鍾嘉欣胸有成竹：夠班爭視后          2012/04/17 太陽報

鍾嘉欣出名不蒲不玩，像牛一樣勤力，病假免問，雖捱出出頭天，穩站無綫花旦位置，但
每年的視后人選總是沒有她的份兒。昔日零信心愛靠邊站的嘉欣，今日一臉自信地說已有
資格角逐視后。

好多人都話我乖，亦都聽過有人話我太乖而唔適合做呢行，起初聽到以為係讚，仲諗咁講
即係覺得我係好人，適合係咪指個人要功利啲進取啲？係咪因為我係好人而唔適合？之後
開始慢慢明白，話我唔適合做呢行，意思係咪我會被人Foul出局？即係話我唔掂、唔夠醒
目啫？但我絕對唔係蠢唔係低能！今年入行第八年，所以唔信話我唔啱做呢行呢個講法。

唔識擦鞋

外間話我性格太乖而輸蝕，否則際遇會更好，其實最主要睇自己點諗。當見到有人識同監
製打交道多咗工作機會，有時都覺得唔咁做係咪蝕底。但諗深一層，其實人哋要同高層打
關係都好辛苦，一啲都唔簡單，畀着係我仲慘過畀人鎅一刀！所以各人行嘅路唔同，只要
達到同一個目標，唔會理過程。我唔認為口才好、人靚、識打關係就上到位，呢行真係好
多人辦你睇！

近年好多人都話我係時候攞視后，以前我冇信心，但今年開始，覺得真係係時候向呢個目
標進發，我唔係話今年要攞，起碼可以角逐呢個類別。我唔係話依家係一姐，而係要有信
心，唔可以成日話唔得，有信心咩都得。

零殺傷力

當見到有人發展際遇好，我都試過嫉妒，係人之常情。妒忌心人人都有，我會諗大家都一
樣努力，點解你可以有咁好成績，而我唔得？但諗到呢點，就會同自己講：妒乜鬼忌？算
啦！我唔鍾意同人爭，我只會爭氣。

有冇人妒忌我？哈！一定有！但我唔講得，真係唔開名大家都估到！但我其實冇殺傷力，
所以妒忌我做咩？好似以前選美，當年我唔係大熱，真係冇人妒忌我。但當我得咗冠軍，
真係有啲人唔同我傾偈！本來選美前都預咗畀人批，但又冇喎，個個都好融洽！我好多謝
台灣小姐，雖然大家嘅參選號碼差好遠而唔係成日一齊，但佢真係畀好多鼓勵我，好記得
佢話：「我認為你可以當冠軍，不要灰心，甚麼大熱全部都是新聞，你整個Package都很
好。我知我不可以，你要爭氣！」