大佬上身 點導演 阻收工 謝天華乞人憎

2011/05/30 壹周刊1107期

每拍完一個鏡頭，謝天華都會要求睇 playback，仲揸 fit嗌 NG，導演都要聽佢點。

自從憑Laughing哥角色意外彈起，謝天華終於推到上一線，除咗擔正拍電影《Laughing
Gor之變節》，新作仲有《潛行狙擊》，今次唔使再做臥底，堂堂正正做番警察。

為保 Laughing哥金漆招牌，謝天華不容有失，上至導演擺位，下至武術指導通通都要管
，當正自己係一哥，早前《潛》劇在新蒲崗街頭拍攝群毆戲，因為謝一哥要求多多，天黑
拍到天光六點先有得收工，搞到台前幕後怨聲四起！

到場監工

台慶劇《潛行狙擊》早前在新蒲崗工廠大廈進行拍攝。晚飯後，劇組移師到街上拍雨中群
毆場面。演員未使埋位，唯獨男主角謝天華專登早到場監督幕後人員 set機開壇，點知現
場無人理佢，無癮謝天華唯有行入後巷，「煲煙」傾電話。

由於無綫同臨時演員仲介公司就工資問題未達成共識，臨記全面「罷工」，當晚「劈友」
重任，落在一班近乎零經驗的藝訓班學員同港男身上。

謝天華拍完第一 take，自己話事要停機，之後孖住對手「密密斟」，研究走位同動作，
接住拍第二 take，又話要睇 playback，如是者 NG六、七次，由男主角嗌「 good take
」收貨，導演都無權話事。「無計啦！人哋係男主角，撞啱個導演又新，俾人拋兩句就揸
唔定主意，梗俾人點啦！」一名幕後工作人員說。

意外憑 Laughing哥彈出，無綫請來三大影帝吳鎮宇、曾志偉、黃秋生拱照謝天華，拍攝
電影《 Laughing Gor之變節》。

同幕後無兩句，謝天華於是閃埋後巷煲煙、傾電話。

四十出頭的謝天華，埋位前做定熱身拉筋，預防受傷。


萬歲降火

當導演無到，謝天華之後同黃宗澤拍群毆戲，對武術指導預先安排好的動作，亦諸多意見
，要求配合 Laughing哥又 chok又有型的風格。終於這幕「劈友」戲，未夠十二點開機，
凌晨六時才收工，「謝天華又話咁又話咁，好在個武指冇脾氣，盡量配合，唔係分分鐘炒
大鑊，天光都拍唔晒！」一名幕後工作人員說。

謝天華扮一哥搞到收工有遲無早，令劇組怨聲四起，人人暗地裡叫他做「謝監製」，證明
人緣有幾差。相反，同劇另一男主角黃宗澤識做人得多，眼見成晚打到冇停手，未夠兩點
已經主動嗌「萬歲」，請台前幕後飲嘢消暑兼消消氣。

謝天華吓吓要 chok樣示人，拍得唔靚仔的話，唔俾導演收貨。

打足六個鐘，仲要淋雨，難怪人人怨聲四起。

手腳無眼，打鬥場口碰撞少不免，黃宗澤見藝訓班師弟「中招」，馬上上前安慰。

天時暑熱，加上俾謝天華拖累無得收工，黃宗澤於是「萬歲」請飲嘢，安撫所有人。