《少林足球》破紀錄成電影史上最賣座港產片
截至昨日為止，《少林足球》累積票房去到５７６１萬，經已越過成龍大哥既
《警察故事４之簡單任務》，保持左三年，大收５７５１萬既最高紀錄，《少林
足球》正式成為香港電影史上最賣座既港產片啦！
星爺下一個目標，就係挑戰兩支恐龍隊，《迷失世界》收五千八百萬，暫居史上
賣座第三位，但睇黎個位危危乎啦，至於《侏羅紀公園》收六千一百萬，一直處
於第二位，星爺對《少林足球》充滿信心，睇好套戲可以破埋六千萬大關，若然
真係大步攬過六千萬，星爺會大搞慶祝活動，同手足高興一番。
之前聽過李卉話，星爺會請成班手足去旅行，但星爺話，因為《少林足球》要預
備響世界各地上畫，所以暫時都好忙，但星爺應承大家，一有時間就會同手足去
旅行啦！
《少林足球》由香港出發，不斷巡迴世界各地上畫，但響星爺心目中，最希望當
然登陸大陸市場啦，究竟批文搞成點呀，星爺？星爺話，仲要耐心再等一段時間
，但如果《少林足球》真係冇辦法響中國上畫，星爺話損失唔止係金錢，最大損
失仲係大陸觀眾無法欣賞到呢部電影，因為星爺拍《少林足球》，響祖國拍攝，
又係祖國既題材，根本就係為中國人而拍，如果真係上唔到，你話損失幾大呢？
--
▌ ▁▌ ▌▁ ▌|情報員標號: student.cgu.edu.tw |局中| ◤
▌ ▌ ▌▃ ▌|隸屬☆單位: 中央情報局 (bbs.e-cia.net) |邑情| ◣