生剝陳展鵬

2011/07/25  忽然一週834

Mami! Help!（設計對白）

人紅咗，成個世界都變晒 o架！陳展鵬以前做開大配角靠邊站，怕且做埋「十字懸垂」都
搵鬼理，但一做主角企番中間少少咋！立即「人見人愛」。

就前幾日，大班《真相》嘅演員出席宣傳活動， TVB特登安排佢同阮兆祥扮平等女神，本
來已經攞晒彩。不過，近排陳生上緊位，一班演員梗知「碇」，個個自動波行埋去整蠱造
怪，幫佢解衫鈕，又插劍入胸，最後仲狼到夾手夾腳「生剝」陳生，搞到佢兩點失守，嚇
到差啲想 call police！

無嘢嘅，娛樂圈就係咁現實 o架嘞。正如傳聞被陳生搶戲嘅黃浩然話：「套劇得，證明係
大家好，大家都開心，佢係得就由佢去做！」係咯，最緊要班演員有工開有錢搵，媽咪姐
又有劇追有演技睇，唔使吓吓捱 chok樣啫！

馬國明開光
有份客串四集嘅馬國明，帶頭幫陳展鵬解衫鈕，要同「平等女神」睇齊。

楊怡賜劍
楊怡笑淫淫，插劍入胸，而左面有隻穿黑色褸嘅怪手，突襲陳生，令佢再失一粒鈕！唐詩
詠，好手勢喎。

黃浩然拉右
黃浩然一手扯開陳生件恤衫，右點即露。咦？仲有隻手喎！「新舞王」黎諾懿（穿灰色西
裝褸）都係時候要出下鏡嘞。

馬海倫揭左
勁呀！連劇中做陳展鵬阿媽嘅海倫姨都出埋手，再加上喺後面再次攝位突襲嘅唐詩詠，左
點亦正式宣告「淪陷」。嗯……要嗌唔好啦，下次。

又真係幾似樣喎！（設計對白）
唔講唔覺，睇相先覺。陳展鵬同黃浩然戴晒眼鏡，無論面形、尖鼻同笑容都咁一致，嗰兩
條笑紋仲差唔多一樣位?！呢個角度，直情有啲兄弟 feel啦。

黃浩然話同陳展鵬一齊喺亞視捱過，又齊齊跟冼灝英師傅學武，合作好有默契。呢刻，媽
咪姐信 o架！你睇，佢哋喺台上密密斟，仲一個箍頸一個起腳，「打壓」楊怡（下圖），
你試下叫霆鋒同 Edison同台吖。