梅小青離巢《盛世仁傑》終有幸復活          (忽然一周871期)

2012走出倉底
《盛世仁傑》上周六（ 3月 31日）首次搞宣傳活動。一眾藝人得知走出倉底，都齊齊舉V
慶祝。

為慶祝今年復活節，無綫破天荒搞特備節目，將冰封4年嘅倉底劇《盛世仁傑》隆重復活。

其實《盛》劇早於 08年 2月開拍，講宮廷鬥爭，卡士有鄭則士（ Ken哥）、未紅前嘅視
帝黎耀祥、力捧嘅郭羨妮、廖碧兒等等。雖然 Ken哥同祥仔都係實力派，但講真號召力真
係麻麻。

結果？據媽咪姐所知，監製梁材遠（材叔）拍完之後，曾將劇集拎俾上頭過目，點知小青
姐睇完試版忽發奇想，搵嚟當紮嘅陳豪、鄭嘉穎、佘詩曼、楊怡等拍咗套《宮心計》，仲
搶先《盛》劇播出。當時收視勁爆厲害，創下最高50點佳績，而《盛世仁傑》就從此入咗
無綫個冰箱，只限海外出現。

點解媽咪姐會知？向來火爆嘅 Ken哥自爆囉！早排佢見自己套劇終於盛世回歸，開心到喺
微博爆料，話自己係小演員，呢啲公司嘅政治問題，自己管唔到。而上周六（ 3月 31日
），《盛》劇第一次搞宣傳活動， Ken哥再發神威：「套劇排咗兩次期都抽起咗，原來有
個大監製攞去睇後就拍咗套宮廷鬥爭戲，搞到我哋冇得出。」 Ken哥雖然好有技巧，冇當
眾指名道姓鬧人，但心水清嘅媽咪姐當然有答案啦！如今小青姐已過檔 now TV， Ken哥
套戲就離奇翻生，真係咁啱得咁蹺！

Ken哥喺微博度，披露劇集被冰封嘅內情。不過《盛世仁傑》由倉底逃出生天，對Ken哥或
者觀眾都係喜訊。

2008準備開拍
2008年，無綫宣布開拍《盛世仁傑》，個個造型上陣切燒豬。不過事隔 4年，過檔嘅過檔
，生 B嘅生 B，面目全非囉。