王浩信YoYo唔怕肉麻                (Face周刊268期)

上週六（ 7日），《飛虎》一班演員踩入將軍澳做宣傳，當日適逢王浩信 29歲生日，佢
老婆陳自瑤就攞埋生日蛋糕上台同佢慶祝，玩晒忌廉上面， YoYo又不顧儀態吮手指（右
圖），成功搶鏡。

逢星期日晚出街嘅 TVB新劇《飛虎》，有動作、有親情又有友情，唔只師奶，連 FBI個個
禮拜都追，唔怪得播到第 3集最高收視勁收 31點，算係開拓咗週日晚 10點鐘時段！

上週六（ 7日），一班《飛虎》演員拉大隊去將軍澳新都城再谷宣傳，套劇雖然由離咗巢
嘅馬德鐘同宣萱做主角，但當日反而係大配角王浩信做晒焦點，原來撞正王浩信 29歲生
日，佢老婆陳自瑤（ YoYo）喺《飛虎》只係客串一集咁大把，都特登捧埋生日蛋糕上台
，叫成班演員為佢老公慶祝製造 surprise，當眾又攬又錫，唔怕肉麻，難得佢哋結婚半
年，仲有個 3個月大嘅囡囡， FBI都戥佢哋開心。

又攬又啜
捧住生日蛋糕，王氏夫妻都仲唔斷氣繼續啜， FBI知你哋 sweet喇，寃氣！

而當日苟芸慧都唔執輸，與同劇中將會成為情侶嘅梁烈唯玩遊戲時，又搭膊頭兼且摸勻全
身，玩遊戲前仲不斷咬耳仔，「苟姑娘」真係好入戲喎！

周身摸勻
將同梁烈唯飾演一對嘅苟芸慧，當日蒙住眼玩拆彈遊戲時，喺唯唯身上周身摸，仲差啲摸
到「小唯唯」，嚇到唯唯即刻閃開。

拖手放電
宣傳期間，唯唯同苟芸慧不斷咬耳仔，苟芸慧仲捉住唯唯隻手不斷放電，小心唯唯女友呷
醋喎！

雖然《飛虎》係宣萱離開 TVB前最後一套電視劇，但一樣落力做足宣傳，當日着住背心玩
遊戲時，罕有露出事業線，送大禮。