴重？