[Face週刊 第204期]面對面 告白 廖碧兒
http://bbs.ent.163.com/bbs/tvb/207770775.html
這一天，廖碧兒要求攝影師在訪談時停止拍照，我們答應了她的要求，結果，攝影師被請
走，廖碧兒說着說着，聲調變了、眼眶紅了。
不是為了錯過公認的筍盤前男友陳豪、不是為了與富二代林忠豪發展未如理想、不是為了
從去年底開始她成了公認的拜金負心人、形象插水，廖碧兒眼圈裏開始有淚水打轉，是說
起農曆年間工傷躺在病床上、右半身動彈不得，要簽手術紙承擔後半生可能半身不遂的風
險時。
「入咗醫院冇人知，我本來打算出院後當咩事都冇發生過，但嗰一日，一諗到我未必可以
健健康康咁行出醫院、全世界都仲未知我發生咩事、我仲未結婚、仲未生仔，可能以後都
冇呢個機會……」
入行10年，今年32歲，別人怎麼說都好，廖碧兒從來不反擊不澄清。
身高5呎7、體重52公斤，生得牛高馬大，廖碧兒在別人眼中從來不會撒嬌不需要保護。
一個手術，讓她決定來一個告白。
甚麼一腳踏兩船拜金狠撇前男友的指控，她說，08年已經分手，怎麼成立？
甚麼相戀6年不給對方一個名分，她說，她只是一個普通女人，一直在等對方拉着她的手
走出來，給她一個名分。
無敵筍盤王到底有幾筍？廖碧兒說：
「當最需要有人企出嚟為自己講一句公道話時，強求唔嚟，女人，更加要靠自己。」
入廠
去年底，被拍到埋富二代堆遊船河、傳出狠撇陳豪拜金黐富二代新聞，廖碧兒一直是連累
好男人陳豪情傷落形的罪魁禍首。
正在拍攝處境劇《依家有喜》的廖碧兒，處理緋聞的作風十年如一日，不回應也不澄清。
1月劇集殺青、廖碧兒突然失蹤，直到3月中才傳出曾經在養和接受「外科大手術」的消息
。
「受傷係舊年11月尾嘅事，我喺中環石板街拍《依家有喜》，簡簡單單一場邊行邊講嘅戲
，事前仲排過幾次添，踩空腳扽親腰。
當時唔覺好痛，到第二、三日開始發作，每場戲導演一嗌cut，都痛到要即時搵嘢扶住。
我唔係輕易嗌痛嘅人，係監製見到唔對路迫我點都去睇吓，直到套劇拍完，我入過三次急
症室。冇人想因為一個人影響成套播緊嘅劇嘅進度，我食住止痛藥忍到煞科，再飛咗兩次
出席海外活動，最後一個trip實在上唔到機被迫cancel，終於要入院。」
具體傷勢，廖碧兒說是腰骨移位兼碎裂，情況複雜需要接受手術，住院加休養超過一個月
，至今每週要接受物理治療，目前回復情況是能穿高跟鞋、行走動作暫不受影響，未來能
否回復以往打得又跳得的狀態，還是未知之數。
「最糟糕時，瞓喺醫院張床，右半邊身痛到郁唔到。我唔鍾意對住人喊、唔想父母為我擔
心，但嗰段日子根本痛到忍唔住眼淚，唔喊，我唔知仲可以做乜。我自細跳舞、入行後學
跆拳道、學詠春，竟然唔係吊威吔、唔係打戲受傷，行幾步路都出事，你話做人幾化學？
瞓喺病床，想努力郁吓手指、腳趾都郁唔到，最驚就係失去咗本來擁有嘅嘢，而嗰啲嘢每
個人與生俱來，你以為理所當然、最簡單嘅能力。」
與李澤楷表弟林忠豪的緋聞傳足半年，2月尾出院不久，廖碧兒就被拍到與林忠豪在坑口
食意菜：「盡量唔想影響朋友，但總會見面，我行動不便，所以喺屋企附近約佢食飯。」
去年8月，廖碧兒被拍到與富豪朋友遊船河，首度傳出她密會ABC富二代。
領悟
入院之時，正是緋聞炒得最熱鬧，全港媒體集體批判廖碧兒拜金薄倖、憐憫陳豪被傷害得
落晒形之時，廖碧兒說，當時沒站出來，是因為家人一致認同，當務之急是完成手術恢復
身體，其他的，下一步再算。
「個個都覺得我好tough，因為我企得出嚟，從來都係笑唔會喊，呢一次，我都唔想俾
fans擔心、又無謂俾人覺得我借入院扯開話題，諗住由頭到尾冇人知咩事，幾個月後健健
康康行番出嚟當咩事都冇發生過。
直到簽紙做手術，先至識驚，原來我未必可以健健康康自己出院，我仲未結婚未有機會有
小朋友o架……入行十年，我冇停過，呢次可能係神想我停一停，畀我一個機會好好諗吓
事業、生活、感情。我記得21歲入行時，心願係24歲結婚生仔，家姐大我3年，啱啱生咗
第2個小朋友，細佬細我3年，都做咗爸爸。不知不覺，咁就行咗另一條路，心願遲咗8年
都未有機會達成。」
我問廖碧兒，入院期間，有沒有哪一任前男友探訪過，她說：「冇」。被全民指摘貪錢負
心時，希望有人站出來為她說話嗎？她說：「想。」
「公眾人物冇所謂私隱，私隱都係公開；公眾人物亦不能太我行我素，因為好多小朋友因
為我養狗學跳舞，社會義務一定會有；我明白食得鹹魚抵得渴道理，但係當傳聞開始失控
，我形象的確受損，出院後屋企人開始讀新聞畀我聽，解釋我知咩叫拜金、咩係貪錢時，
我先至知原來咁嚴重。樂小姐（樂易玲）同屋企人，仲有教會朋友都支持我，係時候出嚟
為自己講嘢。」
點解會一腳踏兩船？明明08年已經分咗手！
點解要話我一直唔畀對方名分？我係一個女仔，乜名分唔係要男仔畀女仔嘅咩？」
外傳相戀6年的廖碧兒與陳豪，雖然不斷被拍到互相出入住所及同車相片，兩人從來沒有
承認過情侶關係。
當選華姐以後的處女劇《皆大歡喜》，廖碧兒與同劇的劉凱威拍拖三年，曾經被劉父劉丹
讚不絕口。
明明08年已經分咗手！點解要話我一直唔畀對方名分？我係一個女仔，乜名分唔係要男仔
畀女仔嘅咩？
真相
聽到這裏，問題來了。如果08年已經分手，甚麼狠撇、花心的罪名的確就不能成立，只要
新聞裏所謂三角戀情的受害者出來講一句話，就能輕易挽回女方的名聲，不過，從頭到尾
，那個人沒有這麼做。
廖碧兒說：「冇人企出嚟幫我講嘢，冇得強求，所以呢件事發生以後，我更加相信，女人
，真係要靠自己。」
「對普通人嚟講，一段感情關係好正常不過，但呢行嘅人自然會明白，有好多嘢要顧：到
底公唔公開好呢？對自己形象適唔適當呢？着唔着數呢？」
着數？「即係對形象影響係正面定負面。唔係我計，我唔知人哋有冇計，up to嗰個人視
事業、形象定感情邊樣最重要。做呢行，我冇諗過最大影響係，出到街遇到行人，我唔識
你，但係你識我、對我已經有好多睇法。
一套劇集成功、一對情侶檔受觀眾歡迎，我明白觀眾自然希望你哋真係一對、可以一齊。
所以咁多年嚟，就算冇人認過拍拖，我哋都俾人當係一對。
08年就算分咗手，工作場合、公司安排，難免又會碰到，05年《心花放》（陳豪、廖碧兒
定情後不久的情侶檔劇集）最近又喺海外播緊，我都明白，兩個人想完，都唔可以真係完
。」
過去的就讓他過去，現在廖碧兒自認單身，雖然甫出院就被拍到與林忠豪在家附近歎意大
利菜，廖碧兒說對方的身份暫時還是朋友，比起養好身體，感情發展目前不是當務之急。
「過去十年，每個人都同我講，做呢行，唔好錯過任何一個機會，我唔知道、亦唔後悔因
為咁自己錯過咗幾多。?家，我會諗吓，工作應唔應該接、自己係唔係應付到，我亦都想
，放慢腳步，搵到一個人，對我絕對忠誠絕對信任，願意同我生小朋友，最重要係擺我喺
第一位，知道我幾時需要佢。因為我經歷過，有個人唔擺我行先，第一位無論係形象又好
、工作又好，總之唔係我。」
在加拿大名牌大學UBC讀工商管理的廖碧兒說，理想本來是24歲結婚生子、在大公司工作學
以致用：「係貪錢，我就唔會咁辛苦，做咗10年，係因為我真係鍾意！。」
10年前回港拍劇，父親乾脆從加拿大回流香港跟在女兒身邊，幫忙看劇本、照顧起居。廖
碧兒說這次受傷入院，在身邊的也只有家人：「媽咪、家姐同細佬都返咗嚟，冇人比屋企
人更撐我。」
有個人唔擺我行先，第一位無論係形象又好、工作又好，總之唔係我。
小女人
05年熱戀期作品《心花放》劇照，廖碧兒說：「觀眾認為我哋襯就想我哋一齊，工作又有
機會見面，好難真正分得開。」
訪問中，有一句話，廖碧兒說過兩次。
「乜名分唔係男人畀女人嘅咩？我都想有一日，被人拖住介紹，我係佢女朋友。」
我以為這句話的重點是，當那個人出現，廖碧兒願意拖着他走出來公告天下。
廖碧兒忙否認：「唔係我拖佢，係佢拖住我，我企喺佢背後，等佢嚟公布……」
生得大份，又是舞林兼武林高手，廖碧兒說拍戲最常遇到的狀況是，劇組人員先入為主以
為她是十項全能女鐵人，安排些攀山涉水的高難度動作：
「其實我唔係乜都識，其實我連水都唔識游……」
對於明星，我們的認識都是從娛樂新聞開始的。
如果鏡頭前的廖碧兒，其實只是個希望站在男人背後的小女人，女鐵人不是女鐵人，那麼
，筍盤王還是筍盤王嗎？
撰文：朱小博
攝影：林子賢
化妝： PUI PUI
髮型： Ivan Lee@ Head Quarters
形象： Bryan@ the Flaming
服裝： Harvey Nichols