江欣燕張慧儀女人心底話

http://bbs.ent.163.com/bbs/tvb/403343061.html

    集合江欣燕(欣欣)、張慧儀、李若彤、李麗珍、袁潔瑩、陳慧珊及葉蘊儀7
    位90年代女神出山，合演的TVB新劇《女人俱樂部》，由籌備開拍到拍完7個
    女人一直屢傳不和，欣欣與慧儀日前雙雙為劇集接受專訪宣傳，對不和傳聞
    兩女異口同聲表示大家都是有經歷的女人，再不是後生女，根本懶得去凡事
    計較眼紅別人苦了自己，再加上同場做訪問已是最佳證明，皆因如果有心
    病，又如何展露歡顏坐埋一齊？

    欣欣表示今次角色造型非常醜，希望觀眾看罷不要投訴：「我個角色有啲精
    神病又窮，冇錢去染白頭髮又唔化妝，所以造型要染白啲頭髮，着啲衫又停
    留喺細路女階段，所以都好肉酸！戲中我仲因為間跳舞室被人搶咗咁就精神
    崩潰去跳樓，入埋精神病院，我為咗角色增肥，就住演技都冇去理自己個
    樣。」

    而慧儀的角色造型亦不比欣欣好好多：「我起初係一個好多年冇拍拖嘅中
    女，為咗照顧阿媽冇做嘢，好不修邊幅，但後尾遇到陸永撻着姊弟戀我就脫
    胎換骨，變番一個時代女性。其實開始都要克服心理關口，你知上鏡依家高
    清，十年冇出嚟一返出嚟搞到咁？但我又心諗做戲，會出嚟宣傳觀眾咪可以
    睇到我真人唔係咁囉，所以我今次絕對係為藝術犧牲。」

    拍拖年紀不是問題

    問到慧儀現實中可接受姊弟戀？她說：「我03年離開香港去內地做生意，到
    依家都冇正正式式拍拖，如果遇到啱年紀絕對唔係問題，最緊要係思維成熟
    溝通到，價值觀接近，同埋接唔接受到我養子，始終一個家庭有個男性對個
    仔會齊全。」

    至於劇中最難忘的場面，欣欣坦言是與李麗珍(珍妹)一場跳樓戲，她說：
    「原本珍妹因為以前拍戲斷過威也怕咗想用替身，但我同佢講既然有恐懼就
    要去面對去克服，珍妹最後都聽我講，同我一齊由兩、三層樓高跳咗落
    嚟！」

    慧儀則笑說：「我最難忘係不停要跳舞，你知我做生意湊仔之後早睡早起，
    但拍劇就半夜好眼瞓都仲要開工跳舞，好彩我哋成班女人成日整嘢食返嚟一
    齊食，好似搞大食會咁，就係靠啲食物支撐住我！」

    私底下愛看書減壓

    與欣欣談到與前夫吳積遜12年婚姻玩完離婚後，可曾和戲中角色一樣精神崩
    潰過？欣欣坦言道：「我係唔會做傻事，因為做一個重大決定之前，係咪應
    該諗清諗楚先去做呢？所以我完全冇去諗呢啲嘢，啋！拍嗰陣李若彤仲話我
    係成班女人當中最幸福係我，後尾先知我原來離咗婚，佢都呆一呆，好好
    笑！」續問到欣欣遇到問題如何紓緩壓力？欣欣笑言不要以為經常見她被拍
    得夜蒲，其實私下最愛看書減壓：「我會睇一啲靈性嘅書籍，會Forgive自
    己，傷心一定會有，但一段時間就要畀自己Recover。我冇因為之前段婚姻
    而嚇怕咗，樣唔使靚，我靚咪得囉，年紀亦唔係問題，但唔好要我湊佢囉，
    最重要係珍惜我。」

    午飯時成班飲紅酒

    此外，劇集開拍期間欣欣、慧儀與其他對手李若彤、珍妹、陳慧珊及葉蘊儀
    等屢傳不和爭戲份，對此，欣欣笑說：「開拍之前都冇諗咁多女仔一齊喎，
    梳頭化妝點分人手，會唔會爭？但我哋完全冇計較，我更加唔會爭啦，我個
    角色都唔使梳頭化妝﹗開拍之前曾志偉又成日舉辦好多聚會畀我哋交流，因
    為戲中我哋成班女仔係識咗廿幾年，想我哋熟落啲先開拍，好記得其中一餐
    係下午飯，我哋成班就開紅酒飲！」

    張慧儀亦異口同聲否認說：「我哋完全冇撬拗，大家都成熟有經歷又唔係後
    生女，反而因為今次合作收到一段友誼，03年離開我真係冇諗過會再拍劇，
    係緣份令我哋聚埋一齊，我哋亦冇拍完套劇就散，Keep住個幾月就會食一次
    飯大家聚一聚。