筍盤再培訓 陳啟泰
2011/05/09 忽然一周823期
看着眼前西裝骨骨的陳啟泰，不期然想起跟他同屬巨蟹座的朋友 C。
他們都慢熱、勤力又固執（看相中人樣子十年如一日，便知律己甚嚴。本人近距離看過，
其小腹平坦如鏡。 四十六歲嘞！問你怕未？），類似的人不會多，但像便利店，梗有一
個喺左近。
朋友C是被一眾女性朋友公認的宅男，除了拼命搏升，就是在家避靜。
由亞視轉投有線近兩年的陳啟泰都話：「基本上，我在家的時間比老婆還要多，因為她的
教琴事業都幾忙。」
星座書說，巨蟹男都戀家，即是免得過都不會跟妳出外，遑論吃燭光晚餐，無浪漫有安心
。一句講晒，做男友麻麻，嫁老公一流，俗稱「筍盤」，像陳豪！
「大約今年七月會出一張全新國語 EP，第一首主打歌〈 Baby〉剛剛在先鋒榜（由廣東省
二十個電台合辦，國內權威，連陳奕迅和容祖兒都要每年山長水遠北上捧場）攞到冠軍，
真係好開心！ 因為唱歌一向係我最大興趣和理想。」
人到中年，還終生學習，北上發展賺「人仔」，包唔會餓死老婆瘟臭屋。附註是，其位處
觀塘區的頂樓連天台「安樂窩」差不多供完，遺憾是，業主本人已「封盤」多年。
忽然有點想念，早買樓投資、一星期有三天在大陸搏殺的，單身朋友 C。
「肥晒」主持
「我覺得過多五年，可以再做《百萬富翁》，因為新一代未睇過，會有新鮮感。而其他人
又有集體回憶，可以懷舊。」
陳啟泰甫進入本集團影樓，櫈還沒坐暖，便一輪嘴告訴我，他有多愛唱歌，這次碟中的歌
都是其珍藏， R&B、小調和 Disco歌齊備，明言不會「 dum症」。
但，怎麼辦呢？我看到他，就像千千萬萬的香港人一樣，腦海會自動回帶，出現《百萬富
翁》的畫面，好想他問我問題。然後，梗係攞錢！就算收「保險線」八千蚊都好，只要不
用我先俾錢，再對住電視機「撳錢」。
「呢個訪問出街的時候，就十年嘞！《百萬富翁》係○一年五月七號出街，好記得，一定
記得！ So far，這是事業上最大的一樣嘢，帶俾我名同利！那個高潮對我來說，並無遺
憾。」
至今難忘陳啟泰面無表情迫人講「最後答案」，覺得他心中有數，但拒絕「放水」。「係
《百萬富翁》呃咗你！我到依家都強調自己唔係一個好有學識的主持，一向唔鍾意讀書。
中學時，最好的科目是音樂科。記得 F.3升 F.4，主要的科目都『肥晒』！但那一年考入
choir（合唱團），而讀聖保羅男女校，加入 choir是可以令你升班的，因為他們經常攞
獎。不過，我無升，跟屋企人移民加拿大，後來讀大學都好差，叫做畢到業咋！
「所以，唱歌一向俾到我最大成就感，依家在微博見到有 fans說：『以前只知你做主持
，最近先知你唱歌原來都幾好聽喎！』滿足感真係返晒嚟。」
我明。我真的明白。因為巨蟹男都需要得到別人認同，以取得安全感。朋友 C又何嘗不是
經常進修，連唱 K也高度戒備，只會唱他苦練十年的十首飲歌（至少他認為是），我讚美
兩句，他便像蟹般開心到橫行， so cute！
我係 sales
「如果我做主持有兩、三分，我覺得唱歌有十二分！今次好多人聽了〈 Baby〉後，也估
不到是我唱。」我聽過，竟然覺得有陶喆 feel。
為唱歌，慣性理智的陳啟泰，可以慣性犧牲。「坦白講，我一向有儲蓄，用錢也不多，加
上主持《百萬富翁》時積存下來的收入，已經不用為未來生活而憂愁。所以，如果有人俾
十蚊我做主持，又有人俾六蚊我做音樂，一定揀做音樂啦！既然已經搞掂生活，就可以追
求多點理想。
「新唱片公司老闆曬到黑黑哋，東莞生意人，三十零歲，睇過《百萬富翁》同《我和殭屍
有個約會》，所以認得我，大家一拍即合。」強國就是強國，除了富二代，還有數不盡的
青年實業家。錢，多的是，端看閣下有何能耐，得以背靠祖國。
「記得簽約不久，跟老闆去吃飯，坐在他的 Benz內，我問：『老闆，你做甚麼生意的？』
『我做 LED燈膽 o架！』『哦……』跟着，我就在三分鐘內，想到一個廣告 storyboard
（分鏡圖），背景音樂是我的歌，又 sell到 LED燈膽，是講一個城市人和蘭州姑娘的愛情
故事。他一聽，好鍾意，今個月中就拉隊去武夷山拍。
「其實，我都係一個 sales嚟 o架！但只限創作，你叫我 sell一件貨，就未必得嘞。」
聽過千萬次了：機會只留給有準備的人，平日多用腦，就令甘願賺「六蚊」的陳啟泰，獲
老闆投資數十萬幫他做碟，再奉送廣告和 MV。你說明星有着數？但朋友 C讀了兩個普通
話課程，職位就順勢升兩級。
怕死老公
「不過，有一次聽到新城 DJ露芙講：『阿 Ken（陳啟泰洋名）呢幾年好似大半個身瞓了
在大陸發展！』真係有少少心噏。其實，我無，亦都唔得。只是《百萬富翁》那時多點北
上登台，現在每月也有兩、三次。直至現在也未慣返大陸，但做唱片，有需要時回去一天
兩天就可以。我是不可以移民國內的人，大家的文化相差廿多年，他們等於香港的七十年
代，真的會『放飛劍』、插隊，但自己看到也不會出聲。
「因為，你在別人地頭，就要尊重別人的文化。等於你在大陸，唔可以示威。着艾未未 T
恤上廣州？你想死啫！同一道理，內地人來香港，應該遵守香港法律，我覺得好 fair（
公平）。」有理由相信，陳啟泰注重「和諧」。而我，愛言論自由，但大概沒多少姊妹想
做望夫石版的民主女神像吧。嫁老公，這種的確夠穩陣。
「 OK啦！我和老婆在好多事情上，都有共識。當然，結婚十幾年，不會再有頭一年拍拖
的激情，現在是親人，細水長流。
除了養狗，還鑽研另類療法。「上網睇，再自我分析試驗，已經成功醫好兩、三隻瀕死的
貓狗。（還飲尿嗎？）有，好間唔中，是補藥。但我會叫大家唔好隨便試，因為要配合好
多嘢。」
「現在一星期要返四日有線，明天又飛去紐西蘭拍旅遊特輯。」陳最喜歡《四個轆．周圍
Look》這節目，與女主持張潔茵自駕遊世界。
「我們一直沒有細路仔，因為自己唔鍾意，太太不是特別鍾意，覺得很難教。就是父母教
得好，也可能給其他人帶壞。其實，兩個人生活都唔悶 o架！我們有兩隻狗，養了很多年
，某程度上也當了牠們是仔女。得閒擔張櫈上天台，幫兩隻狗沖涼、玩下水，已經好開心
。
「我同老婆最夾的，是大家都比較草根，唔會想住乜璽物璽這些豪宅，因為自己唔會落
club house（會所），亦唔需要大堂有冷氣！而且，我唔想一上的士，就講：『唔該去
凱旋門吖！』法國呀？我呢啲 old school人，真係頂唔順囉。」
甘於平淡，自然樂得優游。陳啟泰現在偶然才回國內登台，由於外形「呃得吓人，好似懶
清高」，跟老闆說飲酒會暈，唱不到歌，便可減免應酬。但「飛來蜢」呢？西裝骨骨的陳
啟泰，應該大有本錢「孔雀開屏」。
「有。一定有。有人送嘢，有人留電話。但我似我老竇，怕死！唔好亂嚟。因為所有嘢都
base on（建基於）家庭，我們做這行更加煩，會俾人大肆報道，所有嘢會無晒，好危險
o架！
「雖然，我細個唔覺得要結婚，但原來另一半想，那都 OK，無所謂。結了婚，就要尊重
呢個制度，是一個 commitment（承諾）。」
少女情懷時，我們大概會為那句「無所謂」而嬲得一陣陣。但隨年月過去，方知承諾二字
值千金。在金價還愈升愈有時，或許該約朋友 C出來喝一杯了。對，趁買定樓等結婚的他
還未被遠比「港女」識貨的「北地胭脂」攻陷。
撰文：李綺雯
攝影：陳兆基