老公大晒　陳法拉攞免嘴金牌

2010-09-25 壹周刊 第1072期

真老公先嘴得！（設計對白）
明白晒！（設計對白）

電視劇《公主嫁到》首播收視高企卅七點，暫時成為今年收視之冠，叫好叫座，陳法拉跟
馬國明的感情線在本週亦有新發展，劇情本來安排二人嘴對嘴一吻定情，不過過往在熒幕
前晒 bra、跳鋼管舞的她忽然錫身唔肯嘴，據了解，為要顧及老公 Neway大少薛世恆面子
，陳法拉早已向公司攞定免嘴金牌，老公大晒。

氹唔掂

本週播映的《公主嫁到》，其中一幕講述飾演公主的佘詩曼近身陳法拉跟對手馬國明在枱
底一吻定情，之後拍拖結婚生仔，不過就由本來劇本要求的嘴對嘴，變為馬國明唔覺意錫
到陳法拉面珠，親密程度減半。

「其實嗰幕戲好普通，但法拉點都唔肯埋位，最初導演講唔掂，之後輪到小青姐（監製梅
小青）去講，後來出動埋珍姐（曾勵珍），但講咗好耐，法拉依然企硬唔肯錫嘴，最後改
為馬國明喺佢面度蜻蜓點水咁錫一下，不過法拉之後都冇俾人警告，因為佢同珍姐講明以
後都唔拍嘴戲，唔想屋企人尷尬。上次晒 bra嗰幕戲出咗街反應咁大，薛家梗係有微言，
唔想佢再拍啲親熱戲都正常嘅。」工作人員說。

陳法拉跟老公薛世恆早前大方拍拖去睇林峯演唱會。

本來嘴對嘴的劇情，改為馬國明蜻蜓點水式輕吻陳法拉面珠。

上週一，歸心似箭的陳法拉拍完《女拳》，收工後即揸以 Neway登記的凌志跑車返屋企。

趕返屋企

據了解，拍攝這場戲前，陳法拉一直顯得心緒不寧，試過有日拍一場群戲，全世界到齊仍
未見她出現，直至半個鐘後，她才腫着眼喊住返片廠。
「大家都感覺到法拉嗰排心情唔好，所以佢喊住返嚟，大家都估佢同大少啱啱鬧完交，所
以當冇事繼續開工，其實佢都嫁咗人，梗係以家庭為主，唔通仲好似其他姐仔咁，同啲男
主角攬攬錫錫咩，況且 Neway大少係筍盤，遇到個咁好條件嘅男人，梗係唔可以行差踏錯
。」工作人員透露。

上週一（九月十三日），正在趕拍電視劇《女拳》的陳法拉，收工後即揸住由 Neway登記
的凌志跑車返屋企，當發現有記者追訪，即踩行油在窩打老道附近停車，之後更落車反影
記者，然後再開車返畢架山一號屋企。

「咪睇法拉啱啱上到一線，其實佢冇諗住同其他人鬥，唔同阿佘，佢知道個角色好有發揮
，遲遲收工都唔介意，法拉嘅心態就好唔同，佢成日都想快啲收工返屋企陪老公，間中都
會有怨言，結咗婚，睇得出佢已經冇以前咁 aggresive。」工作人員說。

陳法拉週一出席公開活動，表示因要開工，未必趕及跟薛家食飯慶中秋。

陳法拉在電視劇《有營煮婦》中一場晒 bra戲，大受抨擊，不過她表示並非賣弄性感，是
劇情所需。

陳法拉早前跟關心妍（右二）、欣宜（左二）以及新人吳若希（左一）加盟唱片公司《星
煥》，有指幕後老闆是薛世恆，不過遭她否認。

首次擔正第一女主角，陳法拉在《誘情轉駁》搏到盡，着 tube-top跳鋼管舞，跟惜身唔
肯嘴完全兩回事。

唔肯嘴

拖下手仔、鍚下嘴仔對演員黎講都算係小兒科濕濕碎，但每個人都有佢嘅禁忌同底線，有
啲藝人肯搏肯露肯跳肯打，幾辛苦都肯，偏偏就係未必肯錫。

鍾欣桐（阿嬌）
過往參演的電影，阿嬌都唔肯錫，感情戲份點到即止。去年復出拍《前度》，一反常態搏
到盡，不但與男主角陳偉霆（ William）鴛鴦浴，更獻出熒幕初吻。事後還稱因與同門師
弟 William太熟絡，故無尷尬，能輕鬆完成戲份。

謝婷婷
與安志杰愛得癡纏的婷婷，七月底為處女作《李小龍》開工，男友傍實監場。片中婷婷與
飾演李小龍的李治廷是一對，但當被問到會否獻出銀幕初吻時，她斷言拒絕，稱未有安排
，狠狠請李治廷吃一記檸檬。

謝霆鋒
與栢芝一家四口溫馨到痺的霆鋒，婚後拍電影的底線亦提高了。有傳在原先安排霆鋒《綫
人》中和桂綸鎂有一場激情戲，但愛妻號霆鋒因顧及太太感受而拒絕。問准太太後，才肯
與小鎂來個蜻蜓點水的一吻。而一向對嘴戲避忌的霆鋒更直言：「如果太太不批准就不拍
。」