周麗淇“我依家好 open”
2011/06/24 ME! 第236期 http://bbs.ent.163.com/bbs/tvb/218573460.html
之前訪問 Niki，身邊圍着五六七個人，唔只被訪者拘謹，連做訪問的，都壓力大到背後
滲汗。
再見 Niki，帶着女助手兩個人飛車來到影樓，雖然趕戲後樣子有點累，但整個人明顯輕
鬆咗，講嘢都大聲啲。
「簽公司要顧及好多嘢，現在冇包袱，自在啲。」
過往感情問題只說官方答案，現在也鬆口了，「依家好 open，會去識朋友。」
你開到口，要識一打，話咁易啦！
Profile:
Niki Chow
出生日期︰ 1979年 8月 30日（處女座）
出生地︰香港
籍貫︰上海
身高︰ 5呎 7吋
體重︰ 110磅
語言︰廣東話、普通話、上海話及英語。
簡歷︰星探發掘入行當模特兒。 01年，簽約導演馬偉豪成為演員。 02年，憑《玉女添丁
》獲香港電影金像獎「最佳新人獎」提名。 04年，拍電視劇《翡翠戀曲》跟鄭嘉穎傳緋
聞。 05年，簽約 BMA唱片公司成為歌手，推出首張大碟《 Pure Niki》；同年憑《秀才
遇着兵》獲「飛躍進步女藝員」獎。
主要作品︰電視《翡翠戀曲》（ 04），《秀才遇着兵》（ 05），《天幕下的戀人》（
06），《桌球天王》（ 09年）。電影《百份百感覺 2》、《玉女添丁》（ 01），《戀
上你的床》（ 03），《我要成名》（ 06）。唱片《 Pure Niki》（ 05），《 Child
Woman》（ 06），《 F.L.Y》（ 10）。書籍《幸福》（ 09年），《珍惜》（ 10年）。
官方網頁︰ http://www.chowlaiki.net
05年
喊晒攞「飛躍進步女藝員獎」，汪阿姐在旁錫番。
現在才是真我
去年訪問 Niki，照片上心口位稍有陰影，也要即場刪除，以防事業線乍現。問佢驚咩？
大方答你「一定唔得性感」。
今日再見，攝影師提議突破性感防線， Niki爽快一句「效果靚，我冇乜所謂。」反讓工
作人員措手不及，特別是成班男助手，個個心如小鹿亂撞面紅耳熱，小粉絲即場現形。
「攝影師好想試吓影，我信佢。唔想讓工作人員尷尬到最終清場拍攝，未試過清場，感覺
好得意。其實唔清場我都 OK。
「對我來說不算什麼突破，大家覺得性感咩，我覺得冇乜嘢睇喎，隻手遮住，只係大露背
之嘛。」
以往情願俾人笑佢冇身材，也吝嗇騷少少以正視聽，皆因說服唔到自己，無謂騷得鬼祟核
突。如今說服到 Niki的不只是攝影師，還有多年下來塑造的玉女形象，也隨解約而放下
。
「始終簽公司，要顧及好多嘢，受好多制肘。
「現在冇公司，反而好自由，好似冇乜包袱。現在形象、做嘅事都好自我，好似依家先係
真正嘅我，自在啲。
「正在傾緊新公司，差不多成事，年尾會公佈，未知簽咗公司後會唔會又冇咗呢樣嘢，惟
有盡量享受這一個 moment。」
正式在內地發展
無綫跟唱片公司的糾紛仲未落畫，齋睇新聞，都覺得為拍劇而跟公司解約的 Niki為粒糖
失間廠，幾委屈。故事發展，受害人已靜靜變為受益人，唔做電視台親生女，宏觀神州，
密密北上賺人仔。
「兩年前拍《書劍恩仇錄》，在內地播得好好，之後好多人找我拍戲，接下來都係返內地
拍劇，今年正式開始在內地發展。」
傳聞《書》劇內地高收視，片商一致睇好 Niki國內行情，出動銀彈政策打動。千幾萬片
酬？ Niki一頭霧水，此時助手從旁告訴她，出面係咁傳，立即大笑姑婆上身，彷彿要用
笑聲告訴你，佢都想。
「片酬係合理，加埋人民幣升值，當然跟香港相比好好多，待遇也好好多，我真係坦白，
哈哈。」
國內演員個個科班出身，北上爭飯食，壓力唔係冇，但 Niki早有準備，唔擔心。
「佢哋 9成以上都從專業學校出來，對節奏及鏡頭好敏感，我 7年前跟內地演員合作過，
已知兩地演員有幾唔同。
「香港較少演員由演藝學校出來，多數邊做邊學，做戲自然觀眾就會接受。內地較講求技
巧，將學到的理論放在戲內。我覺得做戲冇分好唔好，只有觀眾睇完鍾唔鍾意，有冇共鳴
。
「很久以前有人同我講過，最重要有觀眾緣，有錢也買不到。」
Niki’s tips
Q：夏天護膚 tips？
A：夏天皮膚會出多咗油同汗，每天都要仔細清潔，皮膚先 keep得好。
Q：食療？
A： 7、 8月要拍古裝戲，已大量買定消暑湯料，準備日日煲。
會出去識朋友
之前一段跟鄭嘉穎鬧得沸沸揚揚的緋聞，隨着電視劇播完也落幕了，我這等追劇師奶當然
唔滿意個結局，次次見次次問，女主角幾時先找到歸宿。
去年、前年、大前年 Niki都話兩年後結婚生仔，計吓數，個仔都好大囉？ Niki忍不住大
笑自嘲自己答案冇新意，「你上年問我又係兩年，今年問我又係兩年，出年再問我又係兩
年，計計埋埋都 6、 7年，哈哈。
「十年前已經講兩年，現在都依然講兩年，實情我自己都唔知幾時，但見咁多人問，咪保
守啲答兩年。
「做嘢可以控制，例如接不接戲可以自己決定，但感情冇得控制，好被動。」
仍然未有對象？
「我現在很 open，會出去識朋友，但唔啱就唔啱，隨緣啦。」
會不會學其他北上發展的花旦，乘工作之便，識番個內地男友/ 老公？
「可以！哈哈，點解唔得？個市場咁大。
「好多人問過我，我唔排除這個機會，夾到咪得囉。次次返內地都為工作來去匆匆，暫時
仲未識到。」
後記
忙， Niki真的很忙，以前愛參與選吓飾物襯吓造型，今次時間緊迫通通欠奉。以往訪問
後仍可坐低一陣食吓嘢，傾吓偈，今次一影完立即趕回內地工作，連佢自己都話「一個月
飛 7、 8次，北京、上海，月尾又飛美國出騷。飛到怕，有時連自己身在北京還是上海都
搞亂。」
Niki雖然笑笑口，但笑容都幾苦。
撰文︰ Olivia Chan
形象︰ Annie Hung
攝影︰ Ray Siu
化妝︰ Ricky Lau@ZING the Makeup School
髮型︰ Ason Wong@Hair