上位姐仔 阿媽支持英國遊學 黃智雯冇使寃枉錢        (壹週刊1150期)

魔童王維基的電視王國已開始動工，挖角潮一浪接一浪；有人唔願留低，間接造就一批有
條件但未遇適當時機的人上位，例如入行五年的黃智雯，接連兩套劇《缺宅男女》及《
 On Call 36小時》輪住上，靠《缺宅》「關二嫂」乞人憎形象一角彈出入晒屋，表現一
枝獨秀。

○七年參加港姐前，黃智雯在媽咪的全力支持下，鋪定路進軍娛樂圈，在演藝學院攻讀舞
蹈及戲劇雙學士學位，黃母每年再額外使多筆，讓女兒到英國一個月，睇歌劇、藝術展覽
、上短期舞蹈及戲劇課程。入錢罌多年，黃智雯無使寃枉錢。

在英國 Pine Apple學院學跳舞兩星期，黃智雯與二十名外國同學一齊排練，學費平均港
幣一百蚊一堂，兩星期千四蚊。

終於擔正
靠《缺宅男女》的「關二嫂」跑出，再有人氣劇《 On Call 36小時》谷多谷，黃智雯終
於一嘗所願做女主角，與羅仲謙、汪阿姐及黃淑儀合作潘嘉德監製新劇《媽不得媽媽》，
今次唔做潑婦，扮粗魯裝修女工。

過去兩年多，拍劇十多套，鵪鶉妹、潑婦、硬朗女警等不同性格角色，黃智雯似模似樣，
全賴開美容院的媽咪，在背後揼水支持。

黃智雯表示母親開美容院養大她與家姐，至於父親，她說彼此關係良好，經常見面飲茶。

年年遊英

乞人憎的「關二嫂」彈出，黃智雯演技出色獲大眾激賞。
「我好細個已經鍾意跳舞，媽咪俾我去演藝讀跳舞，畢業後我一面做空姐一面教跳舞，後
來再讀埋戲劇學系。」黃智雯說。

好好醜醜，總算科班出身，黃智雯借參選港姐作為踏腳石，但並沒有放棄跳舞及演戲，過
去八年，每年必抽一個月時間，到親阿姨在英國的別墅住一個月，順道睇表演、學跳舞及
演戲，有時間的話，去埋蘇格蘭遊學。

望演歌舞劇

「希望拍完《媽不得媽媽》之後可以有假期去一次英國，我覺得係時候去外面充吓電，吸
收多啲嘢，但如果要拍劇就無辦法。」黃智雯說。
要挑戰自己，黃智雯希望公司可以開歌舞劇，讓她有機會學以致用，發揮跳舞彈琴本領。
做過老師教人跳舞，還有八級鋼琴底子，黃智雯同甄子丹一樣，文舞雙全。

投資搞美容

在《女警愛作戰》（未上映）中扮特警（左一）。
29歲的黃智雯，父母早已離異，與胞姊跟媽咪生活，黃母靠做美容院養大兩姊妹，家姐
 Cathy Wong是英皇教育英文科補習天后，兩姊妹最近搬入市值五百多萬的「譽?港灣」居
住，早前她更透露與母親合資一百萬入股美容院。

受公司力捧後，黃智雯由去年至今，已拍了《怒火街頭》、《潛行狙擊》、《不速之約》
及《女警愛作戰》（未上映）等多部電視劇，是接力上一線其中一員。