親親爹地 不一樣的父親節

2011/06/23  壹週刊1111期

早前才跟陳寶儀離婚的羅樂林，心情未受影響，本週日與愛女羅苡之 shopping變身慶祝
父親節，羅樂林搞笑擺個 chok樣扮占士邦，叫女兒扮邦女郎擺甫士影相。

今年你與爹哋過了一個怎樣的父親節？只是行街、睇戲、食飯？早前因一日死五次成為國
際新聞人物的羅樂林，以及在《點解阿 sir係阿 sir》演壞女生彈出的樂瞳，本週日就過
了一個非一般的父親節。

型仔 chok爸 羅樂林

六十三歲的羅樂林，入行超過四十年，演過的角色多不勝數，除了拍戲要執得正，平日的
他喜歡著牛記笠記落街，從不講究，後生仔愛蒲蘭桂坊，他就愛蒲九龍城。曾經與趙世曾
兒子趙式浩拍拖的細女羅苡之（ Tisha），今年父親節為爹哋搞搞新意，趁他不用開工，
帶他衝出九龍，向灣仔出發。

Tisha帶羅樂林到星街的時裝店，幫他揀衫執新 look當做父親節禮物。入到店內，羅樂林
儼如頑皮反斗星，一時要試帽一時要試眼鏡，但當阿女幫他揀了條短褲，他就十分抗拒，
「我從來都唔著短褲，成對光管腳好難睇，唔得唔得。」

之後 Tisha揀了幾件衫，試新 look的羅樂林被大家讚他後生了廿年，他即鬼馬地學林峯
擺出 chok樣，非常搞笑。他對 Tisha安排的父親節禮物好滿意，「真係好特別，咁有型
我好鍾意，其實佢買乜嘢俾我都係一份心意，我都會著。」

老豆你好型！（真實對白）
梗係啦！（真實對白）
羅樂林入到時裝店，見到這副圓框眼鏡，愛不惜手即刻戴上，還講笑：「拍古裝可以戴住
扮溥儀。

Tisha幫他揀了件格仔後生仔恤衫，羅樂林擺上身說：「啱唔啱我，會唔會似飛仔。」

另類親子法

家有三女的羅樂林，跟女兒溝通方式，原來是摸酒杯底，「我好多嘢都戒咗，戒煙戒打牌
，唯一是飲紅酒冇戒，因為啲女會陪我飲酒傾偈，乜嘢都講，大家好似朋友咁。」

談到與爹哋的趣事， Tisha說：「爹哋在屋企好玩得，帶來好多歡樂，以前細個我哋玩
 Game Boy，佢會話有乜好玩，但轉過頭佢又好奇攞住玩，幾姊妹會唱雙簧笑佢。」

至於難忘父親節，羅樂林表示每年都差不多，「記得有一年個女話煮餐我食，簡簡單單我
都食晒，不過煮飯……佢真要學吓。」原來羅樂林愛入廚，平日都是他買菜煮飯，他要開
工阿女就買飯盒食，所以他想阿女學好廚藝。問羅樂林對囡囡有什麼期望？他毫不猶豫說
：「最緊要佢哋個個身體健康，咁多年無論生日定新年，我都係贈呢四個字給她們。」

女神小廚 樂瞳

人氣升溫的樂瞳，工作忙個不停，趁父親節前一日不用開工，她跟西廚師傅學廚孝敬爸爸
。這天她一早來到烹飪學校跟師傅學煮牛扒和甜品心太軟。一埋位師傅先教她整甜品，工
序尚算簡單，跟足師傅指示，半小時便完成製作，可放入焗爐。之後處理牛扒時有點手忙
腳亂，樂瞳媽索性出手相助，做爸爸的就只望着二人咪咪嘴笑。

樂瞳將完成的作品親自奉上給爹哋品嘗。試食後，爹哋豎起手指讚好，「好食，我俾佢一
百分啦，不過甜品做得好甜。」

好味呀！（真實對白）
樂瞳專登學煮西餐在父親節孝敬爹哋，見到爹哋食到嘴舔舔，樂瞳才放心。

樂瞳親手餵爹哋，食她炮製的心太軟。

太太壯膽

女兒學煮西餐為他慶祝父親節，樂爸爸不停說好食，在旁的樂瞳說：「爹哋有扒食就開心
。」她還取笑爹哋係怕醜仔，「爹哋媽咪都未曝過光，今次我邀請爹哋來試食同佢慶祝父
親節，佢要媽咪陪佢壯膽。」

至於爹哋是否嚴父？她說：「爹哋好少鬧我同細佬，記得有一次我哋兩個激得佢好嬲，佢
發脾氣將我書包掉咗去，嗰次我好驚。」

現職機電維修員的樂爸爸語重心長說：「依家佢工作有少少成績，希望佢繼續努力，細佬
就快大學畢業，佢 哋咁乖，我多年辛苦都值得。」而樂瞳亦想跟爸爸說心底話：「我工
作時間長，佢成日打電話追蹤問我幾時收工，有無食 嘢，有時自己脾氣唔好，好多謝爹
哋媽咪一直支持。」

雖然只慶祝父親節，餵完爹哋當然唔少得媽咪嗰份。