嫩版阿佘蔣家旻月入7千             2011/12/21 蘋果日報
http://www.ihktv.com/face-239-angel.html

《天與地》上週收視平均 23點冇升跌，師奶擺明唔 buy，不過難得吸納一班後生觀眾全
部讚好。陳豪佘詩曼繼續好戲，戲分唔少的五個 young版主角更乘勢彈出，人氣拍得住《
阿 Sir》入面的 K4。

戲中飾演嫩版阿佘的 22歲蔣家旻，一對厚唇似足徐子珊，但入行 4年依然做唔到無綫親
生女，月薪只得 6、 7千，比起一個騷收幾萬的姐仔簡直屬赤貧。蔣家旻話慳得一蚊得一
蚊，「我平時出街唔會搭的士，仲成年唔敢買衫添呀！」 80後咁識慳，好快有錢過阿佘
㗎喇！

蔣家旻雖然未上到一線，但非常有堅持，「我試過推劇，因為嗰次要我喺《潛行狙擊》入
面做一個俾 Bosco攬攬錫錫嘅女仔，一句對白都冇！我覺得我未至於要做到咁，咪同 PA
講唔想接囉！」

老嫩同場
雖然被揀中做嫩版阿佘，但蔣家旻個樣同阿佘其實唔太似。

07年參加 Tvbeople入行的蔣家旻， 08年開始入無綫拍劇，可惜做極都係細妹或者反叛少
女角色唔起眼。難得有機會在《天與地》佔重戲，蔣家旻竟然話當初 casting根本唔關心
有冇得拍。

服裝間被恰
做極都係三四線，蔣家旻自爆曾經俾人恰：「 08年拍《移情別戀》時，我去服裝間換戲
服，但入到去服裝阿姐服侍緊其他人唔得閒理我，我問佢攞衫，佢指住地下堆戲服話『啲
衫喺嗰邊，你自己摷啦！』我惟有跪低喺地搵囉！」

喺《移情別戀》入面只係做苗僑偉（左）姨仔，咁鬼路人甲，唔怪得俾人踩到上心口！

一試即中

「有個監製介紹我去試角，我嗰時都唔知邊個係戚其義，第一次面試時佢問我鍾意聽咩歌
，我話唔聽 rock，淨係聽『嵐』（日本偶像組合），臨走前佢話有 7成機會用我。我以
為又係啲行行企企角色，都唔太關心有冇得拍，點知第二日有電話叫我再見多次阿戚，咁
就中咗！」

有眼不識金牌監製，蔣亦非常有自知之明，將假想敵的水平定位在黃智雯及龔嘉欣層次。
「佢兩個同我同期出道，我冇樣冇身材冇後台，唔通我答你想做陳法拉咩！不過我又唔算
太樣衰，所以一定唔會整容！」

逐個數

玩得
「我初時好驚阿佘，但其實佢好玩得！有次班男仔問佢第一套劇係咪《雪山飛狐》，佢即
刻笑住答：『做咩呀？想話我做得差呀？係吖，我係做得差喎！』」

細心
「陳豪好好人，佢喺十二廠有部咖啡機，試過親自煮畀我哋飲！」

教導
「保怡個人好認真，有次走過嚟同班男仔講道理，『你哋夾 band嘅水準差咗啲，我哋咁
忙都會抽時間練，你哋真係要再努力啲！』」

內斂
「德斌份人好文靜，平時喺片場都唔出聲㗎！」

冇錢畀家用

冇高層照顧，現時與家人同住灣仔的蔣家旻自爆家用都冇錢畀，「我底薪得 6、 7千，出
年 5月有新約，會加少少人工，都有 8、 9千，希望到時可以畀 1千蚊家用啦！好在爸爸
開物流公司，媽咪做緊秘書，就算屋企得我一粒女都唔使我養家。不過我搵得唔多，所以
出街唔會搭的士，又唔會成日出街食飯，有時拍外景食唔晒個飯盒，咪拎埋返屋企繼續食
囉，我試過成年都唔敢買衫，有時連啲 500蚊嘅衫都要諗過度過呀！」
仲唔係新一代慳妹？

入行變索

中學時期嘅蔣家旻唔識化妝，眉粗大鼻似足男人，好在入行後有人幫手執走薯 look，當
堂似足同樣厚唇嘅徐子珊同舒淇。不過她說：「我唔覺個嘴性感喎！」

兄弟不和鼓佬微博鬧爆家明

四位 band仔於現實亦不時約埋夾 band，可惜家明張景淳唔生性遲到，激死羅鈞滿。

戲中人食人，估唔到現實中飾演鼓佬的羅鈞滿及家明張景淳亦充滿怒火。羅週一凌晨忽然
在微博寫了大段文字喪鬧有人甩底唔夾 band，仲講明「無必要忍你的少爺仔！」據知呢
位少爺仔原來係家明張景淳，好在佢事後即刻喺微博公開向三個兄弟道歉，應承唔會再失
場。而兩位當事人至截稿前仍未回覆，後生仔真係零舍火爆喎！

《天與地》 09年拍落，擺足 2年先出街，而劇中幾個醩版主角鶽家叫做有啲知名度，可
惜兩年後嘅今日依然做緊閒角。咁啱五人都有份同黎耀祥、鄭則仕拍《造王者》，希望到
時再谷到更多人氣！

未來外母唱衰黃德斌
戚其義愛將、《天》劇演精算師 Ronnie的黃德斌，剛與陳豪拍完《天梯》，又會拍阿戚
另一套重頭劇《金枝慾孽Ⅱ》， 48歲中佬愈演愈有。

現時收入有保證，但據知幾年前仍未發圍時，德斌曾被未來外母嫌棄，更周圍向街坊唱衰
呢個「半邊仔」。「嗰時黃德斌拍緊《火舞黃沙》，唔使開工就落 Joyce（黃的女友）媽
咪喺油麻地間時裝店打躉，佢媽咪成日同人呻，話個女要貼錢養仔，跟住呢個男人真係嘥
晒！」未來外母睇唔起，德斌上週回應時表現無奈，「我有工作，但唔係好多。其實我同
我女朋友媽咪 嘅關係冇問題，不過如果有人要咁講我都冇辦法！」自己爭氣咪得囉！