一姐風範 監製上身 陳法拉唔畀謝天華摸腳

2011/05/04 Face周刊 206期

劇情講謝天華要幫法拉捽腳，天華仲問導演：「使唔使除鞋？」法拉即搶答：「捽對
 boot咪得啦！」天華之後仲問導演：「真係？」

自從阿佘唔再做無綫親生女，無綫一姐位懸空，要爭做一姐就有新 4大花旦陳法拉、楊怡
、徐子珊同鍾嘉欣。一姐誰屬仲未知，不過論一姐風範法拉先跑出，上週三（ 27日）為
《潛行狙擊》拍外景，先潔癖上身狂抹欄杆消毒！又唔准對手謝天華摸腳。做咗薛家大嫂
又係準無綫一姐係唔同啲。

佘詩曼北上搵人仔，令無綫一姐位懸空，吉位多人爭， 29歲陳法拉上年攞咗「我的最愛
電視女配角」，今年拍住 Laughing Gor謝天華，拍台慶劇《潛行狙擊》，論勢頭絕對贏
其餘三位姐仔。

潔癖法拉

法拉雖然未坐正一姐位，不過探班當日就已經監製上身，上週三（ 27日）喺觀塘碼頭為
《潛行狙擊》拍外景，劇情講述法拉扮妓女查案被識破，之後被謝天華救出到碼頭，雖然
法拉做卧底妓女，但造型一啲都唔性感，比起之前喺《誘情轉駁》着 tube top、迷你裙
跳鋼管舞造型遜色好多。

錫身唔只造型，由於法拉要坐喺碼頭石躉及挨喺欄杆做戲，潔癖法拉先用消毒紙巾抹乾淨
先肯埋位，之後劇情講述謝天華幫法拉按摩小腿，試戲時，謝天華笑住問導演：「使唔使
除鞋呀？」法拉即搶答：「捽對 boot咪得囉！」擺明唔益謝天華摸靚腳。

早前法拉去銀行櫃員機撳錢，竟然大懵唔記得攞錢，唔見咗幾千蚊，不過佢經理人 Cindy
話：「法拉知可以報警追番，不過佢日日開工，根本冇時間追究。」幾千蚊對無綫一姐係
碎銀嚟啫！

換鞋 show
大熱天時着住對長靴焗腳唔舒服，當鏡頭影唔到下半身時，法拉即換上波鞋，唔會辛苦自
己。

貴晒
法拉知道要挨住欄杆拍文戲，即刻問現場化妝師攞消毒紙巾清潔。

有潔癖
法拉抹完之後，順手將紙巾遞畀工作人員，幾有阿姐風範。

打 Laughing Gor
最後導演改為拍吓膊頭就算，其實呢場戲法拉只係挨住條欄杆做戲，做之前要搵消毒紙巾
抹，有冇咁怕污糟呀？

改劇情
劇情講法拉要作狀打一下謝天華作呢場戲結尾，法拉就提議呢個押犯姿勢話：「不如我咁
樣捉住佢啦！」謝天華即反抗話：「唔使咁呀？」

法拉一直靠搏上位，每次拍劇都有唔少性感場面， 09年拍攝《有營煮婦》，對住鏡頭換
衫露 bra，引來網友瘋狂 cap圖。

正式坐正

陳法拉今次喺《潛行追搫》擔正，飾演女差婆，唔只要打、追賊，仲要扮妓女做臥底，雖
然套劇有徐子珊份，但論戲分就及不上法拉。新劇孭飛，喺薛家地位亦明朗化，前週復活
節同老公及老爺奶奶同車入畢架山，諸葛公主要努力喇！

《潛行狙擊》早前為上海電視節拍預告片，除咗兩位男主角謝天華、黃宗澤外，就只得陳
法拉，反而徐子珊就冇影。

復活節同奶奶薛老太同車返屋企，法拉喺薛家終於坐正！

採訪、撰文：林通賢
攝影：林通賢、周凱瑩