第 20屆壹電視大獎 雯女祥仔好風騷 （壹周刊1048期)
鄧萃雯：下次搵你做五奶奶！（真實對白）
楊千嬅：得！但柴九要鍾意我！（設計對白）
《巾幗梟雄》奪得「十大電視節目」第二位，監製李添勝上台致謝詞，丁太楊千嬅變成小
fans，趁機會埋去同雯女、祥仔影合照，估唔到丁太同我阿媽一樣，都係標準師奶電視
迷。
人生有幾多個 10年，更何況係已經踏入第 20個年頭嘅《壹電視大獎》頒獎禮。
就算今時今日已經無「電視汁送飯」呢支歌仔唱，但今屆十大電視節目頭兩位《宮心計》
、《巾幗梟雄》，兩套本地製作帶起香港電視迷茶餘飯後熱門話題，的確近年少見。
好劇本，又點少得好嘅演員。繼《金枝慾孽》如妃娘娘後，再次憑《巾幗梟雄》四奶奶角
色榮登「十大電視藝人」第一位。雯女好戲係人都知，但牡丹雖好，都需要綠葉扶持，雯
女上台領獎一刻，希望將榮耀帶俾身邊所有人：「攞第一，唔代表最叻、演戲最好，呢行
所有演員其實都好努力。」
努力付出默默耕耘，自然有理想回報，正如黎耀祥，從未試過打入「十大」，今次憑柴九
登上第二位，同拍檔雯女平分春色，證明薑愈老愈辣，演技同運氣，都要花時間。
拍戲拍出真感情，唔一定關乎緋聞，响《巾幗》入面飾演大奶奶嘅謝雪心，就同「哎吔仔
」必正吳卓羲勁好感情，心姐仲話最鍾意聽見吳卓羲嗌佢做大媽，聽見就冧喎！
懷舊劇一向有市場，《巴不得爸爸……》打入「十大電視節目」第五位亦理所當然，性感
到場嘅楊思琦更多謝監製潘嘉德俾佢做「牛王妹」小芬女，角色上終於有突破。
「十大電視節目」排第七嘅《畢打自己人》，黎耀祥都有份演出，佢仲話呢套劇其實比起
柴九更加有突破：「大家都估唔到我可以著西裝做戲，望落仲幾靚仔。」引嚟全場笑聲掌
聲。
正喎！（設計對白）（小圖）
《壹電視大獎》星光熠熠，圈中過氣緋聞情侶吳卓羲、官恩娜狹路相逢但大方合照，之後
吳卓羲仲欣賞女方獲「全方位美態藝人大獎」嘅靚相。
好老實，阿佘响《宮心計》嘅三好角色就算再討好，始終唔及《絕代商驕》裡面嘅三水妹
，就連阿佘都話多謝監製張乾文，俾咗個超級港女角色佢做。
話晒係師奶殺手，陳豪一嚟到就顧住整靚件衫俾大家影相，但就唔記得手上部電話，最後
成個「砰嘭」跌落地！陰功咯！
撰文：八珍
mailto:nextb@nextmedia.com