整衰咗 葉翠翠變莊思敏

2011/02/28 壹周刊1094期

「富貴港姐」葉翠翠，因為擦得掂 TVB高層曾勵珍，終於有機會被安排在「金牌監製」李
添勝新劇《我的如意狼君》中，擔演大反派。

唔使再做「二打六」，葉翠翠搏到盡，未選港姐前已經開始定期執樣的她，在埋位拍新劇
一星期前又再加碼，將鼻樑再升高；點知今次落手太重，影響雙眼向外擘開，搞到個樣似
足承認整容的莊思敏。

擔大反

葉翠翠當年因為有內地富商黃有龍（趙薇老公）送贈兩個北角賽西湖單位，轉手賣出輕易
袋穩三千七百萬，搖身一變做「富貴港姐」。成為千萬富婆，葉翠翠繼續無手軟，對自己
的「花容月貌」更落重本，久不久便「維修」，以為上鏡更省鏡。

在劇集做開「二打六」角色的葉翠翠，早前竟然有份擔演近年無綫最得勢的監製李添勝新
劇《我的如意狼君》，飾演大反派，戲份極重，廿集戲幾乎集集有份，是她入行以來最重
戲一次。

葉翠翠整到面目全非，可惜出來效果竟然是似莊思敏，亦似大美人李嘉欣。

氹高層

由於《我》劇大部分是《義海豪情》幕後班底，加上添哥作品向來有收視保證，又容易在
頒獎禮「中」獎，葉翠翠深信自己轉運，執到支好籌。

「翠翠一直都好識碼住啲高層，擦得珍姐尤其掂，雖然佢啲戲唔夠班，但珍姐好多時都會
預啲角色俾佢，好似《公主嫁到》呢類重頭劇都有佢份；今次仲俾佢恨到，唔使再做閒角
，翠翠好俾心機去研究點做之外，仲即刻去執執個嘜頭，希望以最佳狀態埋位。」幕後工
作人員說。

葉翠翠可以拍添哥監製的新劇，所以不惜在開工前進行大修工程。

入行 6年，葉翠翠屢次被指整容打假波，但她一於少理，一邊否認，一邊繼續整，由最初
扁口扁面平胸的醜小鴨，變成面尖、間尺鼻的大波女。

05年
葉翠翠選港姐期間被踢爆整容，有傳她在 Elite兼職做 model時，扁口扁面加單眼皮，參
選港姐先大執，隆鼻加 Botox瘦面，又割了雙眼皮。

07年
葉翠翠被指秘密到韓國隆胸，由 32A的扁平胸升 cup至 34D驕人身材，出席公開活動時經
常 deep V上陣，又接內衣騷晒胸。同時，五官亦再次起變化，眼皮變得勁深，更削走四
方面。

整上癮

劇集臨開拍前一個星期，葉翠翠出動再去執靚個樣。五官中，她向來最不滿是自己個鼻，
即使幾年前已經做過手腳，將鼻樑墊高， pizza面亦改為瓜子面，但她依然未覺滿意，今
次再將鼻樑加高，變成「間尺鼻」，而快將三十的她，肌膚卻遠勝從前，變得「掹掹緊」
，面上細紋都無條，十足十蠟像人。

不過，因為太過重手，搞到葉翠翠面目全非，雙眼因為受到鼻樑升高影響，導致向外擘，
兩隻眼的距離足以放得落四隻手指，而且有輕微大細眼情況出現，面部表情亦變得越來越
硬，驟眼睇，竟然似足去年公開整容的莊思敏，兩人樣貌有如倒模。

「冇見翠翠兩個禮拜，佢個樣又唔同咗，個鼻高咗又直咗，下巴更長更尖，同埋塊面有啲
硬，似啱啱打完透明質酸或者 Botox。其實化妝間好多人都笑佢整到走火入魔，一次比一
次重手，搞到個樣次次都唔同。變得咁明顯，話冇整過都冇人信啦！」一名化妝間人員說
。

三級跳

除了樣貌大不同外，就連身材都有強烈分別，從以前的扁平 A cup，逐步整到有 D cup效
果。

胸大咗，自信亦大咗，葉翠翠升 cup後，經常性感示人， 34D身材任人睇。

執樣幸運輪

整容風氣充斥娛樂圈，小生花旦個個整上癮，當中雖然有唔少成功例子，變靚後有運行，
但亦有不少失敗個案，大茄宿命難違。

成功個案

林峯
林峯得寵指數日升，但五官變化密度同樣高企，出道時的豬膽鼻、四方面、短小下巴無晒
，扁鼻離奇變直變挺，下巴經加建再加建後，進化成又長又兜的「灌湯餃下巴」。

楊怡
08年楊怡憑《家好月圓》阿月一角跑出，由最初臉圓鼻扁，至去年拍完《談情說案》後，
腮骨變瘦，有傳她捱痛啪骨瘦面，在新劇《魚躍在花見》中，楊怡連鼻樑亦離奇更高更尖
，足以掛衫。

徐子珊
當選港姐後，徐子珊一直備受力捧，由電視撈到電影，人氣高企，鼻樑亦不斷創新高，豬
包面經努力加工後，亦明顯變尖。

失敗個案

高鈞賢
港男高鈞賢被踢爆五官秘密起革命， 4個月內由內雙眼皮變成深雙眼皮，四方面變尖，但
一樣冇運行，更由大配角降至大茄。

藍莓（劉俐）
「 Sing之天使」藍莓被網友摷出做龍友時的舊相，當時扁鼻細眼，同入行後的大眼睛加
鬼妹鼻截然不同，雖然於一眾天使中跑出，但節 目播完後，打回原形，只偶然在電視劇
中做大茄。