俠客行　姜大衛

忽然一周第754期http://bbs.ent.163.com/bbs/tvb/162397870.html

姜大衛的少年照，很酷。
梁家輝的氣質，甄子丹的身手，謝霆鋒的眼神，我還以為自己在看《十月圍城》。
「唔知點解，一戴起頭套，就似大俠。」
姜大衛擅演大俠，擅演到可以把大俠分門別類。
「有種叫『遊俠』，即係楚留香嗰種，鍾意諸事八卦乜都理；我呢種，叫『浪子型大俠』
，我行我素，通常唔理人。」
姜大衛骨子裏，最渴望成為浪子，輕狂不覊，橫眉冷對……
「可惜我係個會結婚嘅浪子呢！」語氣中有一分遺憾。
結婚三十五年，子女三名，外孫一名，早已過了懷緬過去常陶醉的時候了。
「所以，我依家會搞瘋狂喜劇。」
俠客放下身段為廣大觀眾謀福利，這才是真正「人人為我，我為人人」。

孫仔好黐我

「我呀，一身兒女債，半世老婆奴！」
姜大衛一生都想做浪子，但只浪子了廿七年。他今年六十二歲，結婚三十五年。剛過去的
元旦日，外孫滿兩歲。
「好開心，真係好開心。個孫仔特別黐我，每次同佢講電話，佢??呀呀，講極都唔願收線
。佢知我係邊個，完全明我講乜！梗係啦，我乜都俾佢食。」
教子要嚴，乃是父母責任；但湊孫呢，則可稍為放縱，那是祖父母的專利。
「我抱住佢，十分鐘就剪好個髮，乖到不得了。想佢擰邊邊，餵啖可樂就得啦！」
過年過節，他夠膽死餵孫仔飲紅酒。
「用枝飲管滴兩滴俾佢，佢試完又想要。佢媽咪（大女兒姜依蘭）鬧死！嘻嘻！」
說起外孫，總有滔滔不絕的話題，他笑得眼睛咪成一線。
「對女婿（曹永廉）無意見，個女鍾意就得。」
這個外公，作風一向豪邁。○七年姜依蘭未婚懷孕，記者煞有介事跑去問他意見，他面不
紅氣不喘地力撐愛女：「個女有 BB我一早知，之前怕 BB小器先唔講。我自己當年都係奉
女成婚，無問題喎！」

我都玩 facebook

大女兒轉眼已有自己家庭，二女兒依文也在香港工作，姜大衛平日弄孫為樂之餘，最記掛
小兒子卓文。畢竟，他才十四歲。
「呢個仔，今時今日仲好牽掛。朝早知唔知醒起身返學？放學後有無返屋企？功課追唔追
得上……我唔會成日開聲話佢，但一定會暗地裏睇實。」
李琳琳四十六歲意外懷孕，本想不要這個兒子，但想到懷孕前曾夢到觀音送子給她，便冒
險把兒子生下來。姜大衛洋名 John，兒子也叫 John，通常暱稱 John John。兩夫妻老來
得子，自然特別上心。
「佢正值反叛之齡，但好彩，比較細膽。佢個樣似我，性格就似媽咪，鍾意笑，又多嘢講
。」
父子年齡相差接近五十年，他只好飾演嚴父，都說教仔要嚴。
「兩夫妻教仔通常有黑臉白臉，我當然做黑臉那個。我一板起塊面，個仔已識驚。」
話雖如此，他也有為兒子趕潮流，例如學玩 facebook。
「我開咗個account，個仔 add咗我。絕對唔係想監視佢識乜朋友，只係想知佢諗緊乜。」
六十二歲玩 facebook，果真用心良苦。
「我又唔識打機，想同個仔溝通得好啲，惟有係咁。」

夫妻一定要相處

戲裏戲外，姜大衛都是位巴不得爸爸。現實中他更精采，一早已覓得真愛。他和李琳琳這
段情，當年還是挺轟動的。一九七○年，他參加朋友婚宴，李琳琳是伴娘，大家一起跳舞
，就此一舞定情。李琳琳當時已跟另一演員訂婚，姜大衛說愛便愛，擺明「撬牆腳」。
「鍾意佢咪追佢囉，唔理得佢有無男朋友，或者呢啲就係緣份。當年，無人睇好我哋。」

當年沒被人看好之下匆匆奉女成婚，兩人沒有穿婚紗，也沒有擺喜酒。十年前，結婚廿五
周年，兩公婆在女兒安排下穿起婚紗，在溫哥華大排筵席。這幾年姜大衛一直身在港拍戲
，兩年前他決定把太太和兒子搬回來一起生活。

「咁多年，眼見身邊好多朋友因為夫妻長期分隔兩地而發生問題，好好一段婚姻就咁無咗
，好唔抵。我哋坐低傾過幾次，我又未想退休，想一家人一齊生活，只有佢哋返嚟。」
他哥哥秦沛，婚姻就是因移民而破裂，他不想重蹈兄長覆轍。

「兩年前，我 feel到有啲唔妥。兩公婆分開得太耐，生活習慣開始唔同。每次我返加拿
大時，發覺大家要忍要讓，夫妻關係維持得好辛苦。我同太太講：『咁樣唔得！』除非大
家唔想要段婚姻，否則夫妻唔應該長期分開。」

他說一不二，夫妻達成共識後，立即賣屋賣車，半年後李琳琳已帶着兒子回到香港，一家
人現住何文田。
「幾大動作 o架！個仔在那邊土生土長，當然唔想走；但過咗兩年，依家又唔想返去。我
覺得，叫佢哋返嚟，係我一生人中繼移民之後，做得最正確嘅一個決定。」

兒子現在傳統英中讀中三，英文一流，只是數學與中文跟不上。
「學校裏有幾個好似佢一樣外國回流返嚟嘅學生，每次上中文堂，老師會集合佢哋分開教
。佢跟得好快，起碼依家識用中文 send電話 SMS，快過我。」
完全感受到那種老懷安慰。至於太太，是介乎全職主婦與跟得夫人之間。

「夫妻相處之道好簡單，係真係要一齊『相處』。我哋去邊都一齊，行街、買餸、整電話
，唔關我事我都會陪佢去，佢亦一樣。」

當年不被看好的一對癡男烈女，如今卻是圈中模範夫妻，當中沒有僥倖。
「朋友成日話我不苟言笑，你知唔知我個 cool樣可以嚇走好多『飛來蜢』？唔想發生嘅
事（婚外情），就盡量防止佢有機會發生。」

婚姻生活，向來要耐心經營。
「當年紀有番咁上下，好多事都會變，可能愈來愈長氣，愈來愈嘮叼。以前老婆點會理我
食啲乜？依家會講：『唔好食咁多肥膩嘢。』夫妻間有轉變好正常，睇得通就得。」

「高山泉」衰相得入型入格，姜大衛說：「自己睇番，都唔信我真係可以咁猥瑣。」

港台劇《有房出租》早前在星期日無人理會時段居然大收十三點，姜大衛飾落難紳士「李
林林」，諷刺時弊之餘都要幽自己老婆一默。「我哋年中會再添食。」

不需要太堅持

姜大衛原名姜偉年，出身於演藝世家，生父嚴化（原名姜克琪），母親紅薇及繼父爾光均
為著名演員。他四歲已任童星，六六年加入邵氏當武師，後得張徹導演賞識，七○年憑《
報仇》成為香港首位演員榮獲「亞洲影展」最佳男主角。
在電影裏，他是永遠的大俠。《保鑣》、《刺馬》、《十三太保》、《新獨臂刀》，是當
年少女的頭號偶像。

「今時今日，都依然鍾意拍武俠片。唔知點解，一戴起頭套，戚起條眉，就自自然然覺得
自己係大俠。」
早年的姜大俠，很執着，不易妥協。
「拍我飲酒，杯酒唔係真嘅，會叫人換。」

近年，學會磨合。
「個個叫我 John哥，唔代表我一定啱。依家啲後生仔夠膽創新，佢哋啲橋可能會有火花
，我唔需要太過堅持。」
他九四時入無綫拍《再見亦是老婆》，大俠演負心漢這條橋，轟動一時。
「的確有心理關口要過，好怕破壞形象。但原來電視台係另一回事，只要你啲戲交得準，
觀眾會一邊鬧你，一邊鍾意睇你。」

○五年的《酒店風雲》，是他從影以來首次演奸角。剛播完的「高山泉」，我們都未見過
如此猥瑣的姜大衛。

「條橋係《回到未來》加《七十二家房客》，單搞喜劇一定唔夠好笑，要搞，就搞瘋狂喜
劇！既然接咗，一定要豁出去。」
老婆仔女都在身邊，這回，可以盡情地笑了。

我只係有型

姜大衛的舊照中，有一張表情至酷的，像煞周杰倫。就是這個不妥協的眼神，叫他一直是
男主角。
他說，小兒子 John John跟他長得一模一樣。那豈不很靚仔，將來溝死女？
「我唔靚仔，我只係有型。」
有型就是有型，也懶得跟你討論是否保養得宜，是否怕生老病死等婆媽問題。
姜大衛，依然很大俠。

撰文：林蕾
攝影：袁家樂
協力：陳兆基
部分圖片提供：天映娛樂