鍾嘉欣錢唔易搵：磚頭最穩陣 2012/04/18 太陽報
明星跟身光頸靚向來掛鈎，出入名店、到酒店High Tea已是明星基本的生活定律，但入行
八年有兩層樓在手的鍾嘉欣，卻一如以往樸實無華，直言心動買個靚手袋都會內疚，她坦
言入行時答允家人，不會被同化成Material Girl！
金錢對我嚟講係一個安全感，我父母由原先咩都冇，一分一毫咁湊大我哋，由一個細細嘅
單位開始，到依家有個平穩家庭，佢哋真係好叻！雖然我唔係有錢女出身，但自小都好開
心，因為父母嘅影響，令我真係覺得錢係唔易搵，所以唔可以亂花。
呢個年代好多人買嘢都係為一時開心，但因為我要好有安全感，加上理財又唔係好叻，所
以使錢欲望唔大。好多人都叫我做慳妹，初時聽落都覺得冇乜嘢，以為係一個讚美，但其
實真係認識我幾深？講到我好似好孤寒咁就大件事！
「唔使着最靚」
我好相信名利同物質會好影響個人價值觀，我唔想一直堅持嘅價值觀會變，所以成日警惕
自己：「唔使着最好！唔使着最靚！」有時都會畀啲靚嘢沖昏頭腦，呢啲欲望永遠都唔會
停，但係我應承咗屋企人，入行後唔可以變，我要永遠永遠做番以前嘅鍾嘉欣！我都係人
，但有時都怕向來堅持嘅價值觀會畀啲衫褲鞋襪沖走，真o架！有時真係有少少想走o架！
我使錢概念係如果好食、有需要去食，先至花錢去食！或者外間認為娛樂圈嘅女仔一定日
日買名牌，但我覺得唔買名牌都好正常。如果我只係一個普通市民，對比番我依家使錢嘅
方式就真係唔係慳。今年我目標係買多層樓，磚頭最穩陣，我冇時間亦唔識去投資，咁不
如買樓仲好。
買名牌袋內疚
我啲錢會花喺買車畀爸爸、幫父母供加拿大間新屋、請吓屋企人去旅行、又或者平時開工
萬歲……買衫褲鞋襪以實用為主，如果買完只係放喺屋企唔用，我唔會再買。嘻嘻！其實
近嚟我開始愛上手袋，雖然買得起，但又會有啲內疚。真o架！以前人工有幾多？唔通用
兩個月人工去買個袋嚟威咩？
點樣令自己把持住就係可能我每日都同屋企人傾偈，同埋我諗好多嘢，會諗番父母點辛苦
養我時，諗到呢啲，就開始覺得唔需要去買呢個手袋！但我覺得唔使諗得咁複雜，對自己
喜歡嘅嘢唔好太沉迷太離譜就可以，鍾意嘅咪買個靚手袋畀自己囉！
鍾嘉欣囉囉攣：諗過同林峯拍拖
點解玉女係玉女？身為無綫花旦的玉女鍾嘉欣入行8年，緋聞男友只限無綫小生林峯及武
打明星伍允龍，原來她擇偶有其自家玉女心經，拍拖就如煲老火湯，要過渡兩年觀察期才
能過關。怕感情缺失的她曾對林峯作出思想鬥爭，曾有一刻心動！嘉欣將一連五日分享對
感情、事業及家庭的玉女心經。
早年我同林峯傳緋聞，份份報紙雜誌都咁講，又話我哋好襯，傳到好似要逼到我哋要拍拖
一齊咁，搞到我真係有一刻、曾經閃過一個念頭，係咪可以試吓同林峯拍拖呢？真係有呢
一剎那o架！可能當時拍劇關係，畀林峯個角色影響咗我，但係呢個念頭真係得一剎那、
一閃即逝！因為我好快就知自己有冇Feel，點解唔得？真係唔知呀！拍拖係感覺，我都冇
Feel，點拍得成？
慢熱 ! 愛不出口
雖然有拍拖念頭閃過，但我冇同林峯講過呢個諗法，雖然我係好鍾意講嘢，但我份人好慢
熱，尤其以前拍戲，同個個都係一句起、兩句止，都係近兩年先開始識同人聯絡，就算我
同馬浚偉拍咗4部劇，都係之後先多嘢傾，所以又點會同林峯講？但我一定唔係暗戀林峯
，千祈唔好誤會，我同林峯只係同事朋友，哈哈！我明白觀眾當然想男女主角拍拖，正如
我當年睇劇集，都想鄭伊健同陳松伶拍拖一樣！
25歲時已經覺得：死啦！我變中女喇！唔鍾意人哋叫我做中女！雖然今年28歲，但我又唔
驚會做剩女喎！我真係好想有個家庭，有時父母都叫我唔好掛住做嘢，都會催我，要為自
己着想，結婚組織家庭。就算我同林峯或伍允龍傳緋聞，父母都唔會特別去問我，因為佢
哋好清楚我點諗，我哋日日都傾偈，點會唔知新聞真與假？我知道拍拖係要講感覺，但唔
可以畀一剎那感覺而迷失自己，父母雖然係緊張心急，但都會叫我穩陣小心。
謹慎 ! 2年觀察期
我份人好怪，一定要做幾年朋友先考慮拍拖，一拍拖就想結婚，但其實有幾多個男仔會咁
樣先同我做兩年朋友？但係緣分急唔嚟，我又唔會改變性格。我真係希望十年後嘅我已經
唔使做呢行，而係轉做另一樣嘢，仲有個好老公同埋兩個BB之外，我屋企人住喺我隔籬屋
，大家方便照顧！最緊要身體健康，內外都咁靚，哈哈！我唔係對呢行無心戀戰，而係結
婚組織家庭係人生另一個階段，人係要經過不同階段去成長同進步。
悶蛋 ! 無人問價
初入行時，人人都話呢個圈好黑暗，有好多飯局、某啲交易或問價，不過從來都冇人叫我
去飯局或問價，唔係話自己想去，而係都想八卦知吓係去邊度食、食啲咩！哈哈！可能我
出名乖又悶，嗰啲人都唔想問，可能啲有錢人唔想同一個戇居居嘅明星仔食飯啦！哈哈！
有時出嚟見記者，都會覺得自己冇乜緋聞是非，都唔知記者有咩可以問我！我啲新聞來來
去去都係話我慳啦、乖啦、好辛苦拍劇同病囉！其實我都想有個緋聞情侶拍檔一齊出騷搵
錢，你話幾好？哈哈！
Profile 鍾嘉欣（Linda）
年齡：28歲
學歷：英屬哥倫比亞大學教育系二年級
入行經過：04年勇奪國際華裔小姐冠軍後，即被無綫羅致旗下。
代表作：劇集《溏心風暴》及《點解阿Sir係阿Sir》、唱片《一人晚餐 二人世界》，以
及電影《十分愛》等。
口述：鍾嘉欣 筆錄：專案組
阿峯勁受落：我都心動
鍾嘉欣與林峯（阿峯）因合作無綫劇集《溏心風暴》及《溏心風暴之家好月圓》傳出緋聞
，他們被無綫塑造為螢幕金童玉女，嘉欣坦言曾對林峯有一刻心動，林峯聞言亦大為受落
：「我都係一樣！有呢個表現好正常，畀我都會心動，因為拍《溏心風暴》時，我哋個角
色好受觀眾歡迎，相當成功！對我哋嚟講，呢套係電視代表作，尤其係第1集，感情線拍
得最多，我哋返到公司好似日日拍拖咁！」既然不約而同有一刻心動，但為何最終未能撻
着？林峯說：「嗰時入戲嘛！入完戲就要抽離角色，或者遲啲大家有機會再合作，到時再
入過戲！」
絕種玉女少緋聞
18歲才首嘗拍拖滋味的鍾嘉欣，是圈中難得的清純玉女！06年，嘉欣與林峯拍《溏心風暴
》系列開始，數年間緋聞甚囂塵上，有指林峯多番出招力追，嘉欣也「時放時收」，並曾
說：「以後啲嘢，邊個都唔會知！」另一邊廂，嘉欣於07年拍攝電影《十分愛》與武打男
星伍允龍結緣，即傳出男方極速攻陷芳心，有指嘉欣引薦他擔任MV《二人世界》男主角，
攞正牌拍拖！
東東影響愛情觀
鍾嘉欣遇上心儀的男孩，只會默不作聲，原來受陳曉東（東東）影響：「我到依家都冇追
過男仔！遇到鍾意嘅，我只會（目及）住對方，就好似我讀書時期嘅偶像陳曉東唱嗰首《
愛你躲你》嘅歌詞咁：『愈是望你，愈難自欺，怕是愛太深重，便寧願刻意逃避』一樣！
就算我18歲初戀，都係識咗3年先拍拖，拍拖初期都未拖手，一定唔會過夜，就算出夜街
都會12點前返，因為唔返，家姐一定同媽咪報寸！」