陳展鵬 變節後遺症

2011/07/21  壹周刊1115期

有一段時期，煎 pan去 function無人搵他做訪問，「當時真係好慘。」

無綫劇集《真相》紅了陳展鵬，他在劇中演斯文大狀，有腦有情入晒屋，成功俘虜妹及師
奶，前者以為他是新人，後者一睇就認得他做過亞視人，只是說不出名字。
曾是香港乒乓球代表隊但中途變節的他，轉投娛圈霉足十七年但仍企硬唔走，終於捱到有
出頭天，但事業的折騰已令他有點戰戰兢兢，即使有傳媒爭約做訪問，同事睇好他在台慶
攞獎，但陳展鵬回想當日被人奚落，猶有餘悸，「行出來無人影，完全當你隱形， hard
feeling令你死好多細胞。」

反覆

○四年介紹台灣溫泉之旅時，他露半股瞓身「體驗」。

在鏡頭前的陳展鵬，一臉唧也不笑，他解釋說：「成日扮呢個扮嗰個，變咗少少藝術家。
」影完相，他收起酷爆表情，展現笑容，還客氣得叫記者稱佢做展鵬或煎 pan，即使放假
，他亦不介意用來做訪問，全情投入工作。

《真相》收得，同事估他今年可能在萬千星輝頒獎禮上獲獎，他淡然說無諗過拿獎項。「
在香港男主角一定要演正路角色，有獎攞反而局限你演某些角色。」攞了獎，在《真相》
中著泳褲露胸肌的鏡頭一定 no way。他最激一次是，主持亞視的旅遊特輯時露股罅全裸
浸溫泉，「我做旅遊節目唔想用好主持嘅形式去表達，我用第一身去體驗個感覺，點會圍
晒毛巾。」

《真相》中陳展鵬與黃浩然（左）和楊怡（中）一齊孭重飛。

展鵬好抵得諗，事實上亦不輪到他太挑剔，因為他開始入行不順利，既然決心再返娛圈，
就要蝕底少少搏大回報。

他九四年十七歲入無綫訓練班，九六年一次唱 K遇到 Blue Jeans的蘇德華，蘇覺得他唱
歌有天分，引薦他簽了寶麗金，出過《快快》、《迷你》、《拉拉扯扯》和《天性如此》
四首歌，更跟過劉德華、學友和黎明一齊宣傳，一度被喻為陳曉東接班人，少年版劉德華
，作為新人怎會不輕飄飄！「十幾廿個記者不斷影相，當時廿歲個樣已經好 chok。」但
寶麗金變身環球唱片，陳展鵬未出大碟已被放棄。

傳無綫新劇《 ATF》由陳展鵬擔大旗，吳卓羲因戲分也不夠他多而不和。

無公司做後台，人人當他透明，「好似 ?掣三百六十度變晒，行出來無人影， hard
feeling令你死好多細胞，一定會唔開心，有段時間係驚出席 function。」

他之後拍過電影、電視劇，甚至落地盤學做裝修工程，最後踩釘，隻腳腫了才停，事業上
就這樣浮浮沉沉了三至四年。

「當時個人好虛唔實在，只係母親生我個外形樣貌都 OK，可以在這行生存，但無方向目
標。」普通人晨早走人，陳展鵬卻死心不息堅持在這行發展，○二年他入了亞視。

無 say no

不死心，相信和他是乒乓球運動員有關。他十三歲開始在香港體育學院接受乒乓球訓練，
訓練了五、六年，曾是香港乒乓球代表隊。不過他覺得離開球隊的決定是錯，所以今次他
不會貿然離開娛樂圈，「當時高層有變化令教練也提早退休，我都幾憤世疾俗，咁就同教
練講我唔打，過咗五、六年後，見住師弟攞香港冠軍，個個做教練搵可觀數字，有埋自己
波樓，就問自己點解嗰一刻放棄，點解唔堅持，太過感情用事。」

所以今次他點都要返電視台重新開始，不討好的反派角色他也嘗試，「入到電視台?一份
糧，乜都唔好諗耷低頭就學，十個有十個角色都反派時，唔多唔少有反感，但我唔會再諗
，否則投入唔到去演。」

父母替他改名展鵬，他說：「佢哋希望我出人頭地，我都希望做到佢哋期望。」

陳展鵬沒因紅而驕，「中了 jackpot是一種幸運，但自己不會唔同咗。」

擦鞋上位

○八年他再返無綫，等了三年，卅四歲的他終於憑《真相》彈出，算不算苦盡甘來？「我
唔覺，身邊有好多朋友在這個圈，都係默默耕耘。」

當年紅不到，現在成功跑出，有說他上至監製下至 PA都照冧，經常上七樓製作部搵監製
擦鞋，又請幕後飲茶，勁有禮貌識做人。「我無專登擦鞋，只係細個 daddy教我要有禮貌
，唔叫人會打，慢慢習慣咗呢樣嘢。我格言是長輩要尊敬，同輩要尊重，後生過自己要多
溝通，我哋也可以在八、九十後學到好多嘢。擦唔擦鞋？有冇上七樓？我一個月都唔知上
唔上到兩三次，一個人對上中下都係咁，會唔會佢本身性格都係咁？」

不過大家最關心他是否為上位與吳卓羲反面不和？他圓滑地說：「唔係，我哋日日開工食
飯。無緋聞證明你個人無知名度，有緋聞係開心，但希望唔好愈描愈黑傷害其他人。」

九八年寶麗金年代，陳展鵬與仲未做千億新抱嘅徐子淇一齊拍《天性如此》 KTV。

身為港隊代表的他，曾獲取無數乒乓球獎項。

小時候的陳展鵬穿西裝學人擺甫士。

他的前女友有前亞姐冠軍姚佳雯，「我依家無拍拖。」

撰文：李苑欣
攝影：葉志明
化妝： Chris Lam
髮型： Ringo Cheung@Nova
服裝、場地提供： HARVEY NICHOLS