佘詩曼“拍拖阻住我”
Me!周刊 第167期http://bbs.ent.163.com/bbs/tvb/167595034.html
這一日，佘詩曼一邊化妝一邊做訪問，中午時份，助手問：「想食乜？」
「呢度唔准叫外賣，靜靜雞叫唔係咁好。」表面證供，阿佘應該幾循規蹈矩。
小、中學就讀協恩女校，中六後，旋即前往瑞士修讀酒店管理，想當年，這一個國家這一
科，又 hit又中產，是多少民間女子的夢想。回港後，目標為本，搵工只向五星級酒店埋
手，「一係唔做，一做要做好啲。」最後，做唔成管理，當上了香港小姐。
佘詩曼“拍拖阻住我”
一份見得人的履歷。
拾級而上，未輸過，形成唔可以屈就的性格——包括感情。
入行至今，名字總離不開「男朋友」，幾乎合作過的對手都傳緋聞，最轟烈的鄭嘉穎，最
新鮮的陳豪，最冇記憶的陳浩民都數埋……
「點解大家對我感情生活有興趣？可能我有神秘感。」
神秘感，潛台詞是賣座保證，阿佘唔止是大台「我最喜愛的電視女角色」和最具搵錢能力
的電視藝人， 06年更被封「年度華人四大名旦」之一，跟林心如、劉亦菲和趙薇齊名。
三十有五，事業萬千星輝有名又有利，恨拍拖，但恨還恨，陳李張黃何任憑哪一位，女強
人面前，只是 side dish。「我唔係聽晒男朋友話嗰種人。」
今時今日，得來不易，押上愛情也在所不計，「每個人有好多 stage，搏殺期，拍拖阻住
我……
「依家都係，唔可以要一個影響我情緒嘅男朋友。」
事業與愛情，從來難雙贏，尤其是，當你死都唔肯讓步的時候，揀事業，明碼實價，最可
靠。
Profile
Charmaine Sheh
出生日期： 1975年 5月 28日（雙子座）
出生地：香港
身高： 5呎 3吋
體重： 100磅
語言：廣東話、國語、英文及德文。
學歷：瑞士 International Hotel Management Institute Switzerland酒店管理文憑畢
業
簡歷： 97年獲選香港小姐季軍，同年 12月簽約成為無綫藝員。 99年演出首部電視劇《
雪山飛狐》。 00年憑《十月初五的月光》跟張智霖成為「本年度我最喜愛的拍檔（戲劇
組）」。 01年拍罷《酒是故鄉醇》晉身一線花旦。 06年憑《鳳凰四重奏》連奪台慶「最
佳女主角」和「我最喜愛的電視女角色」，成為雙料視后。
主要作品：電視劇《雪山飛狐》（ 99），《十月初五的月光》（ 00），《酒是故鄉醇》
（ 01），《無頭東宮》（ 02），《金枝慾孽》（ 04），《火舞黃沙》（ 06），《歲月
風雲》（ 07），《法證先鋒 II》（ 08），《宮心計》（ 09），《天與地》（ 10）。
電影《跑馬地的月光》（ 00），《月滿抱西環》（ 02），《美女廚神》（ 07），《 72
家租客》（ 10）。
官方網址： http://www.shehsheh.com/
唔好迫我
做女人難，做名女人更難，難在搵對象。
佘詩曼 18歲初戀，維持年多，雖說深刻，但在她口中，完全感覺兩回事，「我去讀書，
被迫分開，冇辦法。」
今日，她對愛情，仍然理性行先。要拍拖，就要懂得駕馭個人情緒，瘋戀二字，早已不存
在於佘氏字典入面。
「可以話，工作上我已擁有滿足感，過咗搏殺期，有少少想拍拖，但份工靠情緒去表演，
如果日常生活都被人搞到又喊又笑，我 handle唔到，會發癲。
「拍拖唔一定要發癲。」
談戀愛要保持冷靜，好難喎！
「點會呢？譬如話，有啲人性格唔鍾意將個心打開，係愛你，但永遠將自己收埋，咁樣我
好難了解佢，呢種人，就會令人情緒好起伏；我個人唔係 o架，忍唔住要乜都講，講完冇
事，呢種性格，咪冇咁容易令人牽動情緒囉！
「（靚仔另計？）我唔抗拒靚仔，嘻，以前男朋友冇一個係靚仔。（真嘅？）真嘅。」
屈指倒數，陳豪鄭嘉穎馬德鐘張智霖陳浩民連吳卓羲都高頭大馬有型有款，唔通現實不如
做戲？
「我要一個心胸廣闊嘅男朋友。
「依家唔同十幾廿歲，拍拖唔會玩玩吓，希望一齊生活，唔同以前，鍾意就得。」
想搵同居密友，就要有為愛情犧牲事業的準備。
「為一個男人放棄事業？完全放棄呀？咁我做咩呀？咪好悶？點可以大家一齊，明知我鍾
意做戲，偏偏迫我放棄呢？咁都唔係好鍾意我啫……唔……如果好鍾意呢個人，又知佢想
我唔做，都會嘅……
「但唔可以迫我，唔可以 set死我。」
我俾人出賣過
2000年起，阿佘成為最旺劇的女主角，拍乜紅乜，事業有成，人愈叻，姻緣愈淡泊，梗係
，係男人都怕女人叻過自己。「叻定義好表面，可能男方係好叻烹飪哩，我又冇理由同大
家分享，叻唔叻，係人哋睇啫。
「同一個人一齊，最緊要開心，其他唔重要。」
努力尋開心，講拍拖，也講工作。
當上港姐後，馬上被邀改簽藝員合約，首兩套劇《生命有 Take 2》及《雪山飛狐》均被
人笑雞仔聲，搞到佢幾乎連工都唔想再返，「以前係咁叫我做柔弱、小家碧玉角色，都唔
係我嚟嘅，初入行就要做一啲跟自己唔類近嘅角色，好難。
「係咁俾人踩，以為自己入錯行。」
接着拍《十月初五的月光》、《酒是故鄉醇》，終於開竅，「初五角色爽朗，跟自己相近
，做得自然，別人覺得我有變化，《酒》在大陸實景拍攝，開工第一日我已經覺得自己係
當地人，好投入。
「漸漸被認同，有咗自信，開始覺得自己有演戲天份。」
十年間，由「一嚿飯」躍升為視后，收拾回憶，最大教訓竟然是被朋友出賣。
「初入行，我信人，同一個朋友講知心話，第二日，所有內容上晒 C1，好明顯件事經過
鋪排。好彩當時自己冇乜新聞價值，傷害冇咁大。
「依家，我只會搵圈外朋友傾偈，試過俾人出賣，唔再咁容易乜都講。」
生長於單親家庭，五歲時，父親病逝，眼見媽媽哭到肝腸寸斷，阿佘不明就裡，傻更更地
問：「你係咪驚以後冇人陪你瞓？我陪你！」自此，母女倆便孖鋪，直至十四年後，女兒
負笈瑞士，翌年母親再遠嫁夏威夷。
對於後父，她很坦然，「佢好錫媽咪，我哋相處得好好。大約八、九歲時，媽咪問過我：
『幫你搵個新爹哋，好冇？』我話『唔好』，再冇見過佢當時男朋友，之後我去讀書，佢
遇到 uncle，再冇問我。
「其實，男人女人去到某一個年紀都需要有個伴，爹哋走咗，媽咪一個人面對所有事，呢
種孤獨滋味，我依家感受到。
「最緊要佢開心，唔可以一世為仔女。」
對於母親再婚，抱接納態度，對於自己婚姻，卻有另一番見解。
「我對婚姻好矛盾。
「十年前，好恨有一個 big family，立心起碼生三個，好憧憬一個畫面，屋企飯廳有一
張長枱，朝早爹哋同成班仔女一齊食早餐；人大咗，就發覺栽培一個小朋友，好與壞，一
線之差，責任好大，我亦要犧牲好多，例如事業、時間、空間。
「呢一兩年都唔想。」
愛家又愛自由，十字路口困住不少未婚中女，稍不同的，可能是她較大家想像中更獨立。
家中三兄妹，從未一塊兒生活過（！），比她大六年的哥哥一早跟了外婆，現在意大利工
作；細佬是遺腹子，九歲時主動要求跟叔叔移民加拿大，三人細細個已分道揚鑣，「唔捨
得梗有喇，但媽咪覺得咁樣對佢哋未來都好。」剩下兩母女留港，相依為命的感覺更深，
女兒最親，「佢俾我 free fight，由細到大，唔使睇功課，唔使叫起身返學，只負責簽
手冊。我從來唔依賴。」
近幾年，三兄妹約定，每年去夏威夷會合，再一起去旅行，彌補早年失落了的親情，「媽
咪三年前患過一場大病，肺部出血，一度心跳停頓，自此我決定，每年一定要放假陪家人
。」語調由快變慢，由硬變軟，睇得出，她才是她的命脈。
「我好清楚記得，當選嗰晚，紅館台下好多歡呼聲，但佢座位離我好遠，我又唔可以走落
台，嗰一個 moment，開心，又感到力不從心，感覺好奇怪，都幾恐怖。
「入行後，證明事實亦是如此。」
感情上，死口唔認低威，親情上，唔認依賴還是依賴，阿佘坦言，全世界，只聽一個人話
，「我阿媽冇點過我。」
後記
訪問後，有人問我：「佘詩曼係咪好嗲？」
唔……都係嘅。
例證一，傾談間，總是不經意地雙目一瞇，媚態萬千，我肯定，佢係不經意。
例證二，講到買樓投資心得，佢直言：「唉！舊年想買，以為今年再跌啲，點知升極唔跌
，激死人喇！」語氣加埋瞇眼，我見到聽到都暈浪。
現實是，她已有一層樓自住，所謂「想買樓」，是指付三成首期買第二層，價高即放，這
是她一貫累積財富的方法，「我覺得齋儲現金唔會滾得大。」據報，去年收入千五萬，剛
換八十萬 Benz跑車，身家稱得后，自非浪得虛名。
做完訪問，我體會到一句話：「我很嗲，但我很硬淨。」學得到，自然丁財兩旺。
撰文:伍淑嫻
形象: Karen Ling
攝影: Kenji Leung
化妝:江中平@A&V Make Up School
髮型: Kate Shek@Hair Culture
場地: Lanson Place Hotel（http://www.lansonplace.com）