李添勝力讚 大茄升呢做主角

2011/02/07 忽然一週810期

喺《我們的浪漫故事》入面，楊證華係公司 I.T部主管，同飾演文員嘅日伽有一個浪漫雨
中邂逅。

TVB新劇《你們我們他們》，係改編幾米嘅同名作品，監製何小慧起用一班新丁，當中有
林欣彤、羅孝勇、何雁詩等巨聲幫，亦有落選港姐及新晉歌手等，佢哋會分別喺十個故事
一集完嘅單元裏面孭飛做主角。

不過講到最引人注目嘅，必定係喺《義海豪情》入面飾演宮崎隊長嘅楊證華、以及梁老師
嘅日伽呢兩塊綠葉。因為添哥一句：「佢哋掂！」於是得以齊齊升呢做主角。添哥睇人未
失過手，今次希望呢兩位仁兄仁姐可以保得住添哥副眼鏡嘞。

你唔好同我講話唔知幾米係邊個？佢啲繪本作品喺香港都不知幾 hit，電影都改編過幾套
，有楊千嬅同梁朝偉嘅《地下鐵》、梁詠琪同金城武嘅《向左走向右走》等。今次 TVB將
佢嘅《你們我們他們》改編為十段情感細膩嘅愛情故事，仲特意安排喺 2月份播映，以迎
接二月十四日嘅浪漫情人節。

十個單元裏面，最受矚目嘅，唔係天之驕女林欣彤，反而係由楊證華同日伽孭飛嘅《我們
的浪漫故事》。講真，就算佢兩個喺《義海》做得幾出色都好，如果唔係得添哥公開力讚
，睇怕到依家認得清佢哋眼耳口鼻嘅，十隻手指都數得晒呀。

就講楊證華，佢 98年已入無綫，但低調到暈、零新聞、零緋聞（只係 05年俾人影到陪鍾
嘉欣行街買手袋，但因為太奀而無人有興趣跟進）。所以十幾年嚟，一直寂寂無聞。做嚟
做去都係大茄一隻。

而日伽（原名傅韻如）係 06年落選港姐，跟住入咗無綫，第一個節目就係許冠文《一擲
千金》嘅千金小姐。可惜吖，節目入邊有 26個千金小姐咁多，鬼有人對佢有印象咩。

今次《你》嘅監製何小慧因為添哥一句話，特意安排兩人以主角身分演出其中一個單元。
雖然只係半粒鐘，不過表現好嘅話，隨時有機會跑出 o架。之前已有黃浩然、麥包等大大
個人辦戙喺度啦。懷挺（即係 fighting）呀！

楊證華同日伽喺《義海》入面，楊證華係日本軍官宮崎隊長；而日伽（上圖左）則係幫九
姑娘作日語翻譯嘅梁老師。

52歲嘅幾米，以畫筆描繪夢想，尤其擅長描繪男女之間淡淡情懷。台灣女生幾乎人手一本
其繪本。

以伯樂形容李添勝，相信並不為過。佢開口話得嘅，都有番咁上下。

第一集 不捨不棄
林欣彤、曾少宗、糖兄妹

阿君（林欣彤）同阿軍（曾少宗）來自唔同城市，兩個喺台北都屬於過客，而小韻（糖妹
）刻意安排兩人認識，但遇唔到就唔遇到，所以阿君同阿軍都唔認為錯過啲乜嘢。但最後
，喺一個天朗氣清嘅下午，喺一個好靚嘅花田度，佢兩個竟然遇上咗。雖然兩個都唔捨得
眼前嘅美景，但都知道如果唔繼續前行，將來會錯過更多「美景」。

第二集 一個人的快樂聖誕
莊思明、周天保，林淑敏

Emily（莊思明）喺事業上係女強人，連感情生活都係自主，處事作風獨來獨往，人與人
之間永遠保持一段距離。雖然惹嚟閒言，但 Emily依然自我性格。直至一個聖誕節，因為
一棵聖誕樹，令佢開始調整自己融入節日氣氛中。

第三集 兩顆不變的心
何雁詩、章宇昂、陳偉洪

Eric（章宇昂）跟 Sue係同學，兩個每日都會到圖書館溫習，佢哋嘅朋友 Abby（何雁詩
）認定佢兩個鍾意對方，於是費盡苦心去撮合。因為 AbbY關係，兩個逼住要喺友情同愛
情之間作抉擇。最後亦證明咗，男女之間都可以有真正嘅友誼，不過背後真相，卻令
 Abby感到意外。

第四集 一程車的春天
黎諾懿、陳爽、張穎康

慧（陳爽）同謙（黎諾懿）相愛多年，漸變成老夫老妻，激情不再。本來兩個講好咗唔要
細路，但當踏入人生另一階段， 30歲嘅慧改變主意，因為咁而令兩人關係變差。慧喺一
程車嘅時間，竟被一個陌生人唔經意嘅動作而有所決定。

第五集 結婚密語
李文煊、王浩信、李善恆
Grace（李文煊）同 Gray（王浩信）快將結婚，婚禮前， Grace突然有咗 Jack（李善恆
）嘅消息， Jack竟係自己新居嘅室內設計師，其中嘅設計有着當年 Grace同 Jack共同夢
想過嘅影子。雖然 Jack曾經傷過 Grace嘅心，但 Grace仍為 Jack而對婚禮猶豫。

其餘嘅有：
第六集 我們的浪漫故事
楊證華、日伽、陳美詩

第七集 愛情轉移
莊思明

第八集 白日綺夢
許鋋鏗、吳業坤、湯寶珍

第九集 我願意
羅孝勇、彭慧中、關伊彤

第十集 當舊毛衣遇上舊圍巾
王宗堯、趙希洛、周家蔚