劉德華和鄭秀文主演的《瘦身男女》現時正在日本進行地獄式拍攝，華仔和Sammi幾乎每日
拍戲都要著起兩件重裝盔甲，扮肥仔肥妹，背住幾十磅已經辛苦到嘔，加上天時暑熱，畀
兩件肥佬外殼焗住，華仔和Sammi真係仲慘過入焗爐，難怪一向捱得的華仔都大叫頂唔順，
下次都未搞佢。
日前華仔和Sammi在橫濱街頭拍戲，扮到成隻肥豬嘜咁既華仔仲要踩單車，在雨中手執雞毛
掃，實行滕條炆豬肉，鞭策肥婆文減肥，華仔全身裝備後，活動能力大為下降，舉手投足，
十分「論盡」，但導演卻安排一架個轆細過華仔塊肥面既單車畀華仔踩，架單車又細又窄，
個坐墊三尖八角，睇見就已經籮佑痕，唔使坐都知道肯定會哽到籮佑腫，加上天雨路滑，一
個唔覺意好容撻到攤攤腰，難怪華仔睇見架縮骨單車都打個突，不過華仔好有專業精神，完
全冇多多聲氣，仲講笑話：「唔係掛，我咁肥，架單車咁細，點踩呀？不過唔好睇少我肥，
我身手好靈活呀！」
拍攝雖然辛苦，但華仔盡力做足一百分，之但係拍完之後，華仔都大叫「頂唔順」，接受
訪問時，華仔話：「拍完套戲真係有少少頂唔順，我相信唔會拍續集啦，大家好難再會見
到咁肥既華仔出現！」
成個鐵人咁款既華仔都話頂唔順，好似瘦骨仙咁既Sammi就仲慘情，拍攝時不但要背幾十磅
肥婆盔甲，更要扮進行地獄式減肥，一邊畀華仔滕條炆豬肉，一邊拉住個十幾磅重既油柚通
街走，果種辛苦法真是不足為外人道，事後Sammi有感而發：「我今次真係有好深體會，肥
人減肥真係好辛苦，而且亦體會到乜野係地獄式減肥。」
其實華仔和Sammi辛苦，導演杜琪峰亦心中有數，所以拍攝其間都錫住兩人，拍完一個鏡頭
，就允許兩人卸下前臂的化妝，抖抖涼。
編輯中心：華仔和Sammi拍完都呻辛苦，睇唻肥人真係唔易做。
http://yulok.hkcyber.com/news.asp
照片
http://yulok.hkcyber.com/newspic/2805np1b.jpg
http://yulok.hkcyber.com/newspic/2805np1c.jpg
--
▌ ▁▌ ▌▁ ▌|情報員標號: h1.34D90241.hinet.net |局中| ◤
▌ ▌ ▌▃ ▌|隸屬☆單位: 中央情報局 (bbs.e-cia.net) |邑情| ◣