Auld Lang Syne

Should auld acquaintance be forgot,
    And never brought to mind?
Should auld acquaintance be forgot,
    And auld lang syne?

CHORUS
For auld lang syne, my jo,
    For auld lang syne,
We'll tak a *cup o' kindness yet,
    For auld lang syne.

And surely ye'll be your pint stowp!
    And surely I'll be mine!
And we'll tak a cup o' kindness yet,
    For auld lang syne.
        For auld lang, etc.

We twa hae run about the braes,
    And pou'd the gowans fine;
But we've wander'd mony a weary fitt,
    Sin auld lang syne.
        For auld lang, etc.

We twa hae paidl'd in the burn,
    Frae morning sun till dine;
But seas between us braid hae roar'd
    Sin auld lang syne.
        For auld lang, etc.

And there's a hand, my trusty fiere!
    And gie's a hand o' thine!
And we'll tak a right gude-willie-waught,
    For auld lang syne.
        For auld lang, etc.

Robert Burns
SMM no. 413 (1796), signed Z

NB *Some sing Kiss, in place of Cup.
--
auld - old
lang syne - long since, long ago
jo - sweet heart
stowp - tankard, measure
pou'd - pulled
gowans - 'the flower of the daisy, dandelion, hawkweed etc.'(Burns)
fitt - foot
paidl'd - paddled
burn - stream
dine - dinner-time
braid - broad
fiere - companion
gude-willie-waught - cordial drink, 'cup of kindness'