黃宗澤徐子珊 吻極忘形     2011/09/11 東方日報

當年發哥與DoDo姐在《網中人》咀足三分鐘，成為嘴部運動經典場口。事隔32年，黃宗澤
（Bosco）與徐子珊模仿前輩，還幾何級數地把「激咀」運動發陽光大，集集咀到抽筋。
至於對方是否好咀？真係啞子吃黃連，有苦就……

記：記者　澤：黃宗澤　珊：徐子珊

無情－唔夠舒服遭嫌棄

記：咀到抽筋未？
澤：你抽筋未呀？
珊：OK！哈哈！

記：好咀？
澤：佢實話唔好咀！
珊：唔好，真係唔太好！又污糟、又拮、又有煙味。
　　佢喺劇裏面個角色成日食煙，真係好臭，好大異味！

澤：我食大蒜咩？
珊：我真係唔鍾意有鬚囉，好唔舒服呀！

記：子珊，點先好咀呀？面嗰「浸」唔好咀，可能入面嗰「浸」好正呢？
澤：講笑咩？冇去到入面咁深㗎！
珊：係呀，我哋好堅守電視尺度。

記：咁子珊好唔好咀？
澤：佢出名有一雙朱唇，出名係「麒麟嘴」，一個字「掂」！

珊：你乜意思呀？
澤：（口窒窒）即係出名個唇係夠厚嘛！唔係咩？
珊：（瞠目結舌）冇咁嘅事！
澤：其實真係幾OK！

動情－投入角色錫得爽

記：咁多女星最好咀係邊個？
澤：一定係小儀，小儀個唇就真係厚喇，不過都係個人感覺啫！

記：唔好落子珊面喎，佢係唔係頭三位最好咀？
澤：都係嘅，佢係頭三位。

記：同胡杏兒一樣咁好咀？
澤：Er……差唔多啫！
珊：我哋個個同杏兒都冇得比囉！

記：拍咀戲其實抗唔抗拒呢？
珊：我哋接個角色一早就知道，接得我哋就一定要接受個角色，劇情需要我哋咁做就做，
　　我覺得如果係個角色需要，我就會做囉，都OK嘅！
澤：係呀，我哋一埋位就冇諗咁多。

溫情－贏口碑勝過攞獎

記：你兩位覺得會唔會因為呢套劇而攞獎？
澤：子珊攞梗獎，我話嘅！
珊：係呀，咪就係攞你嗰個最好咀三甲囉！

澤：依家講真，獎對我嚟講真係冇乜嘢，我又唔Care，當然你話頒畀我梗係開心啦！
記：坊間甚至有人話你演得好過天華？

澤：託賴！我覺得真係各有各嘅好。唔知呀！不嬲都覺得攞獎唔係一件咁嘅事，可能真係
　　個角色好受歡迎，我寧願自己畀人讚，套劇出嚟嘅口碑好好囉！
　　讚我做得好、有進步，會仲開心過你畀個獎我。

記：你覺得子珊呢？

澤：子珊真係做得好放，我同佢Part住做戲真係好舒服，因為佢性格好爽，點都冇所謂，
　　唔會成日掛住自己係一個靚女，係一個港姐冠軍……
　　佢係冇呢啲嘢，做戲就係做戲，佢係一個冇包袱喺身嘅人，所以我覺得同佢Part真係
　　幾舒服。
　　我仲睇到佢不斷進步，愈做愈自然，拍每一個場口都會Feel到佢有諗法。
　　一句到尾，我力撐徐子珊攞獎！

記：子珊覺得Bosco又點？

珊：我同Bosco都識咗一段時間，我都覺得有人認同比獎更加緊要。
　　記得開工第一日，大家都話想做到啲新嘅嘢出嚟，反而係我哋呢個組合係做到啲新嘢
　　畀大家，如果有一個獎係最佳進步情侶，我覺得好有機囉！
　　我哋真係擺好多心機落呢對角色身上。

澤：係，就算好多人放咗個焦點喺咀戲上，但細心去睇，其實開頭嘅咀到中間嘅咀，再到
　　後尾嘅咀係有分別。

激情－愛恨交纏相當掯

珊：呢條感情線係用好多心機去Build Up，Bosco講話我哋演得放，係需要囉，Bosco係一
　　個Good Partner，每年咪有新獎嘅，可唔可以加設一個新獎鼓勵吓佢。

記：天華同法拉始終係《潛行狙擊》最主要一Pair，你哋會唔會好有壓力？

澤：我哋兩條線都分得好開，一早開拍前已經講佢哋要係傳統啲，我同子珊係要特別啲。

珊：我哋係要創新啲，以往劇集好少好似我哋咁激烈，又愛又恨咁激動嘅愛情。

澤：同埋我哋嘅對白係「掯」啲，會講「我去叫雞」、「心情唔好我M到」嘅對白。

珊：係呀，我哋又會好用力摑對方，真係跳出電視框框。


Bosco和子珊這對螢幕情侶，不僅咀得火辣，言辭更加辛辣！


後記：有鬚唔多So

唔過電、唔拍戲，其實真係好難咀。訪問當日，攝影師要求Bosco咀子珊，原本二人一口
答應，正當萬事俱備，只欠一吻，子珊突然說：「都係唔好喇！」，「點解？」，「佢又
生鬚喇！」全場即時Dead Air，要隨時隨地咀Bosco，電視城，甚至世間可能只得一個「
佢」。