平肌會 梁烈唯
Face周刊245期 http://bbs.ent.163.com/bbs/tvb/241731946.html
年廿八， 32歲的梁烈唯迎來入行 10年、拍劇 8年第一個 C1娛樂頭條，唯唯說，傳媒幫
手、又剛巧最近娛圈太平沒被甚麼其他大新聞蓋過，當然，《缺宅男女》裏的關二哥、關
二嫂的廢柴、自私、陀衰家夠搶鏡，不過跑得出做娛頭，還是天時地利人和。
隨着角色彈起緊接而至的，是各家報章雜誌邀約拍照訪問。作為近期第一個個人長篇專訪
，唯唯合作到極點。一聽攝影師想拍無上裝，即使寒極的他也二話不說就寬衣。全賴平時
日積月累勤操練，熱身運動也省了，已經筋肉分明、鋼條精煉，極速達到攝影師要求。
拍完第一組相片，唯唯有點黯然：「其實早排公司（ TVB） management藝人都影過一輯
類似嘅相。影之前攝影師問我使唔使谷吓先，我話唔使，影出嚟佢都嘩一聲：『嘩！乜你
咁勁！』可能其他幾個當家小生谷咗都冇乜啩，我太勁影得佢哋唔好睇，結果影咗成日一
張都冇出過……」
梁烈唯的故事，得從他鑽研《缺宅》裏那個患上躁鬱症的角色「關二哥」說起。他不說，
你永遠不會知道，這個沙田 band5學校出身、會考 1分、專搞事幫大佬溝女的壞學生為了
區分開躁狂症、抑鬱症和躁鬱症，刨掉幾本書做了多少功課；他為關二哥設計的躁鬱小動
作，連導演也沒能 get到。不過，機（肌）會說來就來，準備充足總是好的，即使機會不
是對每個人都公平。
躁鬱二哥
我哋呢啲人，喺電視台叫「功能人物」。永遠做人哋細佬、同學仔，永遠行出嚟都係搞吓
事搞笑咁，通常啲監製驚啲劇情下下殺人下下爭產太沉重，就會搵我哋 dum番輕鬆啲氣氛
。
次次開劇都係收到呢啲角色，當然會失望。不過人哋覺得你走唔出功能人物嘅框框，係你
嘅問題。我哋可以做嘅，係做足功課，將呢個表面上一成不變嘅功能人物演繹得更加獨立
同立體啲。
關二哥有躁鬱症，我睇咗好多書，原來躁鬱唔係躁狂、唔係抑鬱……（下刪一千幾百字病
症特性）。躁鬱兩樣都有仲難醫，病發時感官觸覺會好敏感，我想將呢樣特性呈現畀觀眾
，但係聽覺同觸覺都需要後期製作，會增加成本會越權，惟有喺觸覺敏銳呢方面着手。
所以，二哥病發時，會不期然捽衫、捽拉鏈，病發時佢摸到嘅唔只係衫，係摸到針織交錯
……套劇一共有四個導演，得兩個留意到我呢個小動作，會叫攝影close up落我隻手度…
…係?，我做咁多嘢唔係個個留意到，我以前都好刻意想俾人見到，係同我偶像劉青雲學
返嚟，係睇咗好多次《大時代》同《再生號》，我先至 get到，好似劉青雲咁，符合角色
背景同性格、真正喺細節裏面立體化個角色，一啲唔刻意、唔 show off，呢啲先叫高，
唔使個個都明嘅……
好似關二哥一樣，人最廢就係見唔到自己有幾廢。
《缺宅男女》與黃智雯憑二哥、二嫂跑出，梁烈唯過年後緊接有兩部新劇開拍，機會不斷
。
暴風一族
對上一次受矚目是 08年的《尖子攻略》：「雖然冇後勁承接，但係諗落，我哋呢行似農
夫，每個角色都似播種，等收成。」
我以前讀書好屎，從來冇諗過有朝一日，自己會為一個角色刨咁多書，我諗我真係好鍾意
做戲。
我中學讀嘅馬登基金沙田明愛職業先修學校，一早已經俾人殺咗校。間學校喺全區惡名遠
播，十足十《逃學威龍》一樣，上堂食煙、帶刀返學斬人，同學喺學校賣丸仔賣白粉，日
日都有架警車泊喺學校門口。嗰時喺學校，每班都實有一個高大有型最曳嗰個，我咪佢嘅
嘍囉同跟班，不過係最勁嘅嘍囉，頭馬嚟?！嗰陣我已經係功能人物，負責搞笑、幫手借
書借功課，仲有，佢鍾意邊個女仔，我去負責攞電話、遞情信咁囉。
細個邊度識欣賞劉青雲?？我嗰陣時最鍾意成龍、周星馳，睇咗《天若有情》起碼 50次，
同成班 friend幫架單車包晒包圍，三更半夜焚住機，播住張國榮首〈暴風一族〉周圍走
。見到人哋揸私家車，眼超超勁藐：「好叻咩？」其實心裏面真係覺得有架私家車好叻，
最大心願就係快啲做嘢搵錢自己都有得揸私家車。
中三暑假，我去?家執咗嘅馬里奧餐廳做學廚，我哋呢啲學廚，明被人恰，落場人哋去瞓
覺、打機，我就一個人串串燒。唔串都唔知，啲生肉好難串，鬼咁長一串不停 親手指，
又凍又痛又俾啲洋葱搞到流晒眼淚俾人笑，一個星期已經頂唔順，死死氣返去讀中四。
邊皮娛人
中五畢業，契媽介紹我入咗間製作公司，錄咗音影咗相，諗住有機會做歌星，已經當正自
己係邊皮娛樂圈人士，乜都唔做喺度等出名。結果碟又冇得出、又冇錢使，朋友介紹我去
幫手搭棚。
我真係仲覺得自己有機會做明星?，唔肯拋頭露面搭棚，淨係肯遞竹。基本上識分六呎、
八呎同十二呎竹已經可以去遞竹，嗰啲嘢低能都識做。
如是者搭咗幾個月棚，等到志雄哥開拍《少年犯》，契媽又送我去試鏡，點知揀中我做男
主角仲唱埋主題曲，嘩，總算到我啦，我今次仲唔係陳浩南？仲唔打到入銅鑼灣？
搭棚一日賺 3百，做文員一個月賺 5千，我第一套戲有 3萬酬勞，打後連開三、四套戲，
每套開兩個星期工就有 6萬，嗰陣財大氣粗幾有型。出街唔肯搭巴士，買 Nike買齊四、
五十隻色。當年冇微博冇 facebook，我就排晒啲鞋喺地下影相，曬出嚟張相隨身袋住隨
時攞畀人睇，虛榮到呢，叫晒啲朋友出嚟請食飯，仲撞到以前隔籬班懶乖嘅同學，醒佢
50蚊貼士添：「你哋呢啲咪就係做侍應咋嘛，我咪明星囉……」
2003年遇着沙士，我年幾冇戲拍，阿爸又破埋產，陳敏之話我咁都唔係辦法，介紹我入
TVB。其實我好肯定自己根本冇人識，隔籬鄰舍都唔知我乜水，唯一一次得廟街賣翻版嘅
古惑仔同我講：「你隻碟好好賣喎……」嗰陣我都仲係覺得自己好掂……
8年前初入 TVB，與陳豪連拍《心花放》、《胭脂水粉》結為好友：「當年陳豪已經想鬧
醒我，可惜我唔化。」
19歲第一次拍戲就做男主角唱埋主題曲：「我心諗，今次我仲唔係陳浩南，《少年犯》一
年一套續集，赤手空拳打落銅鑼灣？」
人望低處
敏之同我講，入 TVB預咗捱，冇人咁快爆到 show、簽到 management，我第一套就係梅小
青嘅《青出於藍》，第一年就爆騷、傾 management，幾咁不可一世同敏之講：「你話我
做唔到嘅嘢，我咪做到晒囉！」
人哋搵我開劇，我完全唔識感激，根本覺得邊有人做得好過我。導演話我啲戲 over，我
完全唔識檢討：「我設計咗?喇喎……」
我諗我當時嘅嘴臉真係好乞人憎，連我嘅女朋友（應采兒助手Tina）都話我難頂，連陳豪
都同我講過：「一個人太自大就唔會有進步空間，就隨時俾人超越！」
擺到明啦，我都唔知人哋講緊我。
拍嚟拍去，除咗小青姐冇第二個監製肯搵我，好快就開始冇工開，經歷咗第一年唔夠show
、甚至幾個月冇劇開嘅黑暗日子。我永遠都記得停工 4個月，第一次接到電話臨時叫我做
債仔甲（苗僑偉主演的賣埠劇《上海傳奇》），成班演員見到我連特約都照做掩住半邊嘴
笑個樣，佢哋指俾我睇套戲服喺邊：「嗰邊寫住特約嗰個咪係你嘅囉！」
我擰轉面換衫，佢哋喺背後竊竊私語個場面。
我唔怪佢哋，我曾經係好乞人憎，我亦唔後悔自己有一段咁嘅歷史，好似關二哥一樣，人
最廢就係見唔到自己有幾廢，冇嗰段經歷就唔會有?家嘅我。唔係嗰段日子，我仲唔識感
激人哋開戲點解會搵我，而係目中無人地覺得：「唔搵我搵邊個？乜有人做得好過我咩？
」
拍拖 9年女友 Tina是應采兒助手：「佢鍾意照顧人，我最想照顧佢，女友心地好，唔使
化妝、冇經修飾，已經靚過呢行所有人。」
好友陳敏之 8年前介紹梁烈唯入 TVB：「佢叫我慢慢嚟，我就不可一世，覺得自己好掂，
我諗個個當年都想打我。」《蘋果日報》圖片
要屋定要家？
總算冒出頭來，有位可上，梁烈唯這次沒有一點飄飄然，新年願望每個都腳踏實地。
「我去茶餐廳幫表哥手，係真心想入股。最想快啲儲到入場費，賺到老婆本娶女友過門，
然後儲到首期，喺深井買樓。車，我以前揸架 1300c.c.俾同事笑我連貨車頭都爬唔過，
我要求唔高，可以換架馬力夠又闊落啲畀阿爸阿媽同女朋友坐得舒服啲就最好。」
話說某人亦曾在訪問中跟我說過安於現狀，轉個頭飛起十年髮妻戀上富家千金，連電視台
份工亦唔吼。我問唯唯，咁多入場費同首期要儲到何年何月，人哋換畫跟手換埋豪宅靚車
仲有得周遊英倫意大利，怕不怕受誘惑感情生變？
唯唯說：「我都唔鍾意意大利，淨係鍾意返屋企喎。學《缺宅男女》話齋，你想要間屋定
要個家先？」
有志氣，我鍾意，真心嗰句，祝你堅持到底。
被拍到在跑馬地「大少爺茶餐廳」幫手收銀：「我真係想學嘢，仲儲緊最低入場費入股。
」