本文轉載自MyAV討論區 經過編輯轉貼
在此再次鳴謝hifi江湖名宿鄺大俠引言, 而創立「黑六類集中營」留言板.
******
發燒友最難忍受的事，莫過於聽一套衰聲Hi-Fi！
偏偏主人家熱情如火，認為此乃天藾之聲，無人能及，非要客人盡情欣賞不可，
無兩三個鐘頭，絕不肯放人！但再聽落去，確實可以令人頭昏腦脹，翻眼兼伸腿。
記得有一次，飲飽食醉後，陪同一位德高望重的老前輩去聽一套出名「衰聲」之組合，
兩個鐘頭後，發覺前輩神情不妙，於是急急告辭。怎料一出大門，老人家先打冷震，
繼而雙腳發軟，接著牽動腸胃，大吐特吐，幾乎成棚假牙都吐埋出來。
好在本大俠身手敏捷，即時將阿伯扶住。只見佢老人家長嘆一聲道：
「真係頂唔順，直頭悶到嘔，依家舒服晒矣。」至今方知衰聲是可以令人作嘔的。
如果你以為去別人處聽"，要隨時準備執生的話，那麼請人返屋企聽"，
應該沒有問題了吧？
錯！仲衰多幾錢！因為你可能請口左班「Hi-Fi惡客」回家。
Hi-Fi惡客種類繁多，難於辨別，本大俠略懂一二，樂於與各位讀者共享。
有些發燒友本身唱片、CD收藏甚多，能夠面不紅、氣不喘自封為音樂權威，
修養當然有番咁上下！請他們回家聽，相信都唔會錯吧？
但人心不測，當他們一旦發現有些絕版唱片、CD是他們夢寐以求的話，頓時雙眼放光，
暗起殺機，千方百計，希望能奪到手。先以利誘，如果唔掂就借，心軟如本大俠，
俾人求得幾求，很小會托手爭。
唱片、CD一旦借出，悲劇即時上演。 如果您老哥借出那張並非甚麼絕版珍本，恭喜你，
歸環有望。但如果那張係絕子絕孫口既正，咁就唔好彩矣，恐怕有如肉包子打狗，
有去無回頭。
借錢唔還，大可以告上衙門。但只係一張唱片，搞到咁大件事，恐怕同情惡客口既
比人比氣老哥還多。
記得有一次，有位發燒友對亞叔張絕版唱片，愛不釋手，聽完之後，終於開口要借！
本大俠尚在考慮，他早已塞入懷裡，揚長而去。而且一借數月，音訊全無。
亞叔出齊十八般武藝，又威逼利誘，都無佢收，佢把聲竟然比本大俠更大。
最後，一於到佢屋企實行死賴，不還碟就要佢養多個便宜老豆，唱片終於可以
物歸原主了。
此乃第一類Hi-Fi惡客。
第二類惡客就更加乞人憎，常常眼見心謀，不問自取，連借都慳番，十分乾手淨腳。
所以如果招呼一些不太熟悉口既發燒友回家，非要打醒十二分精神不可，不然損失只
係自己。
有些發燒友，毫不尊重主人家，請他一個人聽，佢就連姨媽姑姐都帶晒來，
事先又不作通知，實行先斬後奏。此乃第三類惡客。
有些發燒友天生熱情兼手多，到人家處聽口野，用耳又用手，喜歡東摸摸，西摸摸。
往往自動獻身，又幫人校唱頭，又幫人移喇叭，連喝都喝不住。
最後D聲仲衰過以前。佢老哥拍屁股便走頭，留下成擔蘇州屎搵人執，認真打得少！
此乃第四類惡客。
有些發燒友用心不良，到每一處地方聽，都係有彈冇讚，
目的只有一個，就係銀。他們隨身攜帶各種自製紐號線、電源線、喇叭線、乜釘物釘
為你校聲，每換一樣口野，跟來果班搖尾系統必然大叫「靚！」，定力稍為不夠，
便會中招。
佢地又像醫生一樣，叫你打開機蓋驗身。跟著就話呢樣唔掂果樣唔妥，
非要做Up-grade或Modification手術不可。
當然如果遇著些真正有料之士，可能得益良多，但如果遇著班無良友，
背定就荷包有難矣，此乃Hi-Fi第五類惡客也。
--
※ 發信站: 批踢踢實業坊(ptt.cc)
◆ From: 218.166.74.51
※ 編輯: ckscorsese 來自: 218.166.74.51 (09/04 22:02)