平價續約惠英紅攞硬女配角獎

2010-10-02 忽然一週792期

我收緊十幾年前舊價！
惠英紅坦承早前已簽約俾 TVB，亦不諱言想攞最佳女配角獎。

憑電影《心魔》連奪 7個影后獎座嘅惠英紅，原來十幾年嚟同 TVB都係部頭約。近日媽咪
姐收到風，話佢以極平價同 TVB簽咗三年經理人約，藉此博攞年尾頒獎禮嘅女配角獎。

周日（ 9月 26日），惠英紅出席慶功宴，同媽咪姐大方承認已經賣身俾 TVB，佢話：「
我係用十幾年前嘅舊價同公司簽約，錢唔係最重要，但一定要劇本好。」至於攞獎一事，
佢亦坦承恨攞：「好多謝小菁姐（監製梅小菁）搵我做《公主嫁到》韋貴妃呢個奸角，我
記得我拍自殺嗰場戲，拍到全廠好多工作人員喊，我希望可以憑韋貴妃攞到最佳女配角啦
！」

距頒獎禮仲有兩個月，當中有好多變數。據知目前《公主嫁到》嘅鍾嘉欣、《巾幗梟雄之
義海豪情》嘅謝雪心亦係大熱人選。媽咪姐就立此為照，睇吓惠英紅到時係咪真係有獎攞
！

一班好友如林建明（左二）、鍾慧冰（右二）等周日喺西貢一餐廳為惠英紅慶祝連捧 7個
影后獎座。