推 heyd: 因該辦耶穌還是聖母瑪利亞遶境223.138.227.190 04/21 22:23
公視新聞網 https://news.pts.org.tw/article/747501
左鎮教會設教155週年 招在地用藝術妝娗社區
發布時間：2025/4/21 19:15 更新時間：2025/4/21 20:05
李晨宇 / 採訪報導
https://www.youtube.com/watch?v=rX3EBLtvgM0
臺南左鎮老街干焦58公尺，予人講是全臺灣上短的老街，當地人口嘛流失嚴重。毋過這陣
社區拍拚，透過宗教活動、藝術裝置抑是傳統竹工藝課程，沓沓仔咧活化這片土地。左鎮
教會今年155週年，參閣活節結合辦活動，教幼囡仔認捌in遮特殊家族的姓，嘛透過裝置
藝術妝娗地區。（此則新聞標題、內文為臺語文。）
七彩的繩仔佮彩蛋掛佇左鎮老街頂做妝娗，邊仔的蔗埕公園嘛有古錐兔仔的裝置藝術，予
人感受著春天的氣氛。為著慶祝設教155週年佮閣活節，臺南左鎮教會毋干焦辦活動，閣
佈置社區環境。活動中，教會嘛透過台羅拼音，教囡仔唸出當地15个特殊的姓氏，像是「
買」、「力」、「毒」、「兵」等，予囡仔認捌家己的根。
臺灣基督長老教會左鎮教會牧師鄭逸新講：「阮遮較大的姓一个是買，日本時代抑是民國
時代欲登記戶口，in就愛取一个名。所以就取最後一个音，買。有人的姓是in進前這个家
族攏無，為著欲改變家己家族的運勢，去登記較旺族的姓，有的人就共in兜姓改做力。」
往過左鎮人口捌有上萬人，這馬減甲賰4100人，成做全市第二少的行政區。有退休的公共
藝術家林昭慶，看著遮有真好的自然佮產業資源，進駐左鎮，開設竹藝班，閣參在地竹藝
師李天生合作，向望予竹仔發展變做經濟作物，in嘛按算共竹仔應用佇竹構、竹厝等方面
，共發展做綠色產業。
藝術家林昭慶講：「阮入來到這馬至少有六个少年人，已經轉來到咱的老街做發展，像咱
的左慢點的一寡活動，這攏是真濟少年人慢慢仔入來投入。」
臺南市左鎮區長余基吉講：「過去阮推動地方創生了後，逐家小可重視左鎮這个所在，袂
少在地青年佮外地的藝術家，嘛攏真關心這个所在矣。」
藝術家講，全臺灣上短的老街就是左鎮老街，總長干焦58公尺。對稀微，到這陣靠社區逐
家做伙拍拚，加上藝術家定期辦活動，活化這塊土地。In上大的向望，予左鎮毋但有過去
的歷史，閣較有未來的可能性，繼續予在地有無仝的光彩。
曹詠涵/編輯
--
※ 發信站: 批踢踢實業坊(ptt.cc), 來自: 111.255.110.240 (臺灣)
※ 文章網址: https://www.ptt.cc/bbs/Gossiping/M.1745244778.A.91E.html