哈哈鏡 麥長青
http://www.ihktv.com/ha-ha-jing-mai-chang-qing.html
入行以來，最愛就是跟有年資、有經歷的人做訪問，就像麥長青。
訪問相約下午三時正，2點45分我已到達又一城，正前往餐廳之際，手機傳
來了麥包（麥長青暱稱）的短訊：「我到了，笑。」
他竟然打破了我總是比藝人早到的紀錄，感覺不太爽。跟他回訊息即將到
達，他再傳來了：「唔急，慢慢（笑）」。麥包就是這樣的外剛內柔。
對朋友的，他可以千依百順，一個電話就將多年愛車借給兒時好友，變成遊
走中港兩地的中港車；對不是朋友的，他可以默不作聲不合則去，只要不要
挑戰他的底線。
訪問過後，傳出了他與馬浚偉不和。這已是舊聞一則，不值得我事後再補追
他的回應，況且在訪問中他已經說得很白了。
「對專業嘅對手，我就算唔比佢更加專業，都至少一樣咁專業，但對住唔專
業嘅，我咪行開囉，總之我一定做好我本份。我成日都話，我嚟電視城係打
份工嘅啫，總之你唔好挑戰我底線就ok。」
麥包說他算是世界朋友，仇家不多，十隻手指應該數得晒。
「拍劇已經好辛苦，所以對唔啱傾嘅人，我會選擇以後唔再合作，就算推劇
都冇所謂。」
麥包就是這樣的人，他就像一塊鏡，你如何對他，他就會如何「回應」你，
不過他是一塊哈哈鏡，是好與不好，他都會誇張數倍奉還。
認識麥包多年，一直十分欣賞他的生意頭腦，還有他的幽默。他談生意時可
以很認真，但他同樣可以狂講冷笑話，就像拍照期間不時與攝影師狂講爛
gag就幾乎笑到我「甩轆」，其實麥包也有搞笑的一面。
參考發哥
電視劇的吸引力，除了有叫觀眾追劇的熱誠外，還有叫人「一地眼鏡碎」的
魔力。就像麥包最近一連播出兩套劇，先有賀歲檔的《新抱喜雙逢》及緊接
的《守業者》，播出前兩套劇均被視為炮灰之作，卻想不到兩套劇的收視比
預期好得多，尤其是《新》就更加叫不少對「cam cam哋」的麥包另眼相
看。
「其實我入行一直都希望自己可以做諧星，我唔望自己可以做到周潤發、做
到劉德華，我只係想做盧海鵬，總之個個見到我就會笑。呢個真係兒時回
憶，細個屋企環境唔好，媽咪由朝做到晚冇時停，最開心就係夜晚睇《歡樂
今宵》，唔使錢又有得笑，所以我入行之後，最想就係入《EYT》，我想帶
到歡樂俾觀眾。
拍《新》都幾辛苦，因為時間唔係好夠，拍得幾密吓，不過就開心嘅。兩個
女主角阿滕（滕麗名）同盈盈（湯盈盈）真係冇得頂，每次都一定俾家燕姐
（薛家燕）拍先，拍晒家燕姐戲份可以俾佢走先，之後先到我哋班後生慢慢
拍，呢份敬老心真係要讚。其次就係可以拍呢類喜劇係好開心，但壓力原來
都唔細，因為戲入面我係cam cam哋但又唔係基，我好怕會俾人將我同蘇基
（古明華）比較，咁我可以點呢？最後我融入發哥好多年前一套賀歲片《八
星報喜》嘅角色，將個角色變得立體化，好彩觀眾都好接受。」
最愛角色
近日熱播的《守業者》收視不俗，加上再次傳出麥包與男主角馬浚偉鬧不
和，令劇集再次升溫。先說《守》入面的「大少」，麥包說這個角色可以說
是近二十年來電視史上最悲慘的角色，如果變成現實中的人物，就算不自殺
也要入精神病院。
「潘家顯呢個大少，可以話係呢廿年來電視史上最悲慘嘅角色，可惜今次條
主線唔係放喺佢身上，如果唔係一定有更大發揮。
成套劇32集分兩部分。第一部分就係講馬仔查到殺死康華嘅真兇，之後就到
我呢個大少，詳情唔講咁多，總之下半部我呢個大少接二連三咁受到重大打
擊，例如大少一直都為咗頭家出心出力，但最後發現自己原來喺老豆心目中
完全冇地位，之後又有同老婆葉翠翠嘅婚姻問題，連串打擊簡直就係要將呢
個人嘅人生價值全面扭曲……殘忍啲講，真係唔死都冇用，所以呢個角色真
係好好玩，係我最愛嘅三大角色之一，另外兩個就係《茶是故鄉濃》嘅「大
水牛」同《紫禁驚雷》嘅卓總管。」
對於曾經為他帶來了事業另一個巔峰的「非凡哥」，卻從來不是麥包的至
愛。
「梁非凡呢個角色都幾平面，因為佢只係得一個方向，就係搞風搞雨，佢唔
算係大奸大惡，但就好小人，係要搞到其他人好麻煩先安樂。呢個角色咁受
歡迎，唔係因為我演得特別好，而係因為『梁非凡』根本就係一個社會共
鳴，每個出社會工作嘅人，身邊好難會有一個拉登或者候賽因，但就一定有
一個甚至兩個、三個『梁非凡』呢種真小人，咁大家有共鳴咪覺得呢個角色
受歡迎囉。」
百忍成金
不熟悉麥包的人，總覺得他是一個「醒目仔」，在娛圈打滾多年，又曾經為
不少大商家賣「腦力」，但其實他仍然非常有火。面對客氣的人，他會更加
客氣，但面對住不可一世的人，他可以更加不可一世，因為他是一塊「哈哈
鏡」。
「好多人都以為我好滑頭，一定係見人講人話，見鬼講鬼話，但其實我唔
係，我有我自己態度。先講工作，我可以同好多人都好夾，但亦可以同唔啱
傾嘅人視而不見，我成日都話我返電視城係為咗開工，總之大家做好本份演
好一套劇就ok，我最怕就係啲人唔認真，因為你一個人唔認真，而搞到套劇
鬼五馬六，咁我捱咁多晚通宵為咩呢？我個人好簡單，你有禮貌我一定俾你
更加有禮貌，對住唔啱玩嘅，咪大家盡力做好啲，快快手拍完咪唔使再見面
囉。遇到咁嘅人，我會有訊號話俾佢聽我唔滿意佢，但我唔會當眾鬧嘅，拍
完咪自己行埋一邊囉，合作就冇下次喇。拍劇已經辛苦，仲要日日夜夜對住
自己唔鍾意嘅人，唔好玩啦……咁唔合作咪乜事都冇囉！
至於對住班大商家，我都一樣係咁態度，好似之前同一個商家食飯傾合作，
態度非常不可一世，我就一定唔會附和佢，佢寸我更加寸，佢問我點解俾錢
你賺都咁寸？我反問佢點解一見面就要擦佢鞋，佢都未有過一分一毫俾我賺
過，佢覺得我要擦佢鞋咩？唔好意思囉，我出面都有好多人擦緊我鞋。對住
呢種人就算合作，我都一定會賺佢多啲，因為我知道我一定會好辛苦。錢係
要賺要搵，但有時都要自己去格一格！」
緊記於心
麥包是「最佳男配角」，但人工卻不是「最佳」，因此他很多年前已經出賣
自己的「腦力」為不少富商出謀獻策，他曾經有過為客戶大賺十多億的驕人
紀錄。只是「商場如戰場」，面對小市民心目中的商場大鱷，麥包有自己的
心得，亦從中學到了不少。
「我曾經有一個從商朋友，成日叫我上去深圳打高爾夫，或者出海嘆紅酒，
我邊有時間同錢去享受呢種生活呢？所以最後都係做唔成好朋友。但另外一
個就唔同，佢同我講好想同我做好朋友，但大家一定要做咗拍檔先，因為佢
知道我冇可能同佢過日日打golf飲紅酒嘅日子，所以佢要同我做拍檔齊齊搵
錢，到我有一日儲夠彈藥，咪可以同佢一齊打波上船出海飲紅酒囉。
又試過有一個國內大老闆，搵我合作為咗減我三千蚊，佢專登叫我出去食
飯，餐飯最後食咗二萬八，就係為咗要減我三千蚊，我發晒脾氣咁鬧佢，佢
就平心靜氣同我講，呢兩條數唔可以拉埋一齊講。佢話呢餐飯佢點都會食，
佢一個月淨係食飯都預咗八十萬，呢餐飯唔同我食咩？佢都會同其他人食，
條數就已經預咗，冇得計。但佢減我三千蚊呢，就係佢公司慳咗三千蚊，所
以唔可以同餐飯拉埋一齊講，我諗諗吓又覺得好有道理，又上多一堂，所以
我好珍惜同呢班商家飯局，真係學到好多嘢。」
眼火爆
麥包可以很開心很愉快地與你談天說地，只要話題沒有接觸到他的神經點。
就像說到現今的年青新一代，麥包就自言眼火爆。
「依家啲後生，唔肯捱唔肯學，淨係識得take唔識得give。就好似我好多年
前已經話歐洲一定有危機，事緣好多年前去歐洲拍外景，成條街好多外表斯
文嘅後生仔，等埋位有個幕後企埋一邊食煙，有個後生仔問佢可唔可以請佢
食一枝煙，幕後一話ok，四方八面即時湧班後生仔過嚟問要煙；又試過一次
去酒吧飲酒，情況一模一樣，咁我就其中一個後生仔吹水，佢話我知大學最
後一課，係教佢哋如何不用工作去享受國家福利，我問你死未？依家香港咪
好似當年歐洲咁囉！個個淨係識得問政府拎，大家有冇諗過政府幾千億儲
備，係以往好多代香港人努力工作去儲返嚟，你班人唔願做只想拎，幾多千
億都冇用啦！」