娥姐10月出嫁：我要減肥

筵開 50席　搞個大 Party娥姐 10月出嫁：我要減肥

47歲的商天娥鐵定跟同居 4年的男友李偉誠今年 10月拉埋天窗，娥姐昨日接受訪問，大
講婚禮詳情。她表示會筵開 50席宴請親友，實行搞大佢，農曆新年後她會努力減肥，務
求做個索爆新娘。

商天娥要出嫁，一直只聞樓梯響，直至昨日她接受新城訪問，正式宣佈在 10月出閣。娥
姐在無綫一劇接一劇，令結婚計劃一拖再拖，至去年 7月 24日娥姐牛一，跟她拍拖 4年
的男友李偉誠向她求婚成功，娥姐決定今年做 10月新娘，筵開 50席同歡。談到婚期，娥
姐表示還未落實 10月哪一天，她說：「我個契姐話 2010年 10月 10日，但呢個期好爆，
我哋又想擺 50圍，唔係好多地方可以揀，最初仲話想擺 100圍。o依家 10.10.10唔得，
有諗過 10.10.1，嗰日係國慶，但驚圈中朋友多嘢做； 10月 3號嗰日勁好日，好難揀，
但呢個禮拜要決定。」

禮金至少 10萬

娥姐夢想中的婚禮，並非豪門夜宴，她說：「我冇所謂，係爹哋媽咪想搞大啲，我始終係
大女。」那麼禮金數目應不少，娥姐說：「咁最少都 6位數字，我都想搞個大 party。其
他嘢想一切從簡，o依家打算喺酒店註埋冊，一次過，唔使行來行去咁煩。」娥姐鐵定做
 10月新娘，好友紛紛自薦幫手，她說：「我班設計師朋友話幫我搞婚紗同晚裝，仲話唔
畀我着咁多套衫，一件婚紗，最多兩套晚裝，驚我成日匿喺房換衫，想搵我影相都難。佢
哋會設計啲睇到嘩一聲嘅衫畀我，我就要喺新年後減肥，想啲衫着起上嚟有 shape。」娥
姐 4年前認識李偉誠，兩人在鰂魚涌同居。李偉誠曾任英皇投資部高層，近年自立門戶做
照明系統生意，娥姐偶爾會陪男友北上傾生意，她曾形容男友性格滋油，與性急的她一凹
一凸十分夾。採訪、攝影：楊潔雯