→ snian:鼓手兼隊長冠佑?! 05/05 01:11
→ pararealq:應該是心靈導師冠佑XD 05/05 01:16
打出一片天 輯錄自 香港 東周刊 295期 Book B 【金牌飯局】 27/04/09
http://www.eastweek.com.hk/index.php?link=content_detail&article_id=1513
黃栢高
黃栢高(Paco)，金牌經理人，叱吒樂壇三十年，炮製無數金曲，捧紅不少歌手。
近年涉足電影，《行運超人》、《龍咁威》、《殺破狼》等，皆叫好叫座。
最新動作，除於本刊主持《金牌飯局》，每逢周一更在《頭條日報》主持
「名人會」專欄，專訪城中名人、紅星。
打邊爐同夾Band其實有個共通點，就係最緊要個湯（班）底正，湯底正的話，可以
為食物增添美味，如果夾Band嘅班底有共同嘅音樂理念，一齊打拼，分分鐘可以成為
樂壇經典。即將再次喺香港開演唱會嘅台灣樂隊班霸五月天，原來都好鍾意打邊爐。
今次我就帶佢哋嚟到金牌火鍋，試嚇呢度嘅金牌湯底同牛肉，但係各位讀者千祈唔好
誤會，金牌火鍋同我嘅金牌大風絕對無關係，不過呢度嘅出品，絕對擔當得起「金牌」
呢個名！
飯局金句：Rock & Roll Never Die！
（圖一：http://kuso.cc/4EAl）
五月天鍾意打邊爐，所以我就帶佢哋嚟依家最受歡迎嘅金牌火鍋！好可惜，主音阿信
因為身體不適，所以錯過咗呢個品嘗美食嘅機會。（左起：冠佑、瑪莎、怪獸、石頭）
音樂DNA
來自台灣嘅五月天，其實已經出道十年，樂團成員有鼓手兼隊長冠佑、主音阿信、
結他手怪獸、石頭，同埋低音結他手瑪莎。雖然成員們年紀已過三十，唔算偶像派，
但追隨佢哋嘅歌迷有不少都係學生。當你聽佢哋嘅歌，睇埋佢哋嘅歌詞，你會感受到
佢哋心裏面團火有幾熱，對生命充滿熱情，難怪喺台灣瘋魔唔少年輕男女。
自從06年起，每年嘅5月，五月天都會喺香港開演唱會，而今年嘅5月20至22號，就會
舉行<DNA五月天創造演唱會>香港首站，喺紅館開演唱會係歌手嘅夢想，佢哋都唔例外。
冠佑話：「紅館的燈光打下來，男的特別帥，女的特別美！我們希望香港的樂迷看到
我們更帥的一面！哈哈哈！」瑪莎補充，佢哋嚟香港開演唱會最開心嘅地方，就係fans
非常high、非常投入，令氣氛推至高峰。
五月天向來都好識得搞噱頭，好似喺05年，佢哋就喺台灣101大樓嘅91樓觀景台舉辦咗
「史上最接近天空演唱會」，成為一時佳話！而今年嘅演唱會就用DNA做主題，佢哋
又想玩啲咩？
「每個人都由DNA組成，而歌迷就是五月天的DNA，支持我們有更多的創作。」石頭認真
地為我解釋，佢仲話每年都好期待返嚟紅館開演唱會，因為就好似搞每年一次嘅歌迷
聚會。
下個十年
（圖二：http://kuso.cc/4EAn）
除咗五月天，我仲搵埋TVB8嘅主持陳爽幫我用普通話一齊訪問，佢哋話：「我們的
廣東話喝完酒就會變得靈光！哈哈哈！」
（圖三：http://kuso.cc/4EAo）
石頭話已經係第三次嚟紅館開show，佢同怪獸都十分期待，因為佢哋準備咗唔少驚喜
畀fans。
（圖四：http://kuso.cc/4EAp）
瑪莎話佢爸爸起初唔係太清楚佢喺隊band入面負責啲咩，「因為他聽不到我低音結他的
聲音啊！」所以瑪莎最後就帶爸爸去現場感受live band嘅氣氛！
今晚嘅飯局少咗主音阿信，因為阿信身體抱恙未能出席，瑪莎說，「今晚阿信不能來，
真是他的損失，因為這裏的食物很好吃啊！」呢間金牌火鍋係我近期打邊爐首選，因為
食物的確好新鮮，亦好潮，好似牛舌心、豬肚尖咁刁鑽嘅食材，都可以食到。怪獸就
對個竹筒蝦滑讚口不絕，「很鮮味、很爽口，真的很好吃！」
喺我音樂事業嘅生涯，曾經做過全港最受歡迎嘅Beyond，依家就做梗最有潛質嘅Rubber
Band，我對band sound嘅著迷係絕對嘅。搵到一個好班底，就等於搵到一班好兄弟，
可以同甘共苦。
五月天呢班兄弟由當初喺街頭賣唱，到依家去世界各地巡迴演出，石頭話：「我們就是
手握著手，互相幫忙，熬出頭來。」五月天當然希望未來有無限個十年延續落去，
「現在，我們會視為更新的開始，我們期望將自己的力量發揮到最大，創作更多音樂。
冠佑話除咗大型演唱會，佢哋都好重視校園show，因為可以拉近同觀眾嘅距離。校園
show場地雖然細，但係氣氛同感染力可以好強。我覺得香港歌手都可以借鏡，做多啲
校園show，令更多年輕人認識你嘅歌，同時儲嚇人氣。
「我們對學生歌迷亦特別照顧，例如台灣學生只要買我們的專輯，就可以免費入場睇
校園show。」瑪莎補充說。就算有人認為咁做會令觀眾唔再買飛睇show，但五月天一於
我行我素。
活於青春期的男人
（圖五：http://kuso.cc/4EAq）
冠佑同陳爽都大讚金牌火鍋嘅食物一流，最近喺《掌故王》做主持嘅陳爽話佢第一次
食到咁香脆嘅炸腐皮卷，個湯底又夠濃，簡直食唔停口！
（圖六：http://kuso.cc/4EAs）
怪獸有個別號叫做Drinking Monster，瑪莎就即場同佢以威士忌比拚一番。
（圖七：http://kuso.cc/4EAt）
五月天嘅演唱會由原本5月20、21號兩場，加開到5月22號三場，大家都拍手叫好。
我哋仲當今晚嘅飯局係提前慶功！
樂隊、樂與怒，同結婚生仔，好似係兩碼子嘅事，不過五月天嘅石頭同冠佑就話雖然
佢哋兩位已經結婚生仔，但其實佢哋仍然處於青春期，而隊友嘅小朋友出世，唔單止
無阻礙五月天嘅發展，反而為佢哋增添活力。
已有一個囝囝嘅石頭食完一件炸腐皮卷之後就話，「我覺得自己很幸運，我的家庭
很支持我的工作，他們不單沒有阻礙我的音樂發展，反而令我的生活更加精采。」
怪獸就話，其實自從小朋友出世，可以為佢哋呢班大男人紓解壓力，「小孩來studio玩
的時候，總是為我們帶來歡樂，甚麼煩惱都忘記了。」佢哋都話以前夾完band就會去
飲酒，「大家都說我是drinking monster，其實冠佑才是drinking master」怪獸說。
冠佑係五子之中最好酒量嘅一位，年輕時最鍾意飲酒，「中學年代，會跟朋友玩得很瘋
，由早上喝酒到中午，之後就睡覺，哈哈哈！」但婚后冠佑飲酒只會適可而止。「不過
，今晚例外，哈哈哈！」我為五月天乾！
今晚，我哋嚟到一間金牌級火鍋店，叫咗一個足料夠味嘅牛骨煲湯底，我睇見個牛骨
煲湯底愈滾愈夠味，就好似一隊樂隊必須要長時間磨練，玩嘅音樂先有feel。
五月天嘅成功亦證明一樣嘢，就係一個好班底只要有實力、有夢想就可以成功。
我寄望香港嘅樂隊，都要堅持自己嘅理想，打出一片天！
金牌火鍋
地址：佐敦白加士街10-24號永富大廈1樓
電話：2730 7799
--
※ 發信站: 批踢踢實業坊(ptt.cc)
◆ From: 211.74.99.81