劉松仁捨身 為阿姐降火
http://orientaldaily.on.cc/cnt/entertainment/20150510/00282_070.html
演技精湛的汪明荃（阿姐）和劉松仁（松哥）相隔多年合作拍劇。「本色出演」殿堂級歌
手的阿姐與攝影師「上身」的松哥於劇內流露出超然默契，而阿姐更大爆於劇外喜獲松哥
貼心照顧，早前逗留台灣拍攝外景險中暑，幸得松哥幫她及時按壓穴位，及提供「防中暑
」飲料，氹得阿姐大為感動！
Mark實三度合作
阿姐及松哥相隔多年再度合作拍攝無綫劇集《華麗轉身》，二人自爆一早主動Mark實對方
做拍檔。阿姐更笑言期待與松哥於劇中談情，以滿足粉絲的戲癮。
劉：係我哋話要合作先，之後先有劇本，因為機會好難得。
汪：係好恨合作呀，因為隔咗十五年，好難得有第三次合作！當年同佢拍《京華春夢》非
常成功，《婚前昏後》仲攞埋（視后）獎！我係一定要求要拍佢，其他卡士就之後一路加
入。
劉：而且今次同阿姐談情感覺微妙又好玩！
汪：有戲迷投訴劇集冇我啲感情線，話我成日罵女。咁今次我就好期待同松哥（飾演一對
），不過呢套大家就淡淡哋咁談情，大家都成熟咗，要珍惜！我哋真係好想做好呢套劇！
劉：今次合作令我更加欣賞阿姐，因為好難幾十年仲可以堅持一樣嘢，然後仲咁勤力、努
力、認真。我年紀愈來愈大就明白「得來不易」，我會更加敬重、尊重同欣賞佢！
大讚小方鍾嘉欣
阿姐及松哥每次齊齊拍劇均獲得莫大回響，他們直言深信今次三度合作亦能取得成功。談
及二人與方力申（小方）和鍾嘉欣等對戲，阿姐即搞笑狂讚「賤男」小方！
劉：我覺得都會成功，至少對我哋嚟講係成功。其實劇本寫得好好，人物關係又唔錯同有
深度。然後我哋經歷咗咁多，大家會互相體諒同欣賞！仲有阿姐對後輩嘅照顧同教育好好
，後生嗰班同我哋又合作得好開心，成個組合都咁好，我覺得已經係成功。
汪：我都欣賞你，我記得有場戲啲新人問松哥點演，佢做埋新人顧問，教佢哋點處理跳拍
嘅階段，大家有商有量！
劉：今次嘉欣角色好特別，因為同佢以前拍嘅好唔同，貪慕虛榮又恨錢，仲想嫁好有錢嘅
老公。佢同阿姐好多對手戲，連阿姐都讚佢出位！而方力申角色就好衰！
汪：小方個角色係好賤呀！佢演賤男，不過佢幾得意，啲對白又唸得好順，口齒幾好！
劉：我拍之前問過佢個角色咁樣驚唔驚o架？點知佢又ok喎，佢份人好好玩又古靈精怪。
松哥影出少女味
阿姐於劇中「本色出演」殿堂級歌手，開腔包攬劇集的主題曲、插曲及片尾曲。而飾演攝
影師的松哥則自爆為阿姐瘋狂拍照留倩影。
汪：戲中有一場真正嘅演唱會戲份，會唱晒三首劇集歌，因為本身係講三個唔同經歷及唔
同年代。特別今次有倫永亮幫手，第一次聽到首歌已經好鍾意。
劉：呢幾首歌一定Hit，又好聽，詞又寫得好，而且演唱會場戲好震撼，佢喺台上又唱又
跳，下晝仲要排練，通宵仲有咁好體力！我哋喺台下睇，我幫佢影好多相，拍出嚟感覺好
少女Feel，正到不得了！
拍門送驚喜早餐
阿姐及松哥早前逗留台灣拍攝約三周外景，於高溫下「乾蒸」拍劇，阿姐更一度險被熱暈
，幸得松哥幫她及時按壓穴位解困。其後松哥又將「防中暑」飲料先飲為敬，氹得阿姐大
為感動！二人亦乘機於當地狂擦美食，而阿姐更大爆於回程前喜獲貼心的松哥送上驚喜早
餐！
汪：我哋喺橫街窄巷拍攝，熱到我差啲要暈，佢即刻幫我按合谷穴，大家又好緊張咁同我
撥扇。之後第日朝早又係出外景，但我枱上居然有樽防中暑嘅飲品！
劉：我逼佢飲，因為怕佢熱得滯又見暈！
汪：我點都唔肯，因為一次拍劇我飲過，好難飲！但佢話『無嘢o架，我飲一樽，你飲一
樽啦。』我見佢飲咗一樽我先至飲，佢幾偉大，你話呢啲拍檔喺邊度搵呀！仲有日我喺化
妝間話冇機會食粢飯同豆漿，第二日係最後一日（外景），有間（食店）幾近，但唔知開
咗檔未。點知聽日好早就起身，松哥拍門大嗌『你啲豆漿油條呀』！
劉：嗰日朝早冇我戲份，因為要出去運動咪順便買埋。
汪：順便咋？定專登o架？
劉：都預備咗去買，因為知你鍾意食，我哋幾個都好鍾意！
羅家英襲台慶生
松哥大爆於台灣拍攝外景時，聯同秘密抵埗的家英哥（羅家英）為阿姐舉行驚喜的慶生派
對。而阿姐聞言竟自爆原來一早「識穿」眾人的計劃，令頓感愕然的松哥笑讚「好戲」！
汪：我生日啱啱喺宜蘭，佢哋安排咗驚喜派對！
劉：最驚喜係家英哥將自己好似禮物咁送過嚟！
汪：我本身仲唔肯等，因為拍到三點，但七點先食飯，我話畀我返去（抖）先啦。但佢哋
話「唔得」，一定要我一齊食。
劉：當時一定要保守秘密，唔畀得佢知。
汪：其實我知o架，我扮唔知呀！
劉：阿姐真係好好戲！
後記
阿姐及松哥無論在劇內或劇外亦合作無間，而松哥於訪問中亦多次流露對阿姐的體貼關懷
。當日只見敬業的阿姐於拍照前忙於整理後方的髮絲，而松哥見狀即拿出「私伙」噴髮膠
，即場化身髮型師為對方細心撫平秀髮。面對風度翩翩的松哥如此照顧有加，阿姐即時笑
逐顏開，連身邊的助手及小記亦不禁展現「心心眼」！